Улсын Ерөнхий прокурор, Татварын Ерөнхий газрын даргын 2012 оны 4/32/04 дугаартай хамтарсан тушаалаар батлагдсан “Прокурорын байгууллага, Үндэсний татварын албаны хамтран ажиллах журам”-ын 5.1 дэх хэсэгт зааснаар аймгийн Прокурорын газар нь тухайн нутаг дэвсгэрт харъяалагдах татварын байгууллагатай хамтран нэгдсэн зөвлөгөөнийг жилд 1 удаа зохион байгуулахаар заасны дагуу тус аймгийн Прокурорын газраас санаачлан 2013 оны 12 дугаар сарын 09-ний өдөр “Прокурорын газар, Татварын хэлтсийн хамтын ажиллагаа, татварын хууль тогтоомж зөрчсөн захиргааны зөрчлийн хэрэг бүртгэлтийн ажиллагааны чанар, цаашид авах арга хэмжээ” сэдэвт нэгдсэн зөвлөгөөнийг нийт прокурорууд, татварын улсын байцаагч нарыг оролцуулан зохион байгуулсан байна.

             Зөвлөгөөнд аймгийн Прокурорын газрын орлогч прокурор Ч.Баярцэнгэлээс “Татварын улсын байцаагч нараас захиргааны зөрчлийн хэрэг бүртгэлтийн ажиллагаа явуулахад анхаарах асуудал” сэдвээр, аймгийн Татварын хэлтсийн Төрийн захиргаа, хууль зүйн тасгийн дарга Д.Мөнх-Эрдэнээс “Татварын байгууллага, Прокурорын байгууллагын хамтын ажиллагаа, цаашид анхаарах асуудал” сэдвээр тус тус илтгэл хэлэлцүүлж, зөвлөгөөнд оролцогчдын санал, шүүмжлэлийг сонсож, цаашид анхаарвал зохих асуудал, авч хэрэгжүүлэх арга хэмжээний талаар зөвлөлджээ.

             Уг зөвлөгөөнд аймгийн прокурор Б.Одхүүгээс татварын хууль тогтоомж зөрчсөн захиргааны зөрчлийг илрүүлэх, шалгаж шийдвэрлэх ажиллагаанд нотлох баримтыг хэрхэн цуглуулж бэхжүүлэх, мөн татварын улсын байцаагчийн акт, дүгнэлтийг хэрхэн бичих талаар заавар, чиглэл өгч, цаашид захиргааны зөрчлийн хэрэг бүртгэлтийн ажиллагаанд тавих хяналтын чиглэлээр аймгийн Прокурорын газраас баримтлах бодлого чиглэл, анхаарах асуудлын талаар танилцуулсан байна.

             Уг зөвлөгөөнөөс гарсан шийдвэрийн хүрээнд аймгийн Прокурорын газраас  татварын улсын байцаагчаас захиргааны зөрчлийн хэрэг бүртгэлтийн ажиллагаа явуулахад анхаарах асуудлын талаар зөвлөмж боловсруулаад байна.