Сүүлийн үед олны анхаарлыг ихээр татаад байсан МҮОНТ-ийн захирлаар Улсын Их Хурлын Хэвлэл мэдээлэл олон нийттэй харилцах хэлтсийн дарга Д.Энхтуяа  томилогдлоо. Тэрээр “NTV” телевизийн мэдээ, шуурхай нэвтрүүлгийн албаны даргаар ажиллаж байгаад УИХ-ын Тамгын газрын Хэвлэл мэдээлэл олон нийттэй харилцах хэлтсийн даргаар томилогдон ажиллаж байсан Хэвлэл мэдээллийн туршлагатай ажилтан юм.

Өнөөдөр МҮОНРТ-ийн удирдах зөвлөл хуралдаж уг асуудлыг шийдвэрлэсэн байна. Мөн МҮОНТ-ийн захирал асан Ч.Даваабаярын гомдолыг хэлэлцжээ. Өнгөрсөн сарын 18-нд МҮОНТ-ийн 150 гаруй уран бүтээлчдийн гарын үсэг бүхий “Ч.Даваабаяр нь сонирхлын зөрчилөөр ажилдаа ханддаг. Хувийн реклам сурталчилгаагаа олон нийтийн телевизээр цацдаг. Удирдан зохион байгуулах чадвар дутмаг” гэсэн  өргөх бичгийг Үндэсний зөвлөлдөө хүргүүлсэн юм. Харин Ч.Даваабаяр нь өөрийг нь гүтгэж, нэр төрд нь халдсан хэмээн Үндэсний зөвлөлдөө гомдол хүргүүлж, шүүхэд хандсан юм. Тэрбээр "Нэр бүхий хэдэн нэгдлийн дарга нар өөрсдийнх нь булхай илэрхээс айж намайг ажлаас халуулсан. Тиймээс би тэднийг бас холбогдох хүмүүсээр шалгуулна. Үндэсний зөвлөл ч тэднийг шалгах ёстой. МҮОНТ-д аудитын шалгалт оруулах хэрэгтэй" гэсэн юм.