Агаарыг бохирдуулагч гол бодисын нэг нь хүхэрлэг хий. Хүхэрлэг хий нь түүхий нүүрсний шаталтаас үүсдэг. Хүхэрлэг хийн агууламж нь хүйтний улирал буюу 10 дугаар сарын 1-нээс 5 дугаар сарын 1-ний өдөр хүртэл галлагаатай үед эрс нэмэгддэг. Нийслэлийн агаарын чанарын албаны хэмжилтийн дүнгээр 1998-1999 оны хүйтний улирлаас эхлэн агаар дахь хүхэрлэг хийн агууламж  тогтмол өссөөр байна. 2008-2009 онд 10 дугаар сараас 4 дүгээр сар хүртэл хүхэрлэг хийн хоногийн дундаж агууламж хүлцэх хэм хэмжээнээс мэдэгдэхүйц  давж байжээ.

Хэмжилтийн 9 цэг тус бүр дэх өсөлт, бууралтыг дундажлан Улаанбаатар хотын агаарын чанарт гарч буй өөрчлөлтийг үнэлэхэд 2011-2012 оны хүйтний улиралд өмнөх оны мөн үеэс хүхэрлэг хийн агууламж 12.8%-аар их байсан байна.  Харин 2012-2013 оны хүйтний улиралд өмнөх оны мөн үеэс дунджаар 16.9%-аар бага байна. Энэ нь 2011-2013 онд Улаанбаатар хотын гэр хорооллын 122 086 айл өрх бүрэн шаталттай зуух хэрэглэсэнтэй холбоотой юм. Энэ өвөл 45 000 зуух хэрэглэгчиддээ очно.




Нийслэлийн чанарын албаны мэдээгээр, Улаанбаатар хотын агаар дахь азотын давхар ислийн агууламж 1997 оноос хойш тасралтгүй нэмэгдсээр байна. 2012-2013 оны хүйтний улиралд агаар дахь азотын давхар ислийн агууламж өмнөх оны мөн үеэс дунджаар 9.5%-иар их байна.


Азотын ислүүд нь төрөл бүрийн шаталтаас (өндөр температур дахь шаталтын явцад илүү их ялгардаг) агаарт ялгарах бөгөөд гол эх үүсвэр нь цахилгаан станц, уурын болон ус халаах зуух, томоохон суурин эх үүсвэр, автотээврийн хэрэгслүүд болдог. Эдгээрээс сүүлийн үед маш ихээр нэмэгдэж буй автотээврийн хэрэгсэл азотын давхар ислийн агууламжийг маш ихээр нэмэгдүүлж байна. Ялангуяа төвлөрөл ихтэй авто замуудын орчимд азотын давхар ислийн агууламж агаарын чанарын стандарт  дахь хүлцэх хэм хэмжээнээс давах тохиолдол байнга ажиглагдаж байна.