Ховд их сургууль нь 2013-2014 оны хичээлийн жилийг “СУРГАЛТЫН ЧАНАР, ЁС СУРТАНХУУНЫГ ДЭЭШЛҮҮЛЭХ” жил болгон зарласантай уялдуулан  дээд боловсролын сургалтыг чанартай, хүртээмжтэй хүргэх, оюутан суралцагчдад бие даан суралцах нөхцөлийг бий болгох зорилгоор бэлтгэж буй мэргэжлийн чиглэлээр сүүлийн үеийн, дэлхийн хэмжээний их, дээд сургуульд хэрэглэгдэж буй, үр дүнгээр хүлээн зөвшөөрөгдсөн сурах бичгийг орчуулах, ерөнхий эрдмийн хичээлээр сургалт, судалгааны сүүлийн үеийн ололтыг тусгасан, дидактик боловсруулалт сайтай сурах бичиг зохиох зорилгоор дотоод төслийн уралдааныг зарлаж байна.

Чиглэл:

-  Байгалийн ухааны мэргэжлийн чиглэлээр 2 сурах бичиг орчуулах

-  Нийгэм, хүмүүнлэгийн мэргэжлийн чиглэлээр 1 сурах бичиг орчуулах

-  “Монголын түүх” хичээлийн сурах бичиг зохиох

Хамрах хүрээ:

-  Тухайн мэргэжлээр дэлхий нийтийн дээд боловсролын өнөөгийн чиг хандлагыг судалж, түгээмэл хэрэглэгддэг сурах бичгийг харьцуулан судалсны үндсэн дээр мэргэжлийн сурах бичгийг сонгон эрхийн зөвшөөрөл авч, орчуулах,

-  Ерөнхий эрдмийн хичээлд хэрэглэгдэх сурах бичиг нь агуулга, арга зүй, зохиомжийн шинэлэг санаатай, үзэл баримтлалын хувьд аль нэг тийш эс хэлбийсэн, шинжлэх ухааны ололтоор баяжуулсан, хуулбарлаагүй, дидактик боловсруулалт сайн байх,

 Санхүүжилт:

Төслийг ХИС санхүүжүүлэх ба чиглэл тус бүрээр нэг баг /нийтдээ дөрвөн баг/ шалгаруулах ба баг бүрийн ажлын санхүүжилтийн хэмжээ ажлын онцлогоос хамааран 1.5-2 сая төгрөг байна. Саналыг төслийн төсөвт тусгах.

Хэрэгжих хугацаа:

2014 оны 1 дугаар сарын 15-наас 4 дүгээр сарын 15-ны хооронд үргэлжилнэ. Шалгарсан баг бүр гэрээ байгуулсны үндсэн дээр ажлын нарийвчилсан төлөвлөгөөг батлуулж, ажлын явцад 2-оос доошгүй удаа семинар зохион байгуулна.

Санал хүлээж авах хугацаа:

Дотоод төсөлд оролцох хүсэлтэй профессор багш, судлаачдын баг 2013 оны 12 дүгээр сарын 25-ны дотор төслийн саналыг ССБЗА-д ирүүлнэ үү.  Утас: 70433861