Төрийн ордны баруун талд баригдаж буй Төрийн тусгай албан хаагчдын эмнэлэгт зориулан гадаадаас авчирсан MRI болон CTI аппарат өчигдөр шөнө дэлбэрсэн гэсэн мэдээлэл байна. Уг нь тус аппаратыг Төрийн тусгай албан хаагчдын шинээр баригдах эмнэлэгт хэрэглэнэ гэж байсан ч уг барилгыг өөр зориулалтаар ашиглах шийдвэрийг Хууль зүйн сайд Х.Тэмүүжин гаргасанаас болж аппарат эзгүйдэж одоог хүртэл баригдаж буй өргөтгөлийн байранд байрлаж байна. Харин аппаратыг  өнгөрсөн  хугацаанд  хариуцаж байсан эзэн  “Пролианс” ХХК. Тус компани нь аппаратыг Монголд оруулж ирсэн юм. 

Харин аппарат дэлбэрсэн эсэх талаар тэндхийн иргэд бага хэмжээний хөх туяатай гал гарч, их чимээ гарсан хэмээн ярьж байна. Тэгвэл ЦЕГ-аас  "Барилгын хавтан цахилгааны утсан дээр унасан" гэсэн тайлбарыг өгөв.

Харин уг аппаратыг хариуцаж буй “Пролианс” ХХК-ийн зүгээс "21.00 цагийн орчимд гар удирдлагатайгаар хийг гадагшлуулахад даралттай байгаа. Тэр нь буудаж, дэлбэрч байгаа юм шиг дуу гардаг юм" гэсэн тайлбарыг хэллээ. Өөрөөр хэлбэл тус аппаратын тогийг тасалснаас болж хий нь гадагшилсаны улмаас их хэмжээний дуу гарчээ. Тус хий нь хүний биед хоргүй юм байна.

MRI бол хавдар, мэдрэл, зөөлөн эдийн гэмтлийг маш сайн оношилдог 3.2 тэрбум төгрөгийн үнэтэй аппарат бөгөөд  Монгол улсад байгаа хамгийн өндөр хүчин чадал бүхий эмнэлэгийн төхөөрөмж аж. Уг аппаратыг өнгөрсөн хугацаанд ашиглаагүй ч  хэвийн ажилуулж байсан гэнэ.  Өөрөөр хэлбэл энэхүү барилгын  жинхэнэ эзэн тодрох хүртэл уг аппаратыг “Пролианс” ХХК арчилж байх юм байна. Гэхдээ одоогоор уг аппаратыг хэн авах нь тодорхойгүй байгаа хэмээн “Пролианс” ХХК-ийн удирдлагуудын зүгээс хэлж байна.

Т.Энхэлээ