Өчигдөр Нийслэлийн мэргэжлийн хяналтаас барилгуудад шалгалт хийсэн нь нэлээн олон асуудлыг ил гаргалаа. Юутай ч  хариуцлагагүй ажиллаж байгаа  “Эф-Ай-Кэй-Эй-Эн-Жи” ХХК,  “Юнико констракшн”, “Амеро оргил” ХХК, “Оточ ноёдууд” ХХК, “Форус алюмуниум” ХХК –иудын үйл ажиллагаа хаагаад байгаа юм. Тэгвэл он гарсанаас хойш цахилгаан шатны хонгилд хүн унаж гэмтсэн тохиолдлыг ч НМХГ-аас онцлон дурдлаа. Энэ үеэр Нийслэлийн мэргэжлийн хяналтын газрын дэд дарга М.Баасандоржоос зарим зүйлийг тодрууллаа.

- Барилгын лифтний хонгил руу хүн унаж нас барьж тохиолдол цөөнгүй байдаг. Энэ шалгалтаар лифнээс зөрчил гарсан уу?

- Шалгалтанд хамрагдсан хотхонуудын болон орон сууцны барилгуудад угсрагдсан 67 лифтнээс одоогийн байдлаар 59 лифт хэвийн ажиллагааг хангасан байгаа. Харин долоон лифт ажиллахгүй байна. 

- Барилгын компаниуд чанаргүй материалаар барилга барьж байна гэж байна. Барилга ажил хийгдэж байгаа явцад хяналт шалгалт хийдэггүй юм уу? 

-Барилгын материал асуудал хурцаар тавигдаж байгаа. Энэ асуудлыг Барилга хот байгуулалтын яаманд  хүргүүлж байгаа. Мэргэжлийн хяналтын байгууллага ганцаараа гүйгээд  дийлэхгүй байна. Угсралт явагдаж байгаа барилга дээр хяналт тавьж байна. Харин барилгын материал дээр хяналт тавьх хүн хүчин хомс учраас хяналт тавьж чадахгүй байгаа.  

-Цаашид мэргэжлийн хяналтын газар барилгын салбарт үйл ажиллагаа явуулж байгаа компаниудтай яаж ажиллах вэ?

-Барилгын салбарт ажиллаж байгаа нөхдүүдтэй яаж хамтарч ажиллах талаар Мэргэжлийн хяналтын зөвлөлийн хурлаар оруулж тодорхой хэдэн шийдвэр гаргасан байгаа. Тухайлбал, эрх зүйн баримт бичиг зохицуулалтыг нэлээд төгс болгох хэрэгтэй. Энэ асуудал дээр Барилгын хот байгуулалтын яам, Хөдөлмөрийн яам хамтарч ажиллаж, бичиг хэргийг боловсронгуй болох хэрэгтэй гэсэн шийдэлд хүрсэн. Мөн өвлийн улиралд үйл ажиллагаа  явуулж байгаа барилгын компанийн хариуцлагын асуудал хамгийн гол юм. Үүнд хүний нөөц, боловсон хүчний асуудал, техник тоног төхөөрөмжийн асуудал дээр анхаарах хэрэгтэй байна. Сүүлийн үед тодорхой бичиг баримтгүй, шинээр нэвтэрч орж байгаа тоног төхөөрөмжийн аюулгүй ажиллагааны дүрэм нормны асуудлыг хангаж ажиллах хэрэгтэй гэсэн шийдэл гаргасан байгаа.

- Он гарснаас хойш барилгаас таван хүн унаж нас барсан гэх тоо баримтыг цагдаагийн байгууллагаас өгсөн. Энэ талаар?

-Энэ он гарснаас хойш барилга дээр таван хүн унаж нас барсан. Тухайлбал,  Сүхбаатар дүүрэгт барилгын ажил гүйцэтгэж буй “Өндөр буянт” ХХК, "Цаст констракшн" ХХК-ий барилгаас хоёр  ажилтан унаж нас барсан. Мөн  “Макс өргөө” ХХК –ний барилга дээр төмөр унаж гудамжинд явж байсан авто машин дээр унаж нэг хүн ам насаа алдсан. Хан -Уул дүүрэгт барилгын ажил гүйцэтгэж  байсан “Актив констракшн” ХХК –ий барилга дээр нэг ажилтан лифтны хонгил руу унаж нас барсан юм. Эдгээр хэргүүд мөрдөн байцаалтын шатанд яваа.

-“Тайгам Алтай” ХХК-ий барилгын талбай дээр  нэг ажилтан лифтны хонгил руу унаж нас барсан гэсэн үнэн үү?

-Үнэн. Хэрэг нь мөн мөрдөн байцаалтын шатанд яваа.  Мөн Хан-Уул дүүрэгт  “Ди Би Би” ХХК-н захиалагаар барьж байсан 16 давхар оффисын зориулалтай барилга дээрээс гоёлын хүрээний төмөр унасан осол бүртгэгдсэн. Уг шилэн фасадны гадна гоёлын хүрээг бэхлэх ажлыг “Форус алюмуниум” ХХК гүйцэтгэж байсан. Тус баирлгын үйл ажиллагааг улсын байцаагчийн дүгнэлтээр түр зогсоогоод  байгаа.

-Таван компаний эрхийг ямар учраас цуцалсан бэ?

- "Баянгол дүүрэгт “Эф-Ай-Кэй-Эй-Эн-Жи” ХХК,  “Юнико констракшн”, “Амеро оргил” ХХК, “Оточ ноёдууд” ХХК,  Хан-Уул дүүрэгт  “Форус алюмуниум” ХХК –иудын үйл ажиллагаа хаасан байгаа. Эдгээр компаниуд хөдөлмөрийн аюулгүй байдал, эрүүл ахуйн тухай хууль, Хөдөлмөрийн тухай хуулийн холбогдох заалтыг хэрэгжүүлж ажиллагаагүй.  Мөн арван аж ахуйн нэгж байгууллагад 5.5 сая төгрөгийн шийтгэвэрийн арга хэмжээ авсан.