Зам тээврийн ослын шалтгаан нь жолооч нарын ур чадвартай холбоотой болохыг ШӨХТГ-аас онцолж Замын цагдаагийн газартай хамтран жолооны курсуудад шалгалт хийхээ мэдэгдсэн. Шалгалтад нийслэл орон нутгийн нийт 150 курс хамрагдсан бөгөөд хангалтгүй дүн гарсан байна. Шалгалтаар жолооны курсын багш нарыг голчилж шалгасан бөгөөд хотын дүрэм зааж байгаа багш өөрөө дүрмийн шалгалтдаа унасан талаар ч эх сурвалж мэдээлж байна. Сурч буй хүмүүсээс авдаг 20 тестэд багш нь тал хувьд нь хариулж чадахгүй тохиолдол ч гарчээ.Харин орон нутагт сургалтын чанар харьцангуй гайгүй байгаа нь ажиглагдсан байна.

Ямартаа ч хэрхэн эдгээр тусгай зөвшөөрлийг цэгцлэх талаар ШӨХТГ-ын Хэрэглэгчийн эрхийг хамгаалах хэлтсийн дарга Ч.Батбаатараас хэдэн зүйл тодрууллаа.
-Монгол улсын нийслэлийн хэмжээнд жилд 500 орчим иргэн авто ослоор нас барж байна. Үүний 60 орчим хувь нь насанд хүрээгүй хүүхдүүд. Учир нь насанд хүрээгүй хүүхдүүд маань Замын хөдөлгөөний дүрэм, хууль зэргийн мэдлэг байхгүй. Тиймээс ч осол аваарт их өртдөг. Улмаар осол аваарын эх үүсвэр жолооны курсууд чанаргүй жолооч бэлтгэдэгтэй холбоотой хэмээн олон иргэдээс гомдол ирдэг.

Ингээд бид жолооны курсуудын сургалтын чанарт Замын цагдаагийн газартай хамтарч шалтгалт хийсэн.  Нийслэлийн хэмжээнд 1170 мэргэжлийн курсуудын багш нараас шалгалт авахад багш нар 20 асуултын 10-ыг алдаж байсан. Энэ нь жолооны курсуудын сургалтын чанар, багш нар ямар муу гэдгийг харуулж байна. Шалгалт авсан 1170 багшаас 350 нь дүрмийнхээ шалгалтанд унасан.  Улмаар жолооны курсуудын удирдлагын зүгээс багш нараасаа дахин шалгалыг авч өгөөч хэмээн гуйсан. Дахин шалгалт авахад 350 багшаас 150 нь давтан унасан. Эдгээр 150 хүний багшлах эрхийг хассан.

-Ер нь жолооны курсууд дээр цаашид ямар арга хэмжээ авах вэ?
-Жолооны курсууд өмнө нь 75 хувийн төгсөлттэй байсан. Гэвч үүнийг болиулсанаар янз бүрийн жолооны курс нэмэгдсэн. Тэгэхээр Замын цагдаа, манай хоёр ярилцаад жолооны курсуудын 75 хувийн төгсөлттэй байх шаардлагыг буцааж тавина. Мөн бүх жолооны курс 1982 онд гаргасан журмын дагуу үйл ажиллагаа явуулдаг байгаа. Энэ журманд механик хөдөлгүүртэй машин дээр заавал сургана гэсэн заалт байдаг.
Гэтэл манай хийсэн судалгаагаар Монгол Улсын хэмжээнд орж ирж байгаа нийт тээврийн хэрэгслийн 65 орчим хувь нь автомат хөдөлгүүртэй машин байдаг. Тэгэхээр жолооны курсуудыг автомат хөдөлгүүртэй машин хэрэглэх шаардлагыг тавина.