"Автобус 1" компанийн ажилчид ажлаа хаяад хоёр өдөр болж байна. Тэдний тавьж буй шаардлагууд зөвхөн цалин бус, шийдвэл зохих нийгмийн хамгааллын олон асуудал байгаа юм. Ажилтнууд эхний ээлжинд дараах таван зүйлийг шаардаж ҮЭ-ээр дамжуулан удирдлагууддаа хүргүүллээ. 1. Хөдөлмөрийн норм үндэслэлгүй өндөр байгаагаас ажилчид аваар осол хийх, анхаарал болгоомж алдах аюултай байгаа учир хөдөлмөрийн нормыг үндэслэлтэй тогтоож бууруулах.
2. Цалин хөлсийг зөв бодох, хууль бус суутгал хийхгүй байх, түлш шатахуун ажилчдаар төлүүлэх байдлыг таслан зогсоох.3. Тулгамдсан асуудлуудыг хамтын гэрээ хэлэлцээрээр өөрчлөлт оруулж шийдвэрлэх.
4. Компанийн бүх удирдлагуудад хариуцлага тооцож, мэргэжлийн багаар солих, захиргааны зарим орон тоог цомхотгох.
5. ҮЭ-ийн байгууллагатай хамтран үйл ажиллагааг дэмжиж ажилладаг болгох.Ажилчид ҮЭ-ийн хороогоор дамжуулж цалин хөлс, норм норматив, нийгмийн асуудлын удаа дараа санал бодлоо илэрхийлдэг ч бүрэн шийдэгддэггүй ба бүр ажилчдын төлөөллийг ил далд хэлбэрээр дарамтлах, сахилгын шийтгэл ногдуулах, ажлаас халах зэрэг зүй бус үйлдлийг удаа дараа гаргасан хэмээн ажилтнууд хэлж байна.
Т.Хулан
