Шинэчлэгдэн хэвлэгдсэн Монгол Улсын Улаан ном өнөөдөр нээлтээ хийлээ.

Биологийн  шинжлэх ухааны доктор Ц.Шийрэвдамба тэргүүтэй 81    эрдэмтэн эрхлэн гаргасан шинэ Улаан номонд 110 зүйлийн амьтан, 192 зүйлийн ургамал бүртгэгджээ.

Шинээр бүртгэгдсэн 25 зүйлийн амьтдын дотор шинээр шилүүс, суусар булга, ойн булга, хүрэн баавгай зэрэг зургаан хөхтөн, цагаан тогоруу одой галуу, ооч ёл зэрэг 18 зүйл шувуу, эгэл загалмайт могой гэсэн 1 зүйлийн мөлхөгч багтсан байна. Харин 192 зүйлийн ургамалд 95 зүйлийн дээд ургамал, 5 зүйл хаг, 11 зүйл хөвд, 6 зүйл мөөг, 13 зүйл замаг бүртгэгджээ.

Улаан номонд устаж, ховордож буй амьтан, ургамлыг оруулснаар хүмүүс тэдгээр амьтдыг хамгаалах улмаар тоо толгой нь өсөх өндөр ач холбогдолтой бөгөөд шинэ Улаан номноос 3 зүйлийн хөхтөн, 13 зүйлийн шувуу, 60 зүйлийн дээд ургамал, 2 зүйл хаг, 3 зүйл хөвд, 1 зүйлийн замаг хасагдсан байна.

Нийт 2000 хувь хэвлэгдсэн уг номыг бүх сургууль, номын сангуудад тарааж ирэх оноос IPad, интернет хувилбарыг гаргахаар төлөвлөж байгаа аж.

Дашрамд сонирхуулахад манай улсын анхны Улаан ном 1987 онд хэвлэгдэн гарч байсан бол хоёр дахь шинэчилсэн хувилбар 1997 онд олны хүртээл болж байсан юм.