Нийслэлийн Нийгмийн Ардчилал Монголын Залуучуудын холбоо оны шилдэг залуусыг нэрлэлээ.  Ингэхдээ “Бүтээлч Монгол Залуу, “Хариуцлагатай Монгол Залуу”, “Эрүүл Монгол Залуу”, “Эх оронч Монгол Залуу”, “Боловсролтой Монгол Залуу” гэсэн шилдэгийн шилдэг таван номинациар залуучуудыг шалгаруулан шагнаж урамшуулсан юм. Үүнд:

-“Бүтээлч Монгол Залуу”-гаар “Төрийн соёрхолт” инженер Н.Нацагням шалгарчээ. Тэрээр “Синхрон генераторын реактив чадлын автомат тохируулга болох NaNyam-AX12 болон түүний виртуал лаборатори” бүтээлээрээ салбартаа ихээхэн амжилт гаргасан билээ.
-“Боловсролтой Монгол Залуу”-гаар Хөрөнгийн биржийн тэргүүн дэд захирал Х.Алтай тодорсон юм. Тэрээр Монгол Лондонгийн хөрөнгийн биржтэй хамтын ажиллагаа эхлүүлсэн, Үнэт цаасын хуулийг батлах ажилд гар бие оролцсон, Монгол Британийн худалдаа аж үйлдвэрлэлийн тэнхимийн хүндэт ерөнхийлөгч, мөн монгол улсын эдийн засгийн хөгжилд ихээхэн хувь нэмэр оруулжээ.
-“Хариуцлагатай Монгол Залуу”-“Хамаг монгол” төслийг санаачилж Халимаг, Тува, Өвөр монгол, Монгол Буриад  улсуудыг нэгтгэх ажлыг хийж олон түмний талархалыг хүлээгээд байгаа Монгол Улсын Гавъяат жүжигчин Самандын Жавхлан энэ номинацийн эзэн болсон юм.
-“Эрүүл Монгол Залуу”-гаар “Эгэл Амьдралын Мөр” ТББ-ын тэргүүн Буянтогтохын Гүрсоронзон тодорлоо. Тэрээр орон гэргүй, тэнэмэл байдлаар хог түүж, архи ууж орц хонгилд амьдарч байгаа иргэдийг гэмт халдлагаас хамгаалах, нийгэмшүүлэх улмаар мэргэжил эзэмшүүлж ажлын байранд зуучлан дээрх тэнэмэл гэгдэх иргэдэд амьдрах итгэл өгч буй хүмүүнлэгийн ажлыг амжилттай хэрэгжүүлж байна. Анх Нийслэлийн Цагдаагийн газрын дэмжлэгтэйгээр орон гэргүй “тэнэмэл” гэгдэх иргэдийг хүлээн авч эрүүл мэндийн үзлэгт оруулж эмчилж сувилан, хооллож хувцаслан, орон гэрээр хангаж, 90 гаруй хувийг нь бүрэн бичиг баримтжуулах ажлыг хийж дараа дараагийн шаталсан арга хэмжээний үр дүнд тухайн иргэдийг 50 гаруй хувь нь ажлын байраар хангагдсан гэнэ. Иргэдийн зарим нь хадгаламж хуримтлалтай болж, тэнүүлчин гэгдэж байсан эхнэр нөхөр 2 асрамжийн газарт хүмүүжиж байсан 2 хүүхдээ авч халуун дулаан гэр бүлээрээ амьдарч байгаа юм.
-“Эх оронч Монгол Залуу”-аар амжилт бүтээлээрээ гялалзаж эх орныхоо нэрийг өндөрт өргөж яваа  Монгол Улсын гавьяат тамирчин Олимпын хүрэл медальт  Соронзонболдын Батцэцэг нар тус тус шалгарсан байна.