Дижитал хамтлагийн дуучин Эрка буюу Г.Эрдэнэбилэг хүүгийнхээ ангийн бяцхан охинд туслах аяныг эхлүүлж байгаа тухай бид өмнө мэдээлсэн.

Түүний хүүгийн ангид ээжтэйгээ хоёулхнаа амьдардаг охин сурдаг бөгөөд охины ээж сэтгэцийн өөрчлөлттэй учир ажил хийх боломжгүй юм байна. Тиймээс охин өөрийгөө болон ээжийгээ Гандантэгчинлэн хийдэд будаа зарж тэжээдэг. Тэдний гэр нэвт гэрэлтдэг учир их хүйтэн. Гэсэн ч хөөрхий охин хичээлээ их сайн хийдэг гэнэ. Түүнд туслах зорилготой “Сайн болоорой аян” өдрөөс өдөрт хүрээгээ тэлж байгаа бөгөөд тэд охинд дулаан байр олж өгөн хандивын данс нээсэн байна. Мөн тэд охины ээжид эмчилгээ хийлгэхээр сэтгэлзүйч эмч нартай ярьж тохирсон гэнэ.

Түүнчлэн зарим хүмүүс охины тухай илүү ихийг мэдэхийг хүссэн бөгөөд дуучин Эрка энэ талаар “Охинд туслахыг хүссэн хүмүүс цуглаад дуу нэгтэйгээр түүний нэр хаягийг нууцлахаар шийдсэн. Учир нь түүний сургуулийн орчинд ямар нэг хүндрэл үүсэх болон муу хүмүүсээс болгоомжилж байгаа юм... Бид тэдний нийгмийн халамжид зүй ёсоор хамрагдаж байгаа эсэхийг нь судалж хамрагдаагүй бол хамруулах, нэмж хүмүүнлэгийн төсөл үйл ажиллагаануудад хамруулах талаар судалж байна. Нэг удаа нүүрс түлээ хоол ундаар тэтгээд орхих биш цаашид үргэлжилсэн урт хугацааны ажил хийхээр төлөвлөж байгаа” гэжээ.

Тэдний охинд нээж өгсөн хоёр дансанд одоогоор 175,000 төгрөг цуглаад байгаа юм.