МСҮТ-ийн үйл ажиллагаа, болон суралцагдад төрөөс олгодог тэтгэлэг нэмэгдсэн талаар Хөдөлмөрийн яам өнөөдөр мэдээлэл хийлээ. Улсын хэмжээнд 2013-2014 оны хичээлийн жилд мэргэжлийн боловсрол, сургалтын нийт 78 байгууллага үйл ажиллагаа явуулж байгаа бөгөөд тэдгээрт нийт 42461 оюутан суралцаж байна.
Тэдэнд өнөөдрийн байдлаар сар бүр 35 мянган төгрөгийн тэтгэлэг олгож байгаа юм. Тэгвэл энэ тэтгэлэгийг ирэх оны нэг сараас эхлэн хоёр дахин нэмэгдүүлж 70 мянга болгожээ. Ингэснээр суралцагчдын чанар сайжирна гэж үзэж байгаа юм байна.
Мөн Хөдөлмөрийн яам МСҮТ-үүд суралцагчдынхаа тоог буруу мэдээлж, Төрөөс илүү тэтгэлэг авдаг байдлыг таслан зогсоох зорилгоор судалгаа явуулжээ. Тухайлбал энэ хичээлийн жилд нийт 18981 суралцагч төгсөх ангид суралцаж байна. 2014 оны 01 дүгээр сард нийт 8837 суралцагч төгсөхөөс зарим нэг мэргэжлээр нь авч үзвэл гагнуурын мэргэжлээр, барилгын засал чимэглэлийн чиглэлээр 977, хүнд машин механизмын операторын мэргэжлээр 645 суралцагч тус тус суралцаж төгсөх аж. Цаашдаа энэ төрлийн судалгааг байнга хийж хяналт тавьж ажиллана гэдгээ энэ үеэр албаныхан хэлж байлаа.
Түүнчлэн Үндэсний мэргэжилтэй ажилчин бэлтгэх хөтөлбөр 2011 оноос хэрэгжиж эхэлсэн бөгөөд 2011, 2012 онууд тус бүр 3300, 2013 онд 6600 хүнийг мэргэжил эзэмшүүлэн хөдөлмөрийн зах зээлд гаргажээ. 2014 оны хувьд ч мөн адил үндэсний мэргэжилтнээр 6600 хүнийг бэлтгэхээр төлөвлөөд байна. Эндээс мэргэжил эзэмшээд гарсан бүх төгсөгчид 100 хувь ажлын байраар хангагддаг бөгөд суралцагчдыг насны тоог харгалздаггүйгээрээ онцлог юм. Өмнө нь тус хөтөлбөрийг бусад томоохон компаниудтай хамтран хэрэгжүүлж байсан бол ирэх оноос Хөдөлмөрийн яам дангаар эрхлэхээр болжээ.
