Дөнгөж сая МУИС-д Ардчилалыг сэргээх түр хорооны гишүүд мэдээлэл хийлээ.

Хэвлэлийн бага хурлын эхэнд тэд багш нар бүтцийн шинэчлэлийг эсэргүүцээгүй харин шинэ удирдлагууд үгсэн хуйвалдаж бүтцийн өөрчлөлт нэртэйгээр санхүү болон удирдлагыг нэгээс хоёр хүний гарт төвлөрүүлэх гэж байгааг эсэргүүцэж байгаа гэлээ.

МУИС-ын зургаан салбар сургуулийн 30 гаруй багш нарын байгуулсан "Ардчилалыг сэргээх түр хороо"-ноос өмнө нь шаардлага хүргүүлэхээс авахуулаад жагсаал цуглаан хүртэл зохион байгуулж байсан. Харин энэ удаад тэд  МУИС-ын бүрэлдэхүүн сургуулиудад “Захирал А.Галтбаяр түүний удирдлагын багт итгэл үзүүлэх эсэх” талаар санал асуулга явуулсан байна. Санал асуулгыг өчигдөр 12.00-14.00 цагийн хооронд явуулсан бөгөөд орон нутгийн Завхан Орхон зэрэг аймагт байгаа бүрэлдэхүүн сургуулиуд хамрагдаж чадаагүй аж. 

Судалгаанд 553 багш ажилчид хамтрагдсан нь нийт МУИС-ын багш ажилчдын 38,3 хувь болж байгаа юм. Үүнээс нийт санал өгсөн багш ажилчдын 19,8 хувь нь итгэл үзүүлнэ гэсэн бол 80,2 хувь нь үзүүлэхгүй гэсэн саналыг өгчээ.

Түүнчлэн тэд энэхүү судалгааныхаа дүнг өнөөдөр өглөө МУИС-ын захирал А.Галтбаярт танилцуулсан юм байна.

Цаашид түр хорооны шаардлагуудыг хүлээж авахгүй энэ хэвээр байх аваас тэд бусад холбоод ТББ-уудтай хамтарч ажиллан үйл ажиллагаагаа улам эрчимжүүлнэ гэдгээ энэ үеэр мэдэгдэж байлаа.