Гаалийн Ерөнхий Газарт 2013 оны 12 дугаар сарын 18 өдөр шинэ залуу 43 гаалийн улсын байцаагчдын ТАНГАРАГ өргөх ёслолын арга хэмжээ зохион байгуулагдлаа.

Уг үйл ажиллагаанд ГЕГ-ын дарга О.Ганбат болон бусад удирдлагууд оролцсон юм.

              “Гаалийн улсын байцаагч би, Монгол Улсын тусгаар тогтнол, эдийн засгийн аюулгүй байдлыг хангахын төлөө үнэнчээр зүтгэж, гаалийн хяналт, бүрдүүлэлт хийхдээ хууль, шударга ёсыг дээдлэн, гаалийн улсын байцаагчийн ёс зүйн хэм хэмжээг чанд сахиж, хэний ч нөлөөнд үл автахаа батлан тангараглая. Өргөсөн тангарагаас няцвал төрийн хуулийн хариуцлага хүлээнэ” хэмээн тангарагласан эдгээр шинэ залуу байцаагчид нь 2013 оны 08-р сард ГЕГ-аас зохион байгуулсан “Нээлттэй сонгон шалгаруулалт”-аас шалгарсан бөгөөд ГЕГ-ын дарга О.Ганбат тангараг өргөсөн шинэхэн гаалийн улсын байцаагч нарт хандан: Монгол улсын эдийн засгийн аюулгүй байдал, төр ард түмнийхээ төлөө үнэнч шударгаар ажиллахаа амлаж, тангараг өргөсөн Гаалийн улсын байцаагчдад баяр хүргэе, Та бүхэн бол Монгол улсын Төрийн тусгай алба болох Гаалийн албаны нэр хүндийг өндөрт өргөн ажиллах, сэвтээгүй цэвэр ариун сэтгэлгээ бүхий төрийн албан хаагчид юм. Та бүгдэд маш өндөр үүрэг хариуцлага, итгэл хүлээлгэж байгааг уламжлан хэлэхийн ялдамд гаалийн шинэчлэлийг эхлүүлэх анхны томоохон хүч бол та нар юм шүү хэмээн тодотгоод авилгал, хээл хахууль, ажлын доголдол, аливаа зөрчлийг таслан зогсоох томоохон шинэчлэлийг бид Монгол улсын үүд хаалга болсон Замын-Үүдийн боомтоос эхлүүлэн хийж буй үйл ажиллагааны элч төлөөлөгч та бүхэндээ ажлын өндөр амжилт хүсье хэмээн баяр хүргэлээ. Эдгээр гаалийн улсын байцаагчдыг Гаалийн байгууллагын удирдлагаас шинэчлэлийн бодлогын хүрээнд бүгдийг нь ГЕГ-ын харьяа Замын-Үүдийн гаалийн газарт томилон ажиллуулж байгаа бөгөөд өндөр итгэл найдвар хүлээлгэж байгаад баяртай байна.