“Ерөнхий сайд-30 минут” ээлжит уулзалт өнөөдөр боллоо. Ерөнхий сайд Н.Алтанхуяг уулзалтын эхэнд Ховд аймагт шатахууны үнэ 100 төгрөгөөр буурсан таатай мэдээллийг дуулгасан юм. Мөн Ерөнхий сайдын багцын 50 тэрбум төгрөгийн 30 гаруй тэрбум төгрөгөөр нь 11 аймгийн төвд оношлогооны лаборатори ашиглалтад оруулсан, аймгуудад Битүү зах ашиглалтад оруулсан зэрэг бүтээн байгуулалтад зарцуулж байгаа гэв. Тэрээр дараа нь сэтгүүлчдийн сонирхсон асуултад хариулт өгсөн юм.

-Орон нутгийн хөгжлийн сангийн хөрөнгийн зарцуулалтад хэрхэн хяналт тавьдаг вэ. Тухайлбал Дорнод аймагт 2013, 2014 онд  Засаг дарга болон ИТХ-ын даргадаа орон нутгийн хөгжлийн сангийн хөрөнгийн мөнгөөр автомашин авч өгөхөөр суулгажээ. Та үүнийг мэдэж байна уу?

-Орон нутгийн хөгжлийн сангийн мөнгө гэж өнгөрсөн жил 240 орчим тэрбум төгрөгийг аймгуудад өгсөн. Ингэхдээ иргэдийн хэрэгцээ шаардлагад тохирсон зүйлийг иргэдээрээ хэлэлцүүлээд мөнгөө зарцуул гэж хэлсэн. Тэр мөнгө дээр эндээс хяналт тавьж байгаа юм байхгүй. Уг нь хууль, журмаараа иргэдээрээ хэлэлцүүлээд иргэдийн хийе, бүтээе гэсэн зүйлд зарцуулах мөнгө л дөө. Гэтэл дарга нар машин аваад уначихсан гэж байна. Энэ бол  хууль зөрчсөн үйлдэл. Шалгаад буруу, зөв нь тогтоогдвол хариуцлага тооцно. Энэ мэтчилэн улсын төсвийн мөнгийг үрэн, таран хийж байгаа үйлдлийг өдөр болгон илрүүлж байна. Одоо 243 объектыг царцаасан байгаа. Энэ нь 700 гаруй тэрбум төгрөгийн өртөгтэй байсан. Тийм учраас аудитын газрын дүгнэлт хийсэн. Тухайлбал, Улсын комисст хүлээлгээд өгчихсөн 9 барилга дээр нэмээд 1,7 тэрбум төгрөг тавьсан үйлдэл ч байна.

-Дорнод аймагт УИХ-ын дарга З.Энхболд даргыг очиход зөвхөн нэг оройны хүлээн авалтын мөнгөнд 6 сая 568 мянган төгрөг, Ерөнхий сайд Н.Алтанхуягийг очиход оройны хүлээн авалтад 4 сая 625 мянган төгрөг зарцуулсан байна. Эдгээр мөнгө хаанаас гардаг вэ?

-Бид нар очоод тийм их зардал гаргадаггүй шүү дээ. Бодвол аймгийн төвлөрсөн арга хэмжээний зардлаас л гардаг байх. Засгаас бас мөнгө гаргадаг.

-Говьсүмбэр аймгийн хууль бус томилгооны талаар таныг Үндсэн хуулийн цэцэд өгсөн байна. Энэ талаар таны байр суурь ямар байна вэ?

-Шүүх, цэцэд өгдөг үйлдэл чинь өдөр бүхэн болж байх шиг байна. Намайг жил 7 сар ажиллахад хэдэн ч удаа шүүх, цэцэд өгөв. Говьсүмбэрийн асуудлыг би мэдэхгүй байна. Надад тийм юм ирээгүй. Манай улсад хичнээн их завхарсан юм болж байгааг ганц жишээгээр хэлье. 2013 оны 11 дүгээр сарын 25-нд аймгийн ИТХ нь хуралдаад “бид Засаг даргаа огцруулчихлаа. Одоо энэ нөхрийг батламжилж өг” гэсэн. Тэгээд би батламжлаад явуулчихсан. Гэтэл 10 хоногийн дараа надаар тоглож байгаа юм шиг аймгийн ИТХ-ын  8 дугаар хуралдаанаараа өмнөх тогтоолоо хүчингүй болсонд тооцсугай гээд дарга Буджав гэсэн гарын үсгээ зурчихсан байна. Тэгээд энэ бичгээ манай Хэрэг эрхлэх газарт ирүүлээгүй байгаа юм. Ингээд Сүхбаатарыг огцруулсан нь Алтанхуягийн буруу гээд надтай шүүхдээд явчихсан байгаа юм. Уг нь энэ хоёр хурлынхаа үнэн зөвийг ярих ёстой биз дээ.  Гэтэл хэд хоногийн өмнө манай хуулийн хүн “нөгөө огцруулсан хүнийг буцаагаад ажилд нь тавьчихсан” гэж байна. Хэн тавьчихваа гэсэн чинь шүүх тавьсан гэнэ. Ийм завхарсан юм орон нутагт болж байна.

-Өнгөрсөн долоо хоногт Рос нефтийн удирдлагатай уулзсан. Сүүлийн мэдээллээр ОХУ хилээр гаргадаг шатахууны үнээ нэмсэн гэсэн байна?

-Роснефтийн удирдлага ирээд уулзсан. Тэд “Бид Монголд урт хугацаанд тогтвортойгоор бензин, дизелийн түлш нийлүүлмээр байна” гэж хэлсэн. Бид түүнийг нь дэмжсэн. Түүнээс биш бензиний татвар нэмэх тухай яриагүй. Шатахууны үнэ харьцангуй тогтвортой байгаа шүү дээ. Тэд мөн шаардлагатай бол Монголд газрын тос эрж, хайж олборлоё гэж хэлсэн. Үүнийг би эрүүл үзэгдэл гэж бодож байгаа.

-Х.Баттулга сайд Украины асуудлаар байр сууриа илэрхийлсэн. Үүнд Засгийн газар ямар байр суурьтай байгаа вэ?

-Нэг хүний үзэл бодол Засгийн газрын байр суурь биш. Бид шаардлагатай бол байр сууриа илэрхийлнэ. Шаардлагагүй бол тэгэхгүй. Хэн байр суурь илэрхийлэх вэ гэдэг нь бас өөрөө тодорхой хүн, институтаар дамжигдаж илэрхийлэгдэх байх. Нэг сайдын хэлсэн үг бол Монгол Улсын байр суурь биш шүү дээ. Түүнийг тухайн хүний өөрийнх нь бодол санал гэж л ойлгох учиртай.

-Хилийн боомтын хураамжийг нэмнэ гэсэн яриа байна. Энэ үнэн үү?

-Тийм зүйл яриагүй.