БШУ-ны сайд Л.Гантөмөр өнөөдөр "Ивээл Энэрэл" ТББ-д харьяалагддаг бүтэн ба хагас өнчин 14 оюутанд нэг жилийнх нь сургалтын төлбөрийг гардуулан өглөө. "Ивээл Энэрэл" ТББ нь дэргэдээ "Гэрэл Ирээдүй" хэмээх халамжийн төвтэй бөгөөд Ховд аймгийн Мөст сумын уугуул Б.Уранчимэг гэх эмэгтэй тус төвийг аргал түүхээс авахуулаад олон ажил хийж олсон орлогоороо байгуулжээ. Тэрээр 2004 оноос Ховд аймгийн бүтэн өнчин 24 хүүхдийг асрах болж тус төвөө байгуулахаар сэтгэл шулуудсан гэнэ.
Энэ үеэр Л.Гантөмөр сайд "Өнөөдөр Урнаа багшийнхаа өсгөн хүмүүжүүлж байгаа хүүхдүүдтэй танилцаж байгаадаа баяртай байна. Хамгийн гол нь энэ хүн аргал түүхээс авахуулаад бас бус ажил хийж олсон мөнгөөрөө эдгээр бүтэн болон хагас өнчин залуучуудыг дэмжиж байгаад нь бид үнэхээр талархаж байгаа. Урнаа багш асрамжийн газар ажиллуулахын зэрэгцээ есөн өнчин дүүгээ хүн болгосон хүн бөгөөд 100 орчим хүүхэд манай Урнаа багшийг ээжээ гэж дууддаг. Ер нь би Монголын багш нар дундаас хамгийн гайхамшигтай багш бол Б.Уранчимэг багш гэж ам бардам хэлмээр байна. Үнэхээр төр засаг болон хэн нэгнээс тусламж дэмжлэг харалгүй өөрийн хүчээр Монголын залуучуудад ирээдүй бэлэглэж байгаа Б.Уранчимэг багшдаа баяр хүргье" гэв.
Түүнчлэн бид тус төвийн захирал Б. Уранчимэгийн сэтгэгдлийг сонслоо. Тэрээр "Оюутнуудын маань төлбөрийг шийдэж өгсөнд маш их баярлалаа. Энэ зөвхөн надад биш Монголын маш олон оюутнуудад урам зориг өгсөн сайхан үйл явдал боллоо. 2014 онд миний хийх гэсэн ажлууд маш амжилттай байна. Надад маш их эрч хүчийг өглөө. Мөн надад маш их хариуцлага оногдож байна. 2000 онд би аав, ээжээ алдсан. Тухайн үед би дөнгөж аравдугаар ангиа төгссөн хүүхэд есөн дүүтэйгээ хамт өнчирсөн. Хамгийн бага дүү маань гурван настай байсан. Дүү нартаа аавын оронд аав, ээжийн оронд ээж болон үлдсэн. Өнчин хүн ямар байдгийг мэдэрсэн болохоор хүүхдүүдэд туслахаар шийдсэн. Шантрах, няцах үе олон байсан ч одоо сайн сайхан хүүхдүүдээ хараад, хүүхдүүдэд минь төр засаг ивээлээ хайрлаж байгааг хараад мартагдчихлаа. Сайн санаат хүмүүсийн дэмжлэг туслалцааны ачаар олон сайхан хүүхэд амьдралдаа хөл алдахгүй явна" гэлээ.
Дээрх 14 оюутны жилийн сургалтын төлбөрийг тус яамнаас буцалтгүй тусламж хэлбэрээр олгож байгаа бөгөөд сайд хувиасаа "Ивээл Энэрэл" халамжийн төвд хандив өргөсөн юм.
