Тээврийн прокурорын газар, Замын цагдаагийн газартай хамтарсан зөвлөгөөнийг 2013 оны 12-р сарын 10-ны өдөр зохион байгуулсан байна. Зөвлөгөөнд тус газрын прокурорууд Замын цагдаагийн газрын Эрүүгийн хэрэг бүртгэх мөрдөн байцаах хэлтсийн мөрдөн байцаагч, хэрэг бүртгэгч, Шуурхай удирдлагын хэлтсийн жижүүрийн мөрдөн байцаагч нар оролцож  2013 онд гүйцэтгэсэн ажлууд, тэдгээрийн үр дүнд дүгнэлт хийж цаашид хамтран авч хэрэгжүүлэх ажлуудаа тодорхойллоо.

Зөвлөгөөнд тус прокурорын газраас, хэрэг бүртгэгч мөрдөн байцаагч нарын саналыг прокурорууд хүчингүй болгосон, өөрчилсөн түүнчлэн шүүхээс нэмэлт ажиллагаа хийлгэхээр буцаасан цагаатгасан эрүүгийн хэрэгт хэрэг бүртгэлт, мөрдөн байцаалтыг дутуу явуулсан, хуулийн заалт, шаардлагыг зөрчсөн зөрчилд дүн шинжилгээ хийсэн судалгааг танилцуулж хэрэг бүртгэгч мөрдөн байцаагч нарт цаашид анхаарч ажиллах асуудлуудын талаар хэлэлцжээ.

Түүнчлэн зам тээврийн осол, хэрэг буурахгүй байгаа шалтгаан нөхцөл, бууруулах арга зам, явган зорчигч нарыг Замын хөдөлгөөний дүрмийн заалтыг хэрэгжүүлдэг болгох, замын осол, хэрэг бүрт замын нөхцөл байдал нөлөөлсөн эсэхийг анхаарч шалгуулах, осол, хэрэг гарахаас урьдчилан сэргийлэх чиглэлээр тодорхой ажлуудыг хамтран хийхээр шийдвэрлэжээ.

 Тухайлбал,  явган зорчигч нарт “Замын хөдөлгөөний дүрэм”-ийн 3.4 дэх хэсэгт заасан “Явган зорчигч нь явган хүний  гарц буюу гармаар зам хөндлөн гарна. Хэрэв үзэгдэх хүрээнд явган хүний гарц буюу гарам байхгүй бол замын дагуу 2 тийш сайн харагдах саадгүй хэсгээр ойртон ирж  яваа тээврийн хэрэгслийг өнгөрүүлж хөндлөн гарна” гэсэн үүргийг хэрэгжүүлж хэвшүүлэх үүднээс хэвлэл мэдээллийн хэрэгслээр сурталчилан ойлгуулах арга хэмжээ авах,  энэ үүргээ биелүүлээгүйгээс хохирсон явган зорчигчид жолооч хохирол төлдөг буруу тактикийг халах, осолд хүргэхгүй байх замын нөхцөл байдлыг хариуцах үүрэг бүхий газруудаар холбогдох арга хэмжээ авахуулах ажлуудыг хамтран зохион байгуулхаар хэлэлцэн тохирчээ.