Шинэ оны эхний өдөр аймаг, нийслэлийн хэмжээнд урьдчилсан байдлаар 75 хүүхэд мэндэлсэн сайхан мэдээ байна. Тухайлбал, Нийслэлийн II төрөх эмнэлэгт 00.00 цагаас хойш 10 эх төрсөн ба 7 хүү, 3 охин мэндэлжээ.

Клиникийн нэгдүгээр амаржих газарт нэгдүгээр сарын 1-ний 10.00 цагийн байдлаар долоон эх амаржиж, 3 хүү, 4 охин мэндэлсэн байна. Мөн нэгдүгээр сарын нэгний 10.00 цагийн байдлаар Клиникийн III төрөхөд 18 хүүхэд, Орхон аймагт 9 хүүхэд төрсөн нь хамгийн олон төрөлттэй эмнэлгүүд болжээ.

Мөн өнгөрсөн онд манай улсад төрөлт урьд жилүүдээсээ эрс нэмэгджээ. Тухайлбал 2013 онд манай улсад 80 мянган шинэ иргэн мэндэлж, Монгол Улсад хамгийн олон хүүхэд төрсөн жил боллоо. Манай улсын хүн амын тоо 1970-1980-аад ийм эрчимтэй өсч байжээ.

Тэр дундаа 1988 онд Монгол Улс хоёр сая дахь иргэнээ бүртгэж, тэр жил 75832 хүүхэд төрсөн байдаг. Түүнээс хойш зах зээлийн жилүүдэд төрөлтийн тоо эрс багасч, 1990-ээд оны эхний жилүүдэд 40 мянга хүртлээ буурсан. Харин алтан гахай жилээс хойш төрөлт жил ирэх тусам нэмэгдсээр 2012 онд 74.7 мянган шинэ иргэн мэндэлж, 1980-аад оны түвшинд дөхөж очлоо хэмээн бид баяртайгаар мэдээлж байв.

Улиран одсон 2013 онд гэхэд л бид түүхэндээ дөрвөн ихэр иргэнээ хүлээн авсан билээ.