Дэлхийн хоёр тэрбум хүнд долоон хэлээр мэдээллээ хүргэдэг алдарт  “СNN” агентлаг энэ жилээс Монголд үйл ажиллагаагаа идэвхжүүлэхээр боллоо. Мэдээллийн чанар, хурдаараа дэлхийд тэргүүлдэг тус агентлаг нь Монголыг сонгосны учир нь сүүлийн үед манай улсын эдийн засгийн хурдтай өсөлт, өргөн боломж нь гадны улсуудад танигдаж байгаатай  холбоотой аж. 
 
Тиймээс "CNN" агентлаг өнөөдрөөс эхлэн “Eagle News” телевизийг Монгол дахь албан ёсны түншээрээ сонгож, цаашид хамтран ажиллахаар болов. Ингэснээр цаашид Монгол улсад дахь үйл явдлын мэдээ "CNN" агентлагаар дэлхийн даяар түгэж эхлэх боломж нээгдэж байгаа юм.

Энэ ажлын хүрээнд CNN-ийн шилдэг хөтлөгч, сэтгүүлч, продюссорын баг Монголд ажиллаж байна. Тэдний дунд “CNN international”-ийн Хонг Конгийн салбарын сэтгүүлч, хөтлөгч, Хонг Конг, Лондон, Нью-Йоркийг холбосон санхүү, эдийн засгийн мэдээлэл хүргэдэг “World Business Today ” нэвтрүүлгийн хамтран хөтлөгч, нэр хүндтэй сэтгүүлч Паулин Чью, “Emmy awards”-ийн 5 удаагийн шагналт, CNN-ийн брэнд продюсер, Аманпурын “Цөмийн зэвсэгтэй Иран” болон Ойрхи Дорнодод болж байгаа асуудлаар брэнд хөтөлбөрүүдийн зохиолыг бичсэн Дэвид Молко, Ази, Номхон далайн бүсийн CNN-ийн салбарын Ерөнхий продюсер, “Emmy awards”-ийн шагналт Арми Жарин-Беннет зэрэг алдартай сэтгүүлчид иржээ. Эдгээр хүмүүс өчигдөр ирсэн бөгөөд маргааш буцна. Энд байх хоёр хоногийн хугацаанд тэд “Eagle News” телевизийн 30 гаруй сэтгүүлч, уран бүтээлчдийн дунд мэргэжлийн арга зүйн сургалт явуулах юм байна. Сургалтаар мэргэжлийн сэтгүүлч зүйн талаарх ойлголтыг нэмэгдүүлэхээс гадна мэдээ мэдээлэл, нэвтрүүлэг бэлдэхэд хэрэгтэй бүх туршлагаасаа зааж, сургах аж.

Бидний зорилго бол "СNN"-ээс суралцах. Боломжтой бол CNN-ийн түвшин рүү очих гэж “Монгол масс медиа” группийн гүйцэтгэх захирал А.Амундра хэлэв.

Eagle news телевизийн гүйцэтгэх  захирал Б.Сэлэнгэ: Өнөөдрөөс бидний албан ёсны хамтын ажиллагаа эхэлж байгаад баяртай байна. Манай телевиз продюсингийн системд шилжиж, тогтсон брэнд нэвтрүүлгүүдтэй боллоо. 2014 онд гурван удаагийн сургалт зохион байгуулахаар төлөвлөсөн. Цаашдаа CNN-ийн нэвтрүүлгийг албан ёсоор монголын  үзэгчдэдээ хүргэнэ.

CNN-ийн брэнд продюсер Дэвид Молко: Eagle News телевизийн хамт олонтой  хамтран ажиллах болсондоо баяртай байна. Eagle News телевизийн сэтгүүлчдэд  хийх сургалтаар тэдэнд хэрэг болохуйц  санаа, арга барилыг танилцуулна. Өөрсдийн ажилладаг орчиндоо  ямар зарчмаар мэдээ, мэдээллээ бэлтгэдэг талаар туршлагаасаа хуваалцаж, сэдэвчилсэн байдлаар сургалтаа явуулах юм.

“CNN international”-ийн Хонг Конгийн салбарын сэтгүүлч, хөтлөгч Паулин Чью: Энэ  томилолтыг аваад  сэтгэл их хөдөлсөн. Анх удаа Монгол Улсад ирээд байна. Онгоцноос буухад -21 хэмийн хүйтэн байсан. Харин  энэ нь  Монголчуудад тийм ч хүйтэн биш гэж сонсоод гайхсан шүү. Хоёр өдрийн турш  Eagle  News телевизийн сэтгүүлчидтэй бүх туршлагаа хуваалцахад бэлэн байна.

“CNN international”  нь дэлхийд тэргүүлэгч мэдээллийн суваг. Хорин дөрвөн цагийн турш мэдээ мэдээллийг тасралтгүй хүргэдгээрээ анхдагч нь болж чадсан төдийгүй эх сурвалжийн баталгаатай байдлаараа хамгийн нэр хүндтэй, хүмүүсийн итгэл найдварыг хүлээж чадсан брэнд юм. Тэд мэдээ, мэдээллийг хил хязгааргүйгээр цуглуулж сэтгүүлч, шинжээчдийн багаараа дамжуулан шинжлэн боловсруулж цацдаг.