Шинээр баригдаж байгаа төдийгүй ашиглалтанд ороод удаагүй байгаа орон сууцнуудын метр квадрат зөрж байгаатай холбоотой гомдол саналууд хүрээгээ тэлж байна. Учир нь ШӨХТГ-т  энэ талаарх гомдол 60 гаруй ирсэн бол одоо 100 хол гарсан талаар бид мэдээлсэн. Тэгвэл тухайн шалгалтын ажил хэрхэн үргэлжилж байгаа талаар ШӨХТГ-ын байцаагчаас асууж тодруулахад "Энэ асуудал хурдан хугацаанд шийдэгдэхгүй. Учир нь иргэдийн гомдол нэмэгдэж ирсээр байгаа. Улмаар иргэдийн гомдлын дагуу тухайн байгууллагын орон сууцанд шалгалт хийгээд зөрчил илэрвэл албан шаардлагыг хүргүүлнэ. Нэг сарын хугацаатай албан шаардлагыг зарим барилгын компаниудад хүргүүлсэн. Харин шалгалтын ажиллагаа үргэлжилж байгаа. Бид цаашлаад эл ажил дээр Эрүүгийн цагдаагийн газартай хамтрахаар төлөвлөж байна" гэв.

ШӨХТГ-аас хийсэн шалгалтаар иргэд барилгын компаниудад дор хаяж 2-20 метр квадратаар “молигодуулж” байсан гэдгээ мэдсэн. Тиймээс ийн өөрийн авсан байрныхаа квадрат метрт хяналт тавьж эхэлсэн байна.

Ямартаа ч иргэдийн ирсэн гомдлын дагуу ШӨХТГ ажиллаж байгаа бөгөөд хэрэв улсын комисс хүлээж авсан байранд удаа дараа дээрх зөрчил илэрвэл тухайн байцаагчид хариуцлага тооцхоо ч хэлээд байгаа юм.