Жилийн эцсийн тайлан гаргах, ирэх оны төлөвлөгөө бичих, байгууллагынхаа баярыг төгс зохион байгуулах гээд чиний ажлын хуваарь ямар ч зайгүй байгааг мэдэж байна аа. Гэхдээ тэднийхээ завсраар энэ шинэ жилийг дээд зэргээр нь “enjoy” хийх, үдэшлэгтээ зориулж үзэсгэлэн гоогоо тодруулах “үйл ажиллагаа”-ныхаа хуваарийг бүү мартаарай, завгүй бүсгүй минь. Юунаас нь эхлэхээ бодох ч завгүй самгардаж байвал, бидний бэлдсэн төлөвлөгөөг өнөөдрөөс эхлэн дагах гээд оролд. Тэгвэл онцгой өдрөөрөө яарч сандрах тухгүй мэдрэмжийг амсахгүй.

25 хоногийн өмнөөс: Фитнесс төлөвлөгөөндөө эргэж орох

Цаг завнаасаа болоод төлбөрийг нь төлчихсөн клубээсээ түр чөлөө авчихсан байгаа бол одоо л нөөцөлсөн хоногуудаа ашиглах цаг. Хэрвээ тогтмол үйлчлүүлдэг фитнесс клуб байхгүй бол гэртэйгээ ойр, сайн багштай газар шинээр бүртгүүлэх юм уу орой бүр өөрийгөө дасгалжуулаарай. Шинэ жилээр бариу даашинз, платформ өсгийтөө өмсөхийн тулд чамд чанга хөл, харвингүй гэдэс, тэгш мөр гурав хэрэгтэй. Тийм учраас дугуй эсвэл цанын төхөөрөмжин дээр бие халаалт хийж хөлсөө гаргангаа хөл гарынхаа булчинг сайжруулах хэрэгтэй. Өдөр бүрийн 20 минутын идэвхтэй бие халаалтын дараа чиний хамгийн их хийх ёстой хоёр дасгал бол суниалт болон гэдэсний таталт. Ямар ч төхөөрөмж шаардахгүй хөдөлгөөнүүд байгаа биз? Тийм болохоор л өөрийгөө ч дасгалжуулж болно гэсэн юм. Бага байхад биеийн тамирын хичээл дээр дуртай дургүй хийдэг байсан дасгалууд гоо үзэсгэлэнд ийм чухал нөлөөтэй гэж хэн санах билээ дээ. 24 хоногийн турш өдөрт 30 таталт, 30 суниалт хийж, 15 минут дугуйгаар хичээллэвэл чамд шинэ жилийн үдэшлэгээр 5 см өсчихсөн юм шиг цаанаасаа л “өндөр” гоолиг мэдрэмж төрөх болно. Зураас нь тодорсон булчинлаг нарийхан, цулцаганах сул махгүй шилбэний гол ид шид чинь энэ шүү дээ.

3 долоо хоногийн өмнөөс: Хоолны дэглэмийн цэвэрлэгээ

Хүссэнээрээ идэж, уух эрхтэй өдрүүд ирж байна. Түүнээс биш, ам руугаа юм хийх тоолондоо гэмших өдрүүдийг яаж “баярынх” гэж нэрлэж болох вэ дээ. Оргилуун дарс тулгасан ч, гурван зүсэм бялуу идсэн ч, өмнөө байсан салат, үндсэн хоол хоёрыг цөмийг нь дуусгасан ч өөрийгөө буруутгахгүйн тулд одооноос зүгээр л жимс, хүнсний ногооныхоо хэрэглээг өсгө. Шинэ жилийнхээ баярын ширээг ч хэрхэн эрүүл, калори, өөх тос багатай мөртлөө амтлаг хоолнуудаар дүүргэхээ гэрийн эзэгтэйн үүргийнхээ дагуу одооноос тооцоол. Жишээ нь, нийслэл салатныхаа хиамны оронд тахианы чанасан мах хэрчиж хийгээд, амттанд таргаар зуурсан жимсний салат олгоход л зоогны чинь тал хувь нь хөнгөрчихнө.

10 өдрийн өмнөөс: Үсний шинэчлэлт

Шинэ үстэйгээ “учран золгосон”-ы дараа чамд учрыг нь олж сурахад хэдэн хоног лав шаардагдана. Тиймээс 2014 оныг химидсэн, өөр өнгөөр будуулсан, тайралтаа өөрчилсөн үстэй угтахаар шийдсэн бол түүнийгээ үдэшлэгээс 10 хоногийн өмнө төлөвлөөрэй. Шинэ үс чинь бүрэн чинийх болсны дараа түүнийгээ яаж янзлах нь ч бас чинийх болно.

7 хоногийн өмнөөс: Вакс

Хэрвээ тогтмол ваксддаг бол арьс чинь 3 долоо хоногийн турш тэснэ. Гэхдээ чиний зөрүүд үс авав уу үгүй юу цухуйгаад эхэлчихдэг бол энэ хоног хойшлоно гэдгийг санаарай. Ирэх долоо хоногт их ажил ундрах учраас эртхэн салонд цаг авахад буруудахгүй. Нэгэнт шинэ оноос өмнө илүүдэл бүхнээсээ ангижрах гэж байгаагаас хойш, хайрттайгаа өнгөрүүлэх онцгой үдэштээ зориулаад бикини ваксыг ч хийлгэчих. Дотуур хувцсаа өмссөн хойноо л өөртөө итгэлтэй болдог бүсгүй баймааргүй байгаа биз дээ?

5 өдрийн өмнөөс: Арьсны эмчилгээ

Сайн салонд орвол “баагий”-нуудын сорви 4 хоногийн дотор арилдаг учраас нүүрнийхээ арьсанд анхаарал хандуулах өдрөө урьдчилан тооцох хэрэгтэй шүү. Тогтмол үйлчлүүлдэг гоо сайханч дээрээ очоод гүн тэжээл өгөх тос болон нүх агшаах маск хоёрыг заавал хэрэглэхийг хүсээрэй. Хүйтэн агаар, утаа хоёр нүүрний чинь арьсыг ямар ч “амьгүй” болгочихсон байж магадгүй. Аль болох чийгээ удаан тогтоож, шинэ жилийн баяраар чамайг шүүдэр буусан юм шиг гялгар, эрүүл арьстай харагдуулах үйлчилгээг сонгоорой. Мөн спад орж биеийн арьсныхаа чилээг гаргахаа ч бас энэ өдөр, нэг дор хийлгэчихвэл амар. Хүчилтөрөгчин болон хуян тараалгах иллэг, арьс гуужуулах, тэжээл өгөх үйлчилгээнүүдийг санал болгож байна.

4 хоногийн өмнөөс: Хөмсгөө засуулах

Гоолингоочууд “Гоо хатан”, “Шүр”, “BDS”, “Londa” салонуудын гоо сайханчдыг “алтан гартай” гэж тодорхойлдог (Эх сурвалж: “Goolingoo” фейсбүүк групп) . Нумрах хэсгээ зөв тодорхойлуулж, сайхан хэлбэр гаргасан хөмсөг чиний нүүр будах цагийг тогтмол хоёр дахин хэмнэнэ гэсэн үг. Одооны төрх чинь нэг л сэтгэлд хүрдэггүй бол ганц удаа сайн засуулж, гоё будаад сурчихвал өөр юугаа ч будах хэрэггүй мэт л болно.

1 өдрийн өмнө: Маникюр, педикюр

Битүү гутал өмссөн цагаасаа эхлээд тоохоо больчихсон хөлийн хуруудаа нэг янзлуулах цаг болжээ. Шинэхэн будалт чинь 3 хоногийн дараанаас хуучирчихдаг учраас өмнөх өдөр нь л салонд цаг авах хамгийн сайн сонголт. Хиймэл хумс наалгахаас илүүтэй хэлбэрийг нь засуулах, мах, илүүдэл арьс зэргийг нь зөөлрүүлж аваад цэвэрхэн үзэмжтэй болгоход, шигтгээ хээ наалгахаас илүүтэй цаанаасаа гялгар тогтоцтой сайн будгаар будуулахыг зөвлөе. Тэгвэл шинэ жил өнгөрөөд хэд хоносон ч чи хумсандаа бүрэн дүүрэн сэтгэл хангалуун явсаар байх болно.

Тэр өдрөө: Боронзон арьс

Хувхай цагаан арьс цастай өдөр л сайхан харагддагийг мэднэ ээ. Эрүүл, туяарсан боронзон арьстай болохын тулд үдэшлэгээс өмнө биедээ борлуулдаг тос түрхээрэй. Гарын шууны доогуур, гуяны гадар болон дунд хэсгээр, шилбэнийхээ хоёр талаар түрхэж сүүдэртүүлвэл илүү өндөр, урт хөлтэй, бас туранхай мэт харагдуулна. Харин эгэмний доод хэсэг, хөхний дээд угалзаар түрхсэнээр дүүрэн мөртлөө ясархаг, дур булаам энгэр цээжийг бий болгоно. Мэдээж хацрын яс, шанааны доод хэсгээр түрхэж царайныхаа төрхийг тодотгоорой.

Бүх зүйл хуваарийн дагуу биз? Энэ шинэ жилд зориулж гоо сайхандаа ямар хөрөнгө оруулалт хийх гэж байгаагаа хуваалцаарай.