Өсвөр насны хүүхдүүд гэлтгүй бага насны хүүхдүүд нэг хэсэг PC-нд донтож асуудал тарьж байсан. Тэд өдөр, шөнөгүй нойр, хоолгүй тоглож тухайн тоглоом дотроо амьдардаг. Мэдээж нойр хоолыг умартаж байгаа хүмүүс арын амьдрал, хичээл номоо ч мартах нь наад захынх. Ийн тоглоомонд донтсон хүүхдэд үзүүлэх хор нөлөөг буруулахын тулд, хүүхдийг аймшигт аюулаас сэргийлэхийн тулд оройн цагаар PC тоглоомын газруудыг хүртэл хааж байсан ч далд байдлаар хүүхдүүд өнөөх донтолдоо даамжируулсаар байгаа.

    Гэтэл PC тоглоомноос гадна хүүхэд, залуусыг  "айхтар" донтуулдаг бас нэгэн "аюул" гараад ирлээ. Энэ бол Фэйсбүүк. Ер нь ямарваа нэг зүйлд донтож, хэт их автана гэдэг мах их сөрөг нөлөөг авчирдаг. Өөрөөр хэлбэл бодол сэтгэхүйгээс нь гардаггүй гэх энэ донтолт нэг үгээр хэлэхэд сэтгэцийн өвчин юм.

  Тиймээс ямар ч хүн өөрийгөө аливаа зүйлд нэвт шингэж, бүр сүүлдээ донтох тохиолдлоос сэргийлж чаддаг байх хэрэгтэй. Нийслэлийн цагдаагийн газар болон Сурагчдын холбооноос "Фэйсбүүк донтолт"-ыг бууруулахын тулд сургуулийн ойр орчимд  WI FI байрлуулахыг эсэргүүцэж эхэлж байгаагаа дуулгав. Учир нь WI FI-тай сургуулийн хүүхдүүд хичээлээ бус фэйсбүүк хийж байна гэнэ. Ингэснээр тухайн хүүхэд хичээлдээ эрс муудаж, улмаар гэмт хэрэгт холбогдох, өртөх тохиолдлыг ихэсгэж байгаа аж.

    Энэ сэдвийн хүрээнд Сурагчдын холбооны тэргүүн О.Сэлэнгээс зарим зүйлийг тодруулахад " Хүүхдүүд фэйсбүүкт донтож байна. Донтогсод улам бүр нэмэгдсээр байгаа нь биднийг түгшээж эхэллээ. Фэйсбүүк донтогсод өдгөө бүр онлайн болзоо ихээр хийх болсон. Өөрөөр хэлбэл интернетийн орчноор дамжуулж хэн нэгэнтэй танилцаж, тэр хүнтэйгээ уулзсанаар элдэв гэмт хэргийн золиос болох, ашиглуулах байдал  гарсаар байна. Үүнийг бид сургуулийн эргэн тойронд байгаа утасгүй интернетийн WIFI сүлжээнээс болж байна гэж үзэж байгаа. Хүүхдүүд хичээл дээрээ хичээл хийх биш бүгд гар утсаараа интернетээр аялж байна. Улмаар интернетээс элдэв төрлийн мэдээлэл, тэр дундаа садар самуун сурталчилсан, задгай мэдээллийг ямар ч цензургүйгээр хүлэээ авдаг.  Тиймээс цаашид сургуулийн орчин дахь WIFI системийн байхгүй болгох тал дээр манай сурагчдын холбоо бусад байгууллагуудтай хамтарч ажиллах болно" гэв.