Монголын анхны “Архигүй” клуб нээлтээ хийжээ. Алга ташилт.

Манай улсын насанд хүрсэн хүн амын 40-өөд хувь нь архинаас шууд хамааралтай болчихсон энэ үед ийм газар  туйлын хэрэгцээтэй  гэдэгтэй хэн ч маргахгүй. Залуус архи тамхигүйгээр баяр ёслолыг тэмдэглэж чөлөөт цагаа зөв боловсон өнгөрөөх нь байна шүү дээ.

Сонирхол хөдлөөд нээлтэнд оролцлоо. Ихэвчлэн залуучууд орох учраас сонирхолтой интерьер дизайны шийдэл, элдэв гэрэл чимэглэл зэргийг битүүхэндээ би энэ клубээс харахыг хүсэв. Учир нь архи, тамхины төрлийн зүйл зарахгүй зөвхөн ус, ундаагаар үйлчлэх клубт үүнээс өөрөөр яаж үйлчлүүлэгчээ татах нь эргэлзээтэй.

Клубт оронгуутаа би зогтусав. Ойролцоогоор 100-150 хүний багтаамжтай гоц гойд юмгүй, энгийн гэхэд хэтэрхий энгийн клуб байлаа. Танхимын захаар бараан өнгийн буйдангууд байх ба буйдангийн наагуур дугуй ширээ эгнүүлэн зассан байв. Хоймортоо “Залуус 21” хэмээн нэрээ хадсан жижгэвтэр тайзтай. Клубын барилга хоёр давхар бөгөөд дээд давхартаа мөнөөх “Эрүүл идэвхтэй амьдралын клуб”-ынхан суух хоёр тасалгаа, мини фитнесс, номын сан, буфет зэрэг нь байрлажээ.  Яарч сандран, эхний ээлжинд гаргасан гэх цэсэнд нь ямархуу идээ ундаа багтсаныг товчхон дурьдвал жүүс, рашаан, сүү, төрөл бүрийн кофе, ундаа зэрэг байх юм.

Голох сэтгэл төрсөндөө ч тэр үү? хэн, хэдэн төгрөгөөр санхүүжүүлсэн нь надад сонин санагдав. Энэ талаар асууж сураглахад ердөө л  Шинэчлэлийн Засгийн газрын дэмжлэг, Эрүүл мэндийг дэмжих сангийн санхүүжилтээр гэдэг  мэдээлэл олдсон юм. Яг хэдэн төгрөгний санхүүжилт хийснийг лавлан асуухад хариулах хүн үнэндээ байсангүй.

Тэгвэл Эрүүл мэндийг дэмжих сан хаанаас эх ундаргаа авдагийг сонирхоё. Засгийн газрын тусгай сангийн тухай хуулийн 21.1.-т зааснаар тус сангийн хөрөнгө нь  улсын төсөв, гадаадын зээл тусламж болон тамхины онцгой албан татварын 2 хувьтай тэнцэх хөрөнгөөс  бүрддэг аж.  За яах вэ хэний халааснаас гарч байгаа нь сонин биш гэж бодоход нүглийн нүдийг гурилаар хуурсан нь хамгийн сонин.

Саяхан батлагдсан "Архигүй цэнгээний газар ажиллуулах журам"-д архи согтууруулах ундаагаар үйлчлэхгүйгээр хүүхэд залуучуудын сонирхлыг татахуйц өвөрмөц тохижилт үйлчилгээтэй, залуучуудын бүжиглэх талбайтай гэх зэргээр нүдэнд дурайтал зааж өгсөн байна. Гэтэл Ерөнхий сайдын шоуны нэгээхэн хэсэг болсон "Залуус 21"-д хүний анхаарал татчихмаар нэг ч зүйл байгаагүй нь цаанаа л сэтгэл гонсоймоор. Надад бүр аль нэг яам, агентлагийг барьсан бол яаж барих бол гэж бодогдсон гээч. Одоохондоо ч яахав шинэ жил, баяр ёслол дөхөөд хэд гурван үйлчлүүлэгч байх л байх. Гэхдээ цаашид үйлчлүүлэгчээ хэрхэн татах вэ гэдэг нь хамгийн эргэлзээтэй клуб "Залуус 21" болчихоод байна.