Уржигдар болсон Архангай аймгийн шинэ жилийн баяр дээр  дэлхийд алдартай “АББА” хамтлаг ирж дуулсан гэх мэдээлэл цахим ертөнцөд дуулиан тарьж байна. Гэхдээ энэ хэр бодитой мэдээлэл вэ гэдэг нь бас л олныг эргэлдүүлэхэд тулав. Тэгвэл уг шинэ жилийн цэнгүүнд “АББА” хамтлаг ирж дуулаагүй гэдгийг юун түрүүнд хэлье. Харин  тус хамтлагийн ковер буюу “АББА”-г дууриадаг хамтлаг ирсэн юм.

Уг шинэ жилийн баярыг Эдийн засгийн хөгжлийн яамны сайд, аймгийн нутгийн зөвлөлийн дарга Н.Батбаяр зохион байгуулж, санхүүжүүлсэн. Тэрбээр аймгийнхаа шинэ жилийн баярыг 200 гаруй сая төгрөгөөр нижгэр зохион байгуулсан бөгөөд “АББА”-ийн оригналь хувилбарын хөлсөнд гэхэд л 30 орчим мянган евро төлсөн бол бусад зардалд мөн хэмжээний мөнгө зарлагдсан аж. Уг хамтлагийг урихын тулд Н.Батбаяр сайдын охин хамгийн их үүргийг гүйцэтгэжээ. Учир нь түүний охин тус хамтлагийг олж, урьж Улаанбаатарт ирүүлсэн байна.

Архангайчууд “АББА”-ийн оригналь хувилбартай баяраа сайхан тэмдэглэсэн ч 200 хол давсан сая төгрөгөөр “ёолк”-дох нь хэр оновчтой вэ. Тэр дундаа 70 орчим мянган еврогоор "copy past" хамтлагийг гаднаас урьж авчрах нь бүр тохиромжгүй зүйл болсон гэж шүүмжлэх хүмүүс байна. Улсын эдийн засаг муудаж, ард түмний амьдрал доройтож байхад ядаж дотоодын хамтлаг дуучиддаа тэр их мөнгөө өгсөн бол арай илүү "гоё" харагдах байсан байж магадгүй юм. Нэн ялангуяа Эдийн засгийн хөгжлийн яам нь иймэрхүү үйлдэл хийх нь урлагийнханы дургүйцлийг их л хүргэсэн бололтой. Гитарчин Өөжгийгөөс эхлээд тус үйлдлийг шүүмжлэх хүмүүс олширчээ.

Угаас Н.Батбаяр сайд ойрд албан тушаалдаа үлдэх үү, болих уу гэсэн байдалтай байгаа.

Бас нэгэн зүйлийг хэлэхэд уг шинэ жил болохоос өмнө Архангайханыг “танк хүлдэгийнхэн” гэдэг байсан. Харин одоо "Кофи” гэж нэрлэдэг болов. Учир нь “АББА”-ийн хувилбарыг авчирсан учраас шоглон тус нэрийг өгсөн нь энэ аж. Нөгөө талаар Архангай аймаг өөрсдөө олон сайн дуучидтай. Тэгээд тэднийгээ дуулуулаагүйд нутгийнхан ихэд гомдолтой байгаа юм байна. Уг нь нутгийн дуучдынхаа ая дууг сонсож нэг үдшийг хамтдаа сайхан өнгөрөөсөн бол гадны хэн нь мэдэгдэхгүй нэг хамтлагийг сонссоноос дээр байх байсан биз.