Монгол Улсын Хөдөлмөрийн Баатар, Ардын жүжигчин, дуурийн дуучин Гонгорын Хайдав гуай  саяхан "Монгол Тулгатны 100 эрхэм" нэвтрүүлэгт оролцож олон жил уулзаж чадахгүй яваа хүү Х.Сэргэлэнгийнхээ талаар ярилаа. Энэ нь олны сэтгэлийг ихэд хөдөлгөв. Тэрбээр хүүхдүүдээ архи дарс хэрэглэх болж, өөрөөс нь дөлөх болсон нь өөрийнх нь хатуу, зарчимч зан араншингаас болсон гэж ярив. Өдгөө цагаан сараар хамгийн түрүүнд аав дээрээ очиж золгодог үр нь дөрвөн жил ирээгүй байна.

 Энэ нэвтрүүлгээс улбаатай түүний хүү Х.Сэргэлэнг хаана яваа бол, аав дээрээ буцаад ирэх болтугай гэх яриа гарсаар байна.

 Мөн энэхүү нэвтрүүлгийн дараа цагдаагийн байгууллагынхан  хүүг нь эрэн сурвалжлах ажилд гарлаа.

Цагдаагийн байгууллага хэвлэл мэдээллээр гарсан мэдээллийн дагуу шалгах, лавлах бүрэн эрх нь бий. Энэ хүрээнд Г.Хайдавын гуайн яриаг сонсоод хүү Х.Сэргэлэнг нь хайх эрлийн алба гаргахыг  цагдаагийн удирдлагууд үүрэг болгожээ. Үүний дагуу Х.Сэргэлэнг эрж хайх ажиллагааг эхлүүлсэн гэнэ. Магадгүй түүнийг олох юм бол Г.Хайдав гуайд хаана байгааг нь хэлж, үртэй нь уулзуулах аж. Харин гэртээ очихгүй байгаа хүнийг оч гэж тулгах нь цагдаагийн байгууллагынханы хийх үйлдэл биш  учир аавынх нь байр байдал, учир явдлыг хэлж ойлгуулах талаар цагдаагийн албаныхан ярьж сууна. Баттай эх сурвалжуудын хэлж буйгаар Х.Сэргэлэн  Дархан-Уул аймагт байгаа аж. Тиймээс ч хүмүүсийн мэдээллийн дагуу цагдаагийн албанынхан Дархан руу эрлийн багийг хөдөлгөжээ.

Сэргэлэн бол Хайдав гуайн ууган хүү бөгөөд ээж нь Дарьсүрэн гэх  Бөмбөгөр ногооны авьяаслаг хөгжимчний нэг байсан гэдэг. Харамсалтай нь тэрээр 24-хөн насандаа ертөнцийн мөнх бусыг дагаж, гурван хөөрхөн үр нь өнчрөн хоцорч байжээ.  Сэргэлэнгийн хувьд  дүү Алтансүхийнхээ хамт эмээ Цэнгэнбаярын гар дээр өсөж өндийсөн аж.
 
Харин МУГЖ Төмөрбаатар нь аавынхаа дэргэд хүн болжээ. Сэргэлэн эмээ Цэнгэнбаяр, аав хоёрынхоо хүчинд л хүн болж, эрдэм боловсрол эзэмшсэнээ ярьж байсны дээр таалал төгссөн хойд ээж орос бүсгүй /маам/ болон одоо байгаа Онон маам нарыгаа их хүнлэг, ариун хүмүүс гэж ярьж байсныг Н.Даваадаш /МУСГЗ/ нэгэнтээ дурсаж билээ. Ийн хар буруу бодолгүй, цайлган, хайлган найзаа санасан андууд ч олон байна.