Хан-Уул дүүргийн Эрүүл мэндийн нэгдэл А корпусаа нураалгаж эхэлсэн байна.  Тодруулбал, Италийн хөрөнгө оруулалттай гэх “Арш” компанийнхан тус эмнэлгийг А корпусыг  нурааж эхэлсэн шалтгаанаа мэргэжлийн хяналттай холбон тайлбарлаж байгаа гэнэ. Өөрөөр хэлбэл мэргэжлийн хяналтын байцаагчийн “Цаашид засвар хийж ашиглах боломжтой” гэдэг дүгнэлтийг ашиглах боломжгүй болсон мэтээр холбогдох албаны хүмүүст ойлгуулж, эдгээр захирамж, тогтоолыг гаргуулан нурааж байгаа эх сурвалж мэдээллээ.

1989 онд энэ эмнэлэг залгаа А, Б, В корпустайгаар баригдаж байжээ. А корпусыг биеийн тамир, чийрэгжүүлэлтийн чиглэлээр үйл ажиллагаа явуулах зориулалтаар бассейнтай барьсан аж. Гэвч 1997 онд улсын санхүүгийн байдалтай холбогдуулан, А корпусыг түрээслүүлж, баар ажиллуулах болжээ. Харин 2005 онд нийслэлийн Засаг дарга М.Энхболдын захирамжаар барилгыг дүүргийн Замын цагдаагийн тасагт шилжүүлсэн гэдэг. Тус тасгийнхан өнгөрсөн онд шинэ байранд орсон тул эмнэлгийнхэн барилгаа өөрсдөө ашиглана гэж найдаж байсан ч хэдэн сарын өмнөөс Италийн хөрөнгө оруулалттай гэх “Арш” компанийнхан А корпусыг үг дуугүй нурааж эхэлжээ.  Ингээд эмнэлгийнхэн холбогдох газруудаар явж учир байдлыг лавлахад 2011 онд нийслэлийн ИТХ-ын тогтоол болон Өмчийн харилцааны газрын даргын тушаалаар өмчөөс хассан байсан аж. Гэвч энэ талаар тухайн үед эмнэлгийнхэнд огт дуулгаагүй байна.

Ямартаа ч манай улсад эмнэлэг, цэцэрлэг хүрэлцээгүй байдаг. Гэтэл эхнээс ийн зарж борлуулаад байхаар цаашдаа хэрхэх нь тодорхой юм. Эмнэлгийн ажилчид ч А корпусаа нураалгасандаа бухимдацгааж байна.