Нөөцийн мах  энэ сарын 25-наас худалдаанд гарна. Гэтэл мах нөөцлөх ажил 50 хувьдаа ч хүрээгүй гэсэн мэдээлэл гарсан. Үүнтэй холбогдуулан ҮХААЯ-ны Төрийн нарийн бичгийн дарга Х.Золжаргал мах нөөцлөх ажил яг ямар шатанд байгаатай өөрийн биеэр өчигдөр танилцахаар “Баатарууд тэнгэр” компанийн складын байранд очсон юм. Тэрбээр энэ үеэр “Энэ удаагийн шалгалтын зорилго нь нөөцийн мах бэлтгэж байгаа компаниуд үнэн бэлдээд байна уу, худлаа бэлдээд байна уу гэдгийг тогтоох  гэсэн юм" гэлээ.

“Баатарууд тэнгэр” компани нь складандаа одоогийн байдлаар 2500 тонн мах нөөцлөөд байгаагаа Төрийн нарийн бичгийн дарга Х.Золжаргалд үзүүлсэн.  Тус компанийн склад нийт 5000 тонн мах нөөцлөх хүчин чадалтай аж. Одоогийн байдлаар таван тэрбум төгрөгийн санхүүжилт авсан нь нийт санхүүжилтийн 20 хувь гэж тус компанийн ерөнхий захирал М.Цэцэгмаа хэлсэн. Түүнчлэн нөөцийн мах бэлтгэх ажлаа цаг тухайд нь хийгээд явахад “Худалдаа хөгжлийн” банкнаас орж, ирэх санхүүжилтэд ямар ч асуудал байхгүй гэдгийг онцолсон юм. Тиймээс энэ сарын 25 гэхэд бүх махаа бэлтгэж дууссан байх бөгөөд товлосон хугацаандаа худалдаанд гаргахад асуудалгүй гэдгийг ч хэлж байна лээ. Дашрамд дурдахад, нөөцийн нийт махны 50 хувь нь хонины мах, 35 хувь нь ямааны мах, харин 15 хувь нь үхрийн мах байх юм байна.

Х.Золжаргал: Ямаа махны арван хувь, үхрийн махны таван хувийг шулж, жижиглээд  хагас кг савлан худалдаалах гэж байгаа

    Энэ үеэр ҮХААЯ-ны Төрийн нарийн бичгийн дарга Х.Золжаргалаас цөөн асуултад хариулт  авлаа.
-Нөөцийн махны санхүүжилт ямар шалтгаанаар удааширсан вэ?
-Сертификат бичиж, пүүлж амжихгүй учраас удааширсан. “Баатарууд тэнгэр” ХХК  уржигдар сертификатаа  “Худалдаан хөгжлийн” банканд  өгсөн.  “Худалдаа хөгжлийн” банкныхан өнөөдөртөө амжаад санхүүжилтай хийнэ гэж байна.

-Нөөцийн махыг тарган туранхай байна гээд иргэд нэлээд шүүмжлэлтэй ханддаг. Энэ талаар?
 -Өнгөрсөн жилийн нөөцийн махны чанар сайн байсан.  Иргэдээс гомдол гарах тохиолдол байдаг юм. Тухайлбал, сав баглаа нь задарч унаж, яс махны процессын  алдагдсан зөрчил гарах тохиолдол байдаг. Өнгөрсөн жилүүдэд гарсан зөрчил дутагдлыг компаниуд газар дээр арилгаж байсан.
 
-Энэ жил нөөцийн маханд хэдэн  төгрөгийн санхүүжилт хийгдэж байгаа вэ ?
-Өнгөрсөн жил 87 тэрбум төгрөг төсөвлөсөн. Энэ жил 87 тэрбумаар төсөвлөсөн байгаа. Үүний 20 хувь нь арилжааны банкууд гаргаж байгаа. 80 хувийг Монгол банк гаргана.

-Нөөцийг махыг  хэдэн компани бэлтгэж  байгаа вэ?
- Зохион байгуулалтай дөрвөн  компани бэлтгэж байгаа. Эдгээр компаниуд өөрсдөө туслан гүйцэтгэгч компани авч ажиллуулж байгаа.

-Цул мах худалдаалагдана гэж байсан. Ямар малын мах цулаар худалдаалагдах вэ?
- Ямаа махны арван хувь, үхрийн махны таван хувийг шулж, жижиглээд  хагас кг савлан худалдаалах гэж байгаа. Энэ бол  энэ жилийн шинэ хэлбэр.  

–Энэ жил хичнээн тонн мах нөөцөлж байгаа вэ?
- Нийтдээ 140 мянган тонн махны нөөц бүрдүүлж ,худалдан борлуулна.

“Баатарууд тэнгэр” компанийн ерөнхий захирал М.Цэцэгмаагаас дараах зүйлийг тодрууллаа.

-Одоогоор хэдэн тонн мах бэлтгээд  байна бэ?
- Одоогоор 4300-4500 тонн мах бэлтгэчихсэн байгаа. Энэ нөөцийн махны 75 хувийг бэлдсэн гэсэн үг.

-Нөөцийн махыг үйлдвэрийн аргаар бэлдээгүй гэсэн асуудал гарч байгаа. Манайх хаана ямар үйлдвэрт бэлтгэж байгаа вэ?
- Дарханд өөрийнхөө үйлдвэрт  бэлтгэж байгаа. Манай компани Дархан хотод таван мянган тонн мах нөөцлөх складтай.  Өдөрт 400-500 бод, 200 мянган бог мал нядлах хүчин чадалтай. Үйлдвэр дээр нядлаад хадгалж байгаа. Одоо нийслэл рүү татах  ажиллагаа явуулж байна.

-Санхүүжилтэн дээр ямар нэг саад бэрхшээл байгаа юу?
- Санхүүжилтийн асуудал ямар ч бэрхшээлгүй. Компаниуд урьдчилаад 20 хувийн аваад бэлдчихсэн. Нийтдээ 26 тэрбумаас одоогийн байдлаар таван тэрбум төгрөг авчихсан байгаа. 

- Энэ жил хэдэн  төгрөгөөр худалдаалагдах вэ?
-Өнгөрсөн жилийн үнээр худалдаалагдана. Тухайлбал , үхрийн мах 5950, хонь 5750, ямаа, 4900 төгрөгөөр худалдаалагдана.

 -Худалдаанд хэзээнээс гарах вэ?
- Нөөцийн мах энэ сарын 25-ны өдрөөр худалдаанд гарна.

-Нөөцийн махны уут сав баглаа нь  ямар хэмжээтэй вэ?
-Ууцны уут гэж байгаа. Мөн 2.5- 3.5 кг ууттай хийгдсэн. Нөөцийн махыг уутыг “ОБ пластик” ХХК үйлдвэрлдэсэн.