Сүхбаатар дүүргийн прокурорын газраас Нийслэлийн гэмт хэргээс урьдчилан сэргийлэх ажлыг зохицуулах зөвлөл, Нийслэлийн прокурорын газрын  гэмт хэргээс  урьдчилан сэргийлэх ажлын хүрээнд  2013-2016 онд хамтран хийх ажлын  хөтөлбөрийг хэрэгжүүлэх үүднээс  Нийслэлийн болон дүүргийн прокурорын газар, Сүхбаатар дүүргийн Гэмт хэргээс урьдчилан сэргийлэх ажлыг зохицуулах зөвлөлтэй хамтран  “Архидан согтуурах, хар тамхи, мансууруулах бодисыг хэрэглэхийн эсрэг тэмцэх, түүнээс урьдчилан сэргийлэх нь” сэдэвт зөвлөгөөнийг зохион байгууллаа.

Уг зөвлөлгөөнд Нийслэл болон дүүргийн прокурорын газрууд, Сүхбаатар дүүргийн Иргэдийн Төлөөлөгчдийн Хурал, Гэмт хэргээс урьдчилан сэргийлэх ажлыг зохицуулах зөвлөл, НГХУСАЗЗ, УМБГ, ЭЦГ, НЦГ, дүүргийн Цагдаагийн хэлтсүүд, Нийслэл болон  дүүргийн шүүх,  Нийслэлийн эрүүл мэндийн газар, Гаалийн ерөнхий газар, Шүүхийн шинжилгээний үндэсний хүрээлэн,  Хар тамхи, мансууруулах бодисоос иргэдийг хамгаалах нийгэмлэг, Сэтгэцийн эрүүл мэндийн үндэсний  төв,  Хууль зүйн яам зэрэг  төрийн болон төрийн бус байгуулагуудын 60 гаруй төлөөлөгч нар оролцож зөвлөлгөөний хэлэлцүүлгээс зөвлөмж гарган холбогдох байгууллагуудад хүргүүлэхээр тогтсон байна.

Энэхүү зөвлөлгөөн нь  Архидан согтуурах, хар тамхи, мансууруулах бодисыг хэрэглэхийн эсрэг тэмцэх, тэдгээрийн хор хөнөөлөөс  урьдчилан сэргийлэх ажлын арга туршлагыг нэмэгдүүлэх, боловсронгуй болгох, үр дүнг дээшлүүлэх, оролцогч талуудын ойлголцлыг гүнзгийрүүлэх, бэхжүүлэх зэрэг ач холбогдолтой болсон байна.

Зөвлөгөөнд шаардагдсан төсөв, зардлыг Сүхбаатар дүүргийн Гэмт хэргээс урьдчилан сэргийлэх ажлыг зохицуулах зөвлөлөөс гаргаж, зөвлөгөөнд тавигдсан илтгэлүүдээр эмхтгэл гарган хэвлүүлэх зардалд Нийслэлийн прокурорын газраас дэмжлэг үзүүлэхээр болсон байна.