“Прокурорын байгууллагаас 2011-2016 онд авч хэрэгжүүлэх үйл ажиллагааны хөтөлбөр”-т  ажилтнуудын нийгмийн асуудлыг дэс дараатайгаар шийдвэрлэх талаар тусгагдсан бөгөөд УЕПГ-аас энэ чиглэлээр тодорхой арга хэмжээнүүдийг авч хэрэгжүүлж байгаагийн нэг нь хотын А зэрэглэлийн бүсэд шинээр ашиглалтанд орж байгаа 112 айлын орон сууц юм.

Тэгвэл энэхүү орон сууцны түлхүүрийг албан ёсоор гардуулан өгөх нээлтийн үйл ажиллагаа боллоо. Тус арга хэмжээнд Улсын Ерөнхий Прокурорын орлогч Ц.Бямбацогт, Улсын Ерөнхий Прокурорын туслах Тамгын газрын дарга Б.Үнэнбат, Улсын Ерөнхий Прокурорын Тамгын газрын орлогч Ц.Дангаасүрэн, “Бүрд-Констракшн “ХХК ерөнхий захирал М.Батцэнгэл, “Бүрд-Констракшн “ХХК гүйцэтгэх захирал С.Наранхүү нар оролцсон юм.

Прокурорын байгууллага түүхэндээ анх удаа прокурор ажилчиддаа ийнхүү олон айлын орон сууцийг барьж ашиглалтанд өгч байгаа бөгөөд 7.1 тэрбум төгрөгийн төсөвт өртөг бүхий орон сууцыг барилгын “Бүрд-Констракшн “ХХК харьцангуй богино хугацаанд, чанарын зохих түвшинд барьж хүлээлгэн өгч байна.

 Энэхүү орон сууцны 1 м кв талбай нь харьцангуй хямд буюу 800000 төгрөгөөр тооцогдож баригдсан бөгөөд хамгийн бага талбай бүхий орон сууц нь 27,2 сая төгрөгийн, хамгийн  их талбай бүхий орон сууц нь 61,3 сая төгрөгийн үнэтэй болж байгаа нь зах зээлийн өнөөгийн нөхцөлд прокурор ажилчдын нийгмийн асуудлыг шийдвэрлэхэд дэмжлэг үзүүлсэн бодитой арга хэмжээ болж байна.

Энэхүү орон сууцанд прокурорын байгууллагад ажиллаж байгаа болон ажиллаж байсан бүх үеийн төлөөлөл болох прокурор, бичээч, үйлчлэгч, жолооч, туслах ажилтнуудад орж байгаагаараа онцлогтой.

Дашрамд сонирхуулахад эдгээр айлуудад бүгдэнд нь гал голомт нь өөдөө явахыг бэлэгдэж цахилгаан зуухыг тавьж өгч байгаа юм.