Өргөн фронтоор дайрсан утааг бууруулцгаая аян энэ жил харьцангуй тайван өрнөж байна. 

Май энэ сайжруулсан зуух, май энэ  яндангийн шүүлтүүр, гэрийн дулаалга. Энэ бүгд үнэгүй шахуу тараагдсан. Юунд найдаж вэ гэхээр 2011-2012 онд агаарын бохирдлыг 50 хувь, 2013-2014 онд 80 бууруулна гэсэн төлөвлөгөө байсан юм.

Төлөвлөгөө нурсан гэдгийг Ерөнхий сайд нь хүртэл хүлээн зөвшөөрч гараа өргөчихсөн. Гэхдээ бас хоосонгүй ээ "ЗОХИЦУУЛНАА" /утаа багасахгүй бол надтай ярь/ л гээд бичүүлчихсэн сууж байгаа.

Дайны гол тактик буюу нэг бүр нь 475 мянган төгрөгний үнэтэй сайжруулсан зуухыг 160 гаруй  мянган гэр хороололд тараагаад дуусч байна. Бас болоогүй ээ хэрэглээгүй бол торгох нөхцөлтэйгөөр. Нэг зуухны үнэ гэхэд бас л үнэтэй юм аа. Гэхдээ үнэтэй гэдгийг нь иргэд мэдрэх боломж даанч байхгүй юм даа. Учир нь тэдэнд 29-33 мянган төгрөгөөр шахчихаж байгаа юм чинь.

Одоо харин утаа шүүгч маск тараахаар ярьж эхэлсэн гэнэ. Үгүй ээ болоош дээ. Ийм үнэтэй зуух тараагаад буурахгүй л байгаа юм чинь хүн бүрт утаанаас хамгаалдаг маск тарааж амь тариа хийх нь зүйн хэрэг.

Хэрэгцээ шаардлагыг нь олоод харчихсан хэд хэдэн компани утаа шүүгч маск оруулж иржээ. Тухайлбал Англи улсад үйлдвэрлэгдсэн гэх онцгой шүүртүүртэй маск нь 95 мянган төгрөгний үнэтэй бөгөөд шүүлтүүрийг 45 хоног тутамд солих шаардлагатай аж. Харин шүүлтүүр нь 35 мянган төгрөгийн үнэтэй. Өвлийн хугацаанд гэхээр багаар бодоход 4 удаа солих шаардлага гарч байна. Тэгэхээр жилд дунджаар утаанаас сэргийлэхийн тулд 235 мянган төгрөг зарцуулах шаардлагатай болж байгаа юм.

За больё ядаж дан маскыг нь тараая гэж бодоход сая таван зуун мянган хүнд үнэгүй тараахаар 150 гаруй тэрбум төгрөг шаардлагатай болно. Агаарын бохирдлыг бууруулах ажлын нэг жилийн төсөв. Бодоод байхад  үнэтэй зуух тарааж чадсан хүмүүст энэ боломжтой л зүйл. Ер нь эрүүл мэндээ хамгаалуулж л байвал надад бол дургүйцээд байх юм алга. Тараа, тараа.