Үндэсний үүрэн телефоны оператор "Жи-Мобайл" компанийн үйлчилгээтэй холбоотой гомдол манайд ирлээ. Тус компаниас зарласан шинэ жилийн урамшуулал бүхий нэгжийн багцны мэдээлэл дутуу ирж байгаагаас хэрэглэгчид үйлчилгээгээ бүрэн авч чадахгүй байгаа аж.

    Тухайлбал, 5000 төгрөгийн нэгж нь 100 минут үнэгүй ярих эрх, 100 мессеж үнэгүй бичих эрхтэй. Гэсэн ч энэ 10 хоногийн хугацаатай юм байна. Харин хэрэглэгчдийн гар утсанд ирж байгаа мэдээлэлд 10 хоногийн хугацаатай гэдгийг бичээгүй байгаа аж. Тиймээс хэрэглэгчид 100 мессеж, 100 минутын яриа үнэгүй гэдэгт нь урамшин нэгж худалдаж авч байгаа ч 10 хоногийн дотор урамшуулал дуусна гэдгийг мэдэхгүй, төөрөлдөж байгаа гэж гомдол гаргасан иргэн хэллээ. Энэ талаар тус компанийн оператортой холбогдоход "Та худалдаж авахдаа хугацааг нь асуухгүй яасан юм?" гэж загнах шахуу хэлсэн байна.
      Манайд хандсан хэрэглэгч "Уг нь худалдаанд гаргаж буй үйлчилгээнийхээ тухай мэдээллийг "Жи-Мобайл" бүрэн өгөх ёстой. Түүнд нь түшиглэн иргэд үйлчилгээ авдаг. Би Сансарт байрлах төв салбараас нэгж худалдаж авахад надад шууд цэнэглээд өгсөн хэрнээ урамшууллын хугацаа нь хэлээгүй. Гар утсанд дахин, дахин ирж байгаа сурталчилгаанд ч 10 хоногийн тухай байхгүй.  Тиймээс урамшуулал нь 10 хоногийн хугацаатай гэдгийг мэдээгүй. Өнөөдөр гэнэт л яриа, мессежний эрх нь алга болсон байна. Ийм хугацаатай гэдгийг хэлэлгүй, 100 мессеж, 100 минутын ярианы эрхтэй гэдгээр нь хэрэглэгчдийг татаж, хуураад байгаа юм биш үү?" хэмээн гомдол мэдүүлсэн юм.