Ер нь нийслэлд цэцэрлэг, сургуулийн хүртээмж маш муу байдгийг хэн хүнгүй л мэднэ. Гэтэл 200 орчим хүүхдийн багтаамжтай цэцэрлэгийг баар, караоке болгосон талаарх мэдээллийг бид хүргэж байсан.  Тодруулбал, Чингэлтэй дүүргийн  II хороонд  байрлах Улсын тэргүүний хоёрдугаар цэцэрлэгийн байрыг баар цэнгээний газар болгосон юм. Одоогоор тухайн цэцэрлэгийн гадна хоёрдугаар цэцэрлэг гэсэн хаяг бус   “Like karaoke”  гэх хаяг хадчихсан байгаа билээ.  Үйл ажиллагаа нь зогсож, баар  болох гэж байгаа тус цэцэрлэгийн урд  хүүхдүүдийн тоглодог тоглоомын талбай ч яг л хэвээрээ байж байх жишээний.

Монголын үйлдвэрчний эвлэлээс өнгөрсөн наймдугаар сарын 10-ны өдөр  МҮЭ-үүдийн холбооны өмчлөлийн 400 ам метр талбай  бүхий цэцэрлэгийн барилгыг бүхлээр түрээслэх гэрээг  “Хас өргөө транс” ХХК-тай  байгуулжээ. Энэхүү гэрээний хугацааг ирэх 2016 оны тавдугаар сарын 1-ний  өдөр хүртэл түрээслэхээр болсон байна.
 Тус цэцэрлэгийн байр 1960 онд ашиглалтад орж байсан аж.

 МҮЭХ-ны Санхүү, аж ахуй, хөрөнгө оруулалт хариуцсан мэргэжилтэн  Н.Энхманлайгаас  тухайн цэцэрлэгтэй холбоотой зарим зүйлийг тодрууллаа.

-Чингэлтэй дүүргийн II  хороонд байрлах хоёрдугаар цэцэрлэгийн үйл ажиллагаа хэзээнээс зогссон бэ?
- Энэ цэцэрлэг манай өмчлөлийн газар юм. Чингэлтэй дүүргийн мэргэжлийн хяналтын газраас дүгнэлт  гарч цэцэрлэгийн үйл ажиллагааг нь  зогсоосон. Үйл ажиллагаа нь зогсоод арван жил болж байгаа.  Үүнээс хойш  агуулахын  зориулалтаар ашиглаж байсан юм.

-Арван жилийн өмнө үйл ажиллагааг нь зогсоосон гэж байна. Энэ хугацаанд сэргээн засварлаад цэцэрлэгийн үйл ажиллагаа явуулж болоогүй юм уу?
-Би энэ асуудлыг мэдэхгүй. Тухайн үед шийдвэр гаргасан хүмүүс  мэдэх байх.

-Мэргэжлийн хяналтын газрын дүгнэлт гарч  үйл ажиллагааг нь зогсоочихсон байхад, яагаад одоо баар цэнгээний газар ажиллуулж байгаа юм бол?
-Сургуулийн байруудад  дүгнэлт гаргахдаа тухайн  барилгыг  зориулалтаар нь ашиглаж болохгүй  гэж гардаг.  Үүнийхээ дагуу гарсан байх. Энэ байрыг хөлдөөхгүй гэсэндээ л түрээслэсэн юм.  

-Хэзээнээс түрээслэв?
- Өнгөрсөн наймдугаар сараас “Хас өргөө транс” ХХК -д  түрээслэх гэрээний ажил хийгдсэн. Нэг жилийн гэрээ байгуулан ажиллаж байгаа.

-Гэрээ нь гурван жилийн хугацаатай хийгдсэн юм биш үү?
-Үгүй. Ирэх оны тавдугаар сарын  1-нд гэрээний хугацаа дуусна.

-Хэдэн төгрөгөөр түрээслэсэн бэ?
-Түрээсийн төлбөр хэлэх боломжгүй. Ирэх оноос шинэ бүтээн байгуулалтын ажил хийгдэнэ.  Өнгөрсөн 2012 онд МҮЭХ-ны  ерөнхий зөвлөлөөс шинэ бүтээн байгуулалтын төлөвлөгөө  батлаж гаргасан  байгаа.  Ирэх жилийн тавдугаар сараас шинэ бүтээн байгуулалтын ажил тухайн газар хийгдэнэ. Тодруулбал, ирэх оны дөрөв, тавдугаар сараас хийгдэж эхлэнэ.  Үйлчилгээ төв офисс, цэцэрлэгийн чиглэлийн барилга  баригдана. 

МХЕГ-аас гаргасан шаардлагын дагуу тухайн цэцэрлэгийг хаасан хэмээн албаныхан хэлж байна. Тиймээс МХЕГ-аас эл цэцэрлэгийг ямар учраас хаасан, дахин ямар нэг аргаар ашиглах боломжтой эсэхийг нь лавлах гэсэн боловч хариулт өгөх боломжтой мэргэжилтэн олдоогүй юм.

Юутай ч дүүргийн хэмжээнд цэцэрлэгийн насны 13110 хүүхэд байдаг аж. Үүнээс 4915 хүүхэд цэцэрлэгт хамрагдаж чадахгүй байгааг хорооны ажилчид онцолж байв.

Дашрамд хэлэхэд, Төрийн өмчийн газарт баар цэнгээний газар нээх гэж байгаа “Хас өргөө транс” ХХК-ийн үндсэн үйл ажиллагааны  чиглэл нь “Автомашины ачаа тээвэрлэх, аялал жуулчлал, гадаад худалдаа” явуулдаг аж.