Төрийн эсрэг хуйвалдаан зохион байгуулсан нэрийдлээр хоёр жил шахуу хоригдоод, эцэст нь цагаадсан найруулагч, СТА Г.Бадамрагчаа өнөөдөр мэдээлэл хийлээ. Тэрбээр зохион байгуулалттайгаар гүжирдэж, өөрийг нь хэлс хэрэгт унагасан хэмээж үзэж байгаагаа энэ үеэр хэллээ. Мөн өөртэй нь зүй бус харьцаж байсан хоёр байцаагчийг АТГ, ТЕГ, УПЕГ-аар шалгуулах өргөдлөө өнөөдөр хүргэж байгаа юм байна.

-Та энэ хэргийг эхнээсээ л зохиомол, гүжирдлэгийн шинжтэй гэж үзэж байна уу?

-Хоёр жилийн өмнөөс намайг төрийн эсрэг гэмт хэрэг хийсэн гэж үзэж ТЕГ-аас баривчилж, мөрдөж шалгаад ганц худагт гурван сар хорьж байсан. Хоёр жилийн хугацаанд нэлээд зовоосон. Тэгээд энэ оны хоёрдугаар сарын 28-нд болсон шүүх хурлаар уг хэргийг хэрэгсэхгүй болгож намайг цагаатгасан. Энэ бол эхнээсээ зохиомол, гүжир гүтгэлэгийн чанартай хэрэг байсан. Тиймээс би Тагнуулын ерөнхий газар, Авилгатай тэмцэх газар, Монгол улсын Ерөнхий прокурорын газарт өргөдөл гаргаж байна. Өргөдөлийн утга нь энэ зохиомол хэргийг надад тулгаж байх явцдаа мөрдөн байцаагч Энхтөр, Цогтбаатар нарын хүмүүс Эрүүгийн байцаан шийтгэх хууль, Үндсэн хууль гэх мэтчилэн хууль тогтоомж зөрчиж, дарамталж, зовоож янз бүрийн аргаар мэдүүлэг авч байсан асуудлыг шалгуулах зорилготой. Энэ өргөдлөө чимээгүй аваачаад өгчихгүй хэвлэлийнхэнд хандаж байгаа маань дээрх хүмүүс яахаас ч буцахгүй хүмүүс учраас сэрэмжилж байгаа хэрэг. Энэ өргөдлийг өгснөөр миний амь нас, гэр орны аюулгүй байдалд заналхийлэх магадлал өндөр байгаа юм.

-Та яагаад тэр хүмүүсийн зүгээс дарамт ирж  магадгүй гэж үзээд байгаа юм?

-Учир нь хоёр жилийн хугацаанд энэ хүмүүсийг ямар хүмүүс вэ гэдгийг би мэдсэн. Намайг яаж дарамталж, ямар байдлаар ажлаа хийдэг гэдгийг ч мэддэг болсон учраас. Би ямар нэг хүний мууг үзэх гэсэндээ биш иймэрхүү арга ажиллагаатай нөхдүүд хуулийн, тагнуулын байгууллагад байх ёсгүй юм. Ийм хүмүүс байгаа нөхцөлд цаашид олон хүнийг хэлмэгдүүлэх магадлал өндөр байгаа гэдгийг зориуд цохон тэмдэглэж байна.

-Шүүхийн шийдвэр гарсаны дараа ямар нэг дарамт шахалт ирсэн үү?

-Нууц дугаараас залгах, чагнах гэх мэтчилэн асуудлууд байдаг. Энэ болгоныг шалгуулах хүсэлт өгсөн газрууд шалгаад эхлэхээр дэлгэрэнгүй мэдээлэл өгнө гэсэн бодолтой байна.

-Таниас байцаалт авч байхдаа буу, хутга тулгаж байсан гэж үнэн үү?

-Байнгын буу тулгаж мэдүүлэг авч байсан. Надтай хамт шалгуулж байсан О.Цэнгэлийг бол хөдөө хээр аваачиж цаазлана гэж ч сүрдүүлж, толгойд нь буу тулгаж хий буудсан гэж ярьдаг. Тэрийг бол сайн мэдэхгүй.

-Ер нь яг ямар үндэслэлээр шалгаж байгаа гэж таньд хэлж байсан?

-Би одоо суллагдчихсан хэрнээ ч намайг ямар учраас шалгаж байсныг ойлгоогүй. "Цагдаагийн тангараг 2" кинотой нэг хэсэг нь нэлээд холбосон. Тэн дээр хүүхдүүдтэй бэлтгэл хийж байсныг бараг л сургуулилт хийж байсан утгатай юм болгочихсон. Хэвлэл мэдээллээр бол намайг янз бүрээр л бичсэн. Эхнэр хүүхдээс минь хэд салуулж, эмнэлэгт хэвтүүлээд л байсан. Уг нь миний амьдрал тусдаа шүү дээ. Энэ бүхнийг би хөндлөнгөөс харж байсан ч энэ хэргийг маш нууц гэсэн учир би олонд мэдээлээгүй. Хэрвээ задруулвал улсын нууц задруулсан хэргээр эргүүлээд шүүхэд татна гэсэн байдлаар хандаж байсан. Тиймээс би амаа үдүүлчихсэн юм шиг байсан. Одоо бол цагаадаад, хэрэг биш байсан нь нотлогдсон шүү дээ.

-Хоёр жил гаруйн хугацаанд бүх зүйлээрээ хохирлоо шүү дээ. Хохирлын нөхөн төлбөрийг яах вэ?

-Нэхэмжлэл, өргөдөл гаргах ажлыг дараа дараагийн шатаар явна. Одоохондоо ямар ч нөхөн олговор гэж яригдаагүй байна.

-Таны эхнэр хамгийн анх цагдаагийн байгууллагад өргөдөл өгсөнөөр таныг шалгаж эхэлсэн гэх мэдээлэл байсан?

-Тийм зүйл ерөөсөө байхгүй.

-Таныг бас киноны тендерийн асуудлаар хөөцөлдөөд яваа гэж сонссон. Ямар учиртай юм бэ?

-2012 онд тухайн үеийн БСШУЯ-наас түүхэн киноны тендер шалгаруулах уралдаан зарласан. Тэгээд би тавдугаар сарын 7-ны өдөр "Модун Шаньюй" киноныхоо материалыг тэнд өгчихөөд явж байгаад баригдаж, ганц худагт гурван сар хоригдсон. Энэ хугацаанд нөгөө уралдаанд манай кино шалгараад, 220 сая төгрөгний тэтгэлэг улсаас авах ёстой болсон юм билээ. Ингээд тухайн үед сайд байсан Ё.Отгонбаярын тушаал гарсан байдаг. Тэгээд би наймдугаар сарын зургаанд батлан даалтад гарч ирээд энэ уралдаанд шалгарснаа мэдээд хөөцөлдөөд явахад БСШУЯ байхгүй болоод ССАЖЯ байгуулагдаж хөл толгой нь мэдэгдэхгүй байсан. Тэгэхэд надад “Хариуцсан газрын дарга чинь томилогдоогүй байна. Томилогдохоор наад асуудлаа ярь гэсэн. Улмаар Н.Оргил гэгч үүрэг гүйцэтгэгчээр томилогдсон байхаар нь түүнтэй очиход уулзсан. Тэрбээр “Чи гэмт хэрэгт холбогдсон юм байгаа биз дээ. Юу солиороод байгаа юм. Энэ тендер хүчингүй ” гэсэн хариулт өгсөн. Шүүхээс намайг  гэм буруутайг тогтоогоогүй байхад гэм буруутайд тооцох ёсгүй байдаг шүү дээ.  Гэтэл энэ хүн намайг гэмт хэрэгт холбогдсон, тендер хүчингүй гэж байгаа нь юу гэсэн үг. Хэрэг маань хүртэл цагаатчихсан байхад. Гэхдээ логикоор бодоод үзэхэд 220 сая төгрөгний төлөө зохиомол хэрэг үүсгэсэн байхыг үгүйсгэхгүй.

-Тендерийн мөнгөө олж авах гэж явж байгаа гэсэн үг үү?

-Энэ тендерийн асуудлын хэн, хэзээ хүчингүй болгочихов. Тэр төсөвлөгдсөн 220 сая төгрөг хаачив гэдэг асуудлаар мөн АТГ, ШӨХТГ, ССАЖЯ-ны сайд, Төрийн нарийн бичгийн дарга, шинээр томилогдсон газрын дарга нарт албан ёсоор хариу өгнө үү гэсэн хүсэлт явуулж байна.

-