Нийслэлийн төвийн зургаан дүүрэгт байрладаг 10 хүнсний зах, худалдааны төвд хийсэн 32 нэр төрлийн хүнсний бараа бүтээгдэхүүний үнийн энэ сарын хоёрдугаар долоо хоногийн ажиглалтаар өмнөх долоо хоногоос 15 нэрийн барааны үнэ тогтвортой, нэг нэрийн барааны үнэ буурсан, 16 нэрийн барааны үнэ өсчээ. Энэ долоо хоногийн ажиглалтаар хонины ястай нэг килограмм мах дунджаар 6711 төгрөг, үхрийн ястай мах нэг килограмм нь дунджаар 7756 төгрөгийн үнэтэй байна. Үхрийн ястай мах өмнөх долоо хоногтой харьцуулахад 1.5 хувиар буюу 112 төгрөгөөр, үхрийн цул мах 0.6 хувиар буюу 55 төгрөгөөр өссөн байлаа. Энэ долоо хоногийн ажиглалтаар үхрийн мах “Хүчит Шонхор”, “Макс” хүнсний захуудад хамгийн хямд буюу 7000 төгрөг, “Меркури” хүнсний захад хамгийн өндөр үнэтэй буюу 9500 төгрөг байна. Нийслэлийн хүнсний томоохон зах, дэлгүүрт “Алтан тариа” савласан гурилын үнэ дээд зэрэг нь 1000-1300 төгрөг, 1-р зэргийнх 700-900 төгрөг, 2-р зэргийнх 500-800 төгрөг байна. Худалдан авагч олон байдаг “Хүчит шонхор”, “Таван эрдэнэ”, “Бөмбөгөр”, “Баянзүрх”, “Хархорин” хүнсний захуудад задгайгаар буюу шуудайгаар худалдаж буй дээд зэргийн “Алтан тариа” гурилын үнэ 1000-аас 1100 төгрөгийн үнэ ханштай байна. Харин “Барс” хүнсний захад нэг кг дээд зэргийн “Алтан тариа” гурил 950 төгрөг, 1-р зэргийн гурил 650 төгрөгөөр тус тус зарагдаж байна. “Атар” талх хүнсний зах, дэлгүүрт 800-900 төгрөгийн үнэтэй байна. “Бөмбөгөр”, “Барс”, “Хар Хорин” хүнсний захуудад “Атар” талхыг хамгийн хямд буюу 800 төгрөгөөр, харин “Меркури” хүнсний захад хамгийн өндөр үнээр буюу 900 төгрөгөөр худалдаалж байна. Өмнөх долоо хоногтой харьцуулахад монгол манжин 6.2 хувиар буюу 100 төгрөгөөр буурч, харин бусад хүнсний ногооны үнэ тогтвортой байлаа гэж Нийслэлийн Статистикийн газраас мэдээллээ.