Цагдаагийн албаны тухай хуулийг мөрдөж эхэлсэнтэй холбоотой ЦЕГ-т бүтэц бүрэлдэхүүний өөрчлөлт хийжээ. Оны өмнө 60 хүний бүрэлдэхүүнтэй байсан ЦЕГ шинэ бүтцээрээ 157 хүнтэй болж өргөжжээ. Тэгвэл 200 хүнтэй байсан УМБГ шинэ бүтцээрээ 60 хүнтэй ажиллаж болсон байна.  Учир нь Хууль зүйн сайд Х.Тэмүүжин өнгөрсөн баасан гарагт ЭЦГ, УМБГ хоёрыг нэгтгэх тушаал гаргасантай холбоотой аж.  Цагдаагийн албаны тухай хуулиар ЦЕГ-ыг гурван дэд даргатай болгосон. Шинэ хуулийн дагуу ЦЕГ-т өмнө нь байсан С.Баатаржав, Ж.Ганбаатар нар дээр нэмж Д.Эрдэнэбаатарыг дэд даргаар томилжээ.  Мөн сайдын тушаалаар ЦЕГ-ын Захиргааны удирдлагын газрыг татан буулгажээ.   Улмаар тус газрын дарга, хурандаа Д.Адьяабазарыг албан тушаалаас нь чөлөөлсөн байна. Мөн тус газрын Хүний нөөц, сургалтын хэлтсийн дэд дарга Г.Баясгаланбатыг чөлөөлж, оронд нь О.Мөнхбатыг томилжээ. Түүнчлэн, Дотоодын цэргийн штабын хэлтсийн дарга, хурандаа Ж.Амгаланг шинээр байгуулсан Олон нийтийн аюулгүй байдлыг хангах хэлтсийн даргаар томилжээ.