Хууль сахиулахын их сургуулийг төгсөгч жүдо бөхийн дэлхийн аварга, МУГТ М.Уранцэцэг, дөрвөн ихрийн аав цагдаагийн дэслэгч М.Баттулга нарт их сургуулийн захирал, профессор, цагдаагийн хурандаа Р.Чингис болон тус их сургуулийн удирдлагууд магистрантурт үнэ төлбөргүй элсэн суралцах эрхийн бичгийг гардууллаа. Их сургуулийн удирдлагууд МУГТ М.Уранцэцэгийн магистрантурт элсэн суралцах эрхийн бичгийг жүдо бөхийн холбоонд нь очиж албан ёсоор гардуулсан юм. Энэ үеэр тус их сургуулийн захирал, профессор, цагдаагийн хурандаа Р.Чингис “Их сургууль маань төгсөгчдийнхөө амжилт бүтээл дээр оршин тогтнож байдаг. Тэр ч утгаараа манай их сургуулийн анхны төгсөгч, МУГТ М.Уранцэцэг спортын өндөр амжилт гаргалаа. Монгол Улсдаа хамгийн анхны эмэгтэй жүдогийн аварга манай сургуулийн төгсөгч байлаа. Мөн оны шилдэг тамирчнаар тодорлоо. Тиймээс их сургуулийн багш нар нь шавиараа их бахархаж, баяр хүргэхээр ирлээ. М.Уранцэцэгтээ цаашид улсынхаа болон их сургуулийнхаа нэрийг улам өндөрт гаргаж явахыг хүсэн ерөөе” гэлээ.
М.Уранцэцэгийн хувьд энэ оны наймдугаар сард “Рио-де-Жанеро” хотноо болсон жүдо бөхийн дэлхийн аварга шалгаруулах тэмцээний эмэгтэйчүүдийн 48 кг-д алтан медаль хүртэж, Монголын анхны дэлхийн аварга эмэгтэй жүдочин болсон.
Түүнчлэн Их сургуулийн 2013 оны төгсөгч, шинэ оны өмнөхөн дөрвөн ихэр хүүхдийн аав болсон цагдаагийн дэслэгч М.Баттулгын магистрантурт суралцах эрхийн бичгийг Эх нялхсын эрүүл мэндийн төвд очиж гардуулсан юм. Энэ үеэр их сургуулийн захирал, профессор, цагдаагийн хурандаа Р.Чингис “Манай сургуулийг төгсөгч, дөрвөн ихэр хүүхдийн аав болсон М.Баттулга Монгол Улсынхаа хөгжил цэцэглэлтэд томоохон хувь нэмэр орууллаа.
Тэр ч утгаараа ХСИС-ийн нийт бүрэлдэхүүн шавиараа бахархаж байна. Их сургуулийн захирлын зөвлөл өнгөрсөн оны хамгийн сүүлийн зөвлөлийн хуралдаанаар М.Баттулгыг тус их сургуулийн магистрантурт элсэн суралцах эрхийн бичгээр шагнах шийдвэр гаргасан. Энэ шагналыг гардуулахаар хүрэлцэн ирсэндээ баяртай байна. М.Баттулгын хувьд магистрт суралцсанаас өрх гэрээ авч явах, цаашид цагдаагийн байгууллагад дэвшиж ажиллахад тодорхой хэмжээнд хувь нэмрээ оруулна гэдэгт итгэлтэй байна” гэсэн юм. Их сургуулийг төгсөгчид магистрантурт элсэн суралцах эрхийн бичгээ гардаж авсны дараа их сургуулийнхаа нийт удирдлага, багш нар, сонсогчдодоо бүгдэд нь баярлаж талархсанаа илэрхийлээд ажил, хөдөлмөрт нь өндөр амжилт хүсэн ерөөсөн юм.
