Найз залуудаа зодуулж амиа алдсан гэх 21 настай бүсгүйн ар гэрийнхэн анх удаа хэвлэлийнхэнд хандлаа. Хуралд хохирогчийн аав Баянхонгор аймгийн Заг сумын иргэн Г.Бадрах, авга эгч Л.Оюунчимэг, нагац эгч Д.Сүрэнхорлоо болон тэдний өмгөөлөгч, хуульч М.Ичинноров нар оролцсон юм.

   Энэ хэрэг хохирогч бүсгүйг өнгөрөгч арваннэгдүгээр сарын 14-нд биедээ хүнд гэмтэл аван ГССҮТ-д хүргэгдэн ирснээр эхэлсэн бөгөөд бүсгүй тэнд хоёр ч удаа хагалгаанд орсны эцэст 15-ны өглөө 04.00 цагийн орчимд нас барсан байна.

Тухайн үед хохирогч ямар байсныг нүдээр үзсэн хохирогчийн нагац эгч Д.Сүрэнхорлоо “Би 14-ны өглөө дүүгээ Гэмтлийн эмнэлэгт хүргэгдлээ гэхэд очсон. Намайг яваад ороход дүү маань сэхээн амьдруулах тасагт бүх бие нь хөх няц болчихсон, амьсгалын апараттай хэвтэж байсан. Бид холбогдох эмч нартай уулзаж бие нь ямар байгааг асуухад "Энэ хүүхэд их хүнд орж ирсэн, ер нь найдваргүй шүү" гэж хэлсэн. Дүүгийнхээ хөнжлийг сөхөөд харахад мөрийг нь мохоодуу иртэй зүйлээр гэмтээсэн, ар нуруу, гуя гээд нэлэнхүйдээ хөх няц болсон байсан. Би дүүгээ хараад үнэхээр цочирдсон. Манай дүүг хүргэж ирсэн Г.Алтанхүүгийн үеэл Болормаа гэж хүүхэн тэнд байсан. Би түүнээс миний дүүг хэн зодсон гэж асуухад тэр найз нь зодсон гэсэн. Тэгээд тэр хүн чинь хаана байна гэж асуухад “Байгаа байгаа би таныг эхлээд хүнтэй уулзуулна” гэж Г.Алтанхүүгийн ээж, дүү хоёрыг дуудсан байгаа юм. Би ээжид нь “Чи өдий насыг насалсан хүн байна. Миний дүүг танай хүү ямар болгосныг нэг хараадхаач” гэхэд ээж нь “Би орж хараад яахав” гэж хэлсэн. Тэгэхээр нь би хажууд байсан Болормаад “Чи миний дүүг харсан биз дээ? Ямар болгосон байна?” гэхэд тэр хүүхэн толгой сэгсрээд уйлж байсан. Нэг зүйлийг баттай хэлэхэд миний дүүд ямар нэгэн хууч өвчин байгаагүй. Тэр хүн миний дүүгийн үхэлд буруутай. Миний дүү дөнгөж 21 насандаа хорвоог орхилоо. Бид үнэхээр гомдолтой байна” хэмээн нулимс дуслуулан ярьсан юм.

    Хохирогчийн биед хийсэн шүүх шинжилгээний хариу удтал хойшлогдсоны эцэст хэд хоногийн өмнө гарсан бөгөөд хохирогчийн ар гэрийнхэн болон өмгөөлөгч М.Ичинноров шүүх эмнэлгийн дүгнэлттэй санал нийлэхгүй байгаагаа энэ үеэр илэрхийллээ. Тодруулбал ШШҮХ-гийн дүгнэлт хохирогчийг гадны ямар нэгэн нөлөөгүй нас барсан гэж гарсан байна.

М.Ичинноров: Шинжээчдийн дүгнэлт хэрэгтэнд тэнсэн аваад өнгөрөх боломжийг бүрдүүллээ

     -Хохирогчийн ар гэрийнхэн болон мэргэжлийн бидний нүдээр харахад шүүх эмнэлэгийн дүгнэлт хууль бус, сэжигтний талд илтэд үйлчилсэн дүгнэлт гарлаа. Гэр бүлийн хүчирхийлэлд өртөн маш хүнд гэмтэл авч нас барсан  гэдэг нь тодорхой байхад хүндэвтэр гэмтэл гэж тогтоосон байсан. Үүнд бид үнэхээр гомдолтой байгаа. Тухайлбал үхэлд хүргэсэн шалтгааныг цөсний цоргоны үрэвсэл гэж бичсэн байна. Бодит байдал дээр ямар байсан бэ гэвэл цөсний хүүдий цоорч цөс биеэр нь тархаж ногоорсон байсан. Гэтэл эмч нар цөсний хүүдий цоороогүй байна гэж дүгнэсэн. Үнэндээ шинжилгээ хийх үед цөсний хүүдий байгаагүй. 11 сарын 14-нд хохирогч Б.Цэдэн-Ишд хоёрдугаар хагалгааг хийх үедээ цөсний хүүдийг авсан байгаа.

Мөн үхэлд хүргэсэн бас нэг шалтгаан нь элэгний үрэвсэл, үхжил гэж дүгнэсэн. Шинжилгээ хийх үед түүний элгэнд оёдол тавигдсан байсан. Учир нь хохирогчид хагалгаа хийх үед элэг задарснаас оёдол тавьсан юм билээ. Үүнийг шүүх эмнэлэгийн эмч нар дүгнэлтэндээ оруулаагүй байна. Үхлийн шалтгаан гадны ямар нэгэн нөлөөгүй гэж дүгнэсэн. Гэтэл хагалгааг хийсэн эмч Цэнд-Очир үхлийн шалтгааныг гадны нөлөөтэй гэж хохирогчийн ар гэрийнхэнд хэлсэн байгаа.

Түүнчлэн дүгнэлтэнд хохирогчийн биед үүссэн цус хуралтуудыг дурьдаагүй. Хохирогчийг үзсэн эмч нарын ярьж буйгаар ар нуруу, гуянд үүссэн цус хуралтууд үнэхээр аймшигтай байсан гэсэн. Тэдгээр цус хуралтууд өмнөх шарх сорви гэдгийг шинжилгээ хийсэн эмч нар ч гэсэн нотолж байгаа. Энэ нь хохирогчийг удаа дараа гэмтээж байсныг гэрчилж байгаа юм.

Дотуур цус алдалтын шалтгааныг элэг задарснаас цус алдсан гэж үзэж байгаа. Их хэмжээний цус алдсан учраас эхний хагалгааг зогсоож, цус тогтоох эмчилгээ хийж, дахин хагалгаа хийсэн. Гадна үүссэн шарх сорви, хөхрөлтийг гэмтлийн хүндэвтэр зэрэг гэж тодорхойлсныг эсэргүүцэж байгаа. Энэ дүгнэлт нь гэмт хэрэгтэн тэнсэн харгалзах ял аваад өнгөрөх боломжийг бүрдүүлсэнд туйлын их харамсч  байна.

Хагалгаа хийсэн эмч “Хэвлийн хөндийн битүү гэмтэл гэж оношлоод, үхэлд хүргэх архаг хууч өвчин тогтоогдоогүй” гэж дүгнэсэн байхад шүүх эмнэлгийн дүгнэлт гадны нөлөөгүй гэж гарсан нь маш ноцтой. Залуу хүн цөс, элэгний үрэвслээр 2-3 хоногийн дотор нас барна гэж байх уу. Үүнийг эрүүл оюун ухаанаар бодож үзээсэй. Тиймээс дээрх нэр бүхий эмч нарыг АТГ-т шалгуулахаар хандаад байна. Мөн энэ хэрэгт дахин шинжээч томилж өгөх хүсэлтийг прокурорт тавьсан. Хууль зүйн сайд анхаарал хандуулна гэдэгт итгэж байна.

Талийгаач бүсгүйн аав Г.Бадрах: Охин маань бидэнд зоддог гэж хэлээгүй

-Охин чинь та нарт зодуулдаг гэдгээ хэлж ярьж уу?
-Зоддог гэж бидэнд ердөө хэлээгүй. Би найз залуутайгаа амьдарч байгаа л гэдэг байсан. Гэхдээ яг ямар залуутай хаана амьдарч байгаагаа бидэнд яриагүй.

-Г.Алтанхүүтэй уулзаж байсан уу?
-Уулзалдаж байгаагүй. Харин утсаар бол ярьж байсан.

-Хамгийн сүүлд охинтойгоо хэзээ холбоо байсан бэ?
-Хамгийн сүүлд 11 сарын 12-нд би хөдөөнөөс сумын төвд орж ирээд охин руугаа ярьсан. Тэр надаас хэзээ ирэхийг минь асуусан. Би шинээр цэрэг болсон хүүгийнхээ тангарагийн баярт оролцож бас охиныхоо хоол хүнсийг аваачиж өгөх гэж байсан юм. Тэгж ярихдаа дуу хоолой нь их сул байсан. Тэгээд маргааш нь эхнэр "Охин чинь ярихгүй байна, чи залгаад үзээч" гэхээр нь утас руу нь залгаж үзтэл холбогдохгүй байсан. Тэгэхээр нь найз залуугийнх нь утас руу 12.00 цагийн үед залгасан. Тэгэхэд Г.Алтанхүү "Охин чинь ажилдаа явсан, бид хоёр маргааш Сүхбаатар аймаг руу явах гэж байна, та хэзээ ирэх вэ" гэж ярьсан. Тэгээд би буцаад хөдөө явж гэрээ нүүлгэх гэж байтал 14-ний өглөө ээж нь охин чинь ухаан алдсан эмнэлэгт байна, ухаан орохгүй байна гэсэн. Сонсоод л шууд Баянхонгороос гараад 15-ны үүрээр 06 цагт ирэхэд охин маань өнгөрчихсөн байсан.

-Талийгчийнхаа цогцсыг харсан уу, шүүх эмнэлгийн дүгнэлтийн талаар ямар бодолтой байгаа вэ?
-Охиныхоо цогцсыг харахад үнэхээр хүнд байсан. Охин маань найз залуудаа зодуулдаг байсан талаар найзууд нь хэлсэн,бидэнд баримт байгаа.  Харин шүүх эмнэлгийн дүгнэлтэд гадны нөлөөтэй байсан талаар үг битгий хэл үсэг ч оруулаагүй байсан. Бид үүнд их харамсалтай байгаа.

Дахин шинжээч томилж өгөхийг хүсч байна гэв

ШШҮХ-ын эмч нар ийнхүү "гадны нөлөөгүй" гэж дүгнэсэн нь тэднийг сэжигтний ар гэрийнхнээс авлига авсан байх гэсэн хардлагыг хохирогчийн талд төрүүлж, тэд хохирогчийн биед шинжилгээ хийсэн гурван эмчийг АТГ-т шалгуулахаар болжээ.

Одоогоор Г.Алтанхүүд эрүүгийн хэрэг үүсгэн шалгаж байгаа бөгөөд тэрээр талийгаачийг удаа дараа зодож дарамталдаг байсныг нотлох хангалттай баримт, гэрчийн мэдүүлэг хохирогчийн ар гэрийнхэнд байгаа аж. Түүнчлэн тэд талийгаачид хагалгаа хийсэн эмч нараас гэрчийн мэдүүлэг авахыг мөрдөн байцаагчаас хүссэн байна. Хамгийн гол нь тэд энэ хэрэгт дахин шинжээч томилж, шүүх эмнэлгийн дүгнэлтийг үнэн зөвөөр гаргахыг хүсч байгаа юм.