Хадгаламж зээлийн хоршооны хохирогчид Хууль зүйн яамны гадаа суулт зарлаж байна. Тэдний хохирлын 50 хувийг одоо хүртэл барагдуулаагүй байгаа бөгөөд хуулийн төсөл санаачилсан ч хэлэлцээгүй өнөөдрийг хүрсэн. Тиймээс 30 гаруй иргэн энэ асуудлыг яаралтай шийдэж өгөхийг хүсч Хууль зүйн сайд Х.Тэмүүжинд хандан ийнхүү суулт зарлаж байна.

   УИХ-аас Хохирлыг эргэн төлөгдөх нөхцөлөөр барагдуулах тухай хуулийг 2007 онд баталж, Засгийн газар хохирлыг барагдуулах журам тогтоосон. Энэ хүрээнд өнгөрөгч онуудад төсвөөс 36 орчим тэрбум төгрөг гарч 7397 хохирогчдод олгосон байдаг. Үлдсэн хохирлыг ирэх оны төсөвт суулгаж, барагдуулна гэж Ерөнхий сайд Н.Алтанхуяг хохирогчидтой уулзахдаа амлаж байсан. Мөн энэ хэргийг шийдүүлэхээр Хууль зүйн сайд Х.Тэмүүжингээр ахлуулсан ажлын хэсэг гаргахаар болсон ч сүүлийн үед сураг тасарсан юм.

Тэгвэл энэ талаар Хохирогчдын нэгдсэн холбооны гишүүн Х.Оюунцэцэгээс зарим зүйлийг тодрууллаа.

Тэрбээр “Өнгөрсөн жил Ерөнхий сайдтай уулзаад Засгийн газраас ажлын хэсэг гараад үнэхээр  төр нь буруутай, төрийн албан хаагч буруутай юм бол төр хариуцна гэсэн. Долоон жил бус долоон сарын хооронд асуудлыг шийднэ гэж тухайн үед хэлж байсан. Үүнээс хойш жил гаруй болж байна. Энэ хооронд Засгийн газрын ажлын хэсэг дээр Хууль зүйн яамны Их, дэд ажлыг зохион байгуулсан. Шүүхийн шийдвэрээс ч буруутай гэх 5-6 хүний АТГ-т шалгуулахаар болсон.  Гэтэл АТГ-т очсон хэрэг өдгөө юу болсон нь тодорхойгүй байна.  Уг нь цагдаагаас шүүхийн шийдвэрийн хооронд алга болсон хэдэн тэрбумын хөрөнгүүд нь тодорхой байгаа.  Их хэмжээний мөнгө, хөрөнгийг албаар үнэгүйдүүлсэн, хямд зарсан нь тогтоогдсон. Тэр бүү хэл дөрвөн давхар обьектийг зөвхөн нэг давхарынх нь квадрат метрээр тооцоод, танидаг хүндээ зарсан байдаг. Улмаар энэ бүхний дараа нэлээн хэдэн лиценз сэргээгдсэн. Ингээд бид 10-иад хувьд нь судалгаа гаргасан чинь 54 хүн нас барсан байсан. Мөн 300-400 хүн эмчийн байнгын хяналтанд ороод асар хүнд байдалд орсон байгаа. Түүнчлэн гэр бүл салж, үр хүүхдүүд өнчирж, хүмүүс архи тамхинд орсон гэх судалгаануудыг бид гаргасан. Гэтэл Ерөнхий сайд өнөөдөр төсөвт энэ хохирлын мөнгийг шингээгүй байна. Гурван байнгын хороо, хоёр УИХ-аар ороод, ажлын хэсгийн дүгнэлт гарсан. Ингэж асуудал шийдэгдэхийн даваан дээр Засгийн газар дээр мөнгө байхгүй,үлдсэн хөрөнгүүдийг хувь тэнцүүлэх юм ярьсан. Гэтэл долоон жилийн дараа үлдэж байгаа хөрөнгө өнөөдөр ямар байх уу. Ингэх л байсан юм бол тухайн үед нь үлдсэн хөрөнгүүдийг хувь тэнцүүлж өгөхгүй яасан юм. Одоо бол гэр нь л гэхэд өгөрчихсөн, машинууд нь төмрийн сэг болсон байна. Цагдаагаас ирэхдээ л тоногдоод ирсэн. 154 машин байсан хэрнээ одоо хэдхэн цөөхөн байгаа.Ийн мөнгөний ханш унасан хойно бүгдийг өгнө гэж Ерөнхий сайд олон түмэнд хэлчихээд  одоо болохоор үлдсэн хөрөнгийг нь хувь тэнцүүлнэ гэж Засгийн газарт чиглэл өгсөн сууж байдаг. Тэгэхээр би Шинэчлэлийн засгийн газар ард түмнээрээ элэг доог хийж, зовлон дээр нь улс төр хийж тоглосон. Эцэст нь бид МАН-руу дайрдаг бэлэн зэвгүүд л болж хувирсан. Юутай ч ирэх Лхагва гарагт энэ асуудлыг Байнгын хороо авч хэлэлцэнэ. Энэ үеэр би хэлэх үгээ шулуухан л хэлнэ” гэв.