Торгуулиа төлөхгүй, олон удаа зөрчил гаргасан жолоочийн эрхийг хасахаар хуулинд заажээ. Улмаар өнгөрсөн оны  торгуулиа төлөөгүй жолоочдын эрхийг энэ сарын 1-нээс хасах тухай Замын хөдөлгөөний удирдлагын төвөөс  мэдээллээд байгаа. Энэ талаар  Замын цагдаагийн газрын дэд дарга Ч.Жаргалсайханаас тодруулахад, "Удирдлагын төв маань өөрөө цагдаагийн байгууллага биш шүү дээ. Өөрөөр хэлбэл Замын хөдөлгөөний удирдлагын төв эрх хасдаг биш камераар хөдөлгөөнийг хянадаг газар. Удирдлагын төв мэдээлэл гаргаж ирж бидэнд өгдөг. Бид тэр мэдээллээр нь хариуцлага тооцдог. Тэгэхээр удирдлагын төв эрх хасахгүй. Мөн нэгдүгээр сарын 1-нээс торгуулиа төлөөгүй жолоочдын эрхийг хасна гэх мэдээллийг манайх гаргаагүй" гэв.