Баянзүрх дүүрэг дэх Мэргэжлийн хяналтын хэлтсийн байцаагч нар өнгөрсөн долоо хоногт “Нарантуул” худалдааны төвд шалгалт хийсэн.

Шалгалтад худалдааны төвийн орон нутгийн ачаа тээвэрлэдэг хэсэг болон тэнд байрлах зочид буудал, мал, амьтны гаралтай хүнсний түүхий эд, бүтээгдэхүүн худалдаж буй 10 павилионы 26 иргэнийг хамруулсан аж. Улмаар шалгалтаар өргөтгөлийн хэсэгт байрлах автомашины зогсоол агаар бохирдуулдаг, жолооч нар нь машинаа харж хонохдоо ил бие засдаг, хог хаягдлаа тогтмол цэвэрлэдэггүй, орчны бохирдол ихтэй талбайд хүнсний бүтээгдэхүүн цуглуулж, тээвэрлэдэг зэрэг зөрчил илэрсэн байна. Мөн дэн буудал нь нэг хүнд ногдох зай талбайгаас хэтрүүлж зочин авсан, зочны өрөөнд архи, согтууруулах ундаагаар үйлчилсэн байжээ. Түүнчлэн буудлын өдөр тутмын цэвэрлэгээ хангалтгүй, эвгүй үнэртэй, хогоо хаядаггүй байсан аж. Мэргэжлийн хяналтын байцаагч нар зөрчил гаргасан иргэдийг торгож, зөвлөгөө өгсөн байна. Түүнчлэн, дээрх зөрчлийг арилгах, дотоод хяналтаа сайжруулах тухай албан шаардлагыг “Нарантуул” худалдааны төвийн удирдлагад хүргүүлжээ.