Харааны бэрхшээлтэй хүүхдийн тусгай сургууль болох 116 сургуулийн захирал С.Энхтуяатай  тухайн сургууль дээр үүсээд байгаа зөрчил маргааны талаар ярилцлаа.

-Танай сургуулийн багш ажилчид Солонгос улс руу явахдаа цалингийн зээл авч, түүнийхээ өрийг дарахын тулд хүүхдүүдийг хөдөлмөрийн мөлжлөгт оруулсан гэх юм. Энэ талаар? 

- Өнгөрсөн 2011  онд Олон улсын соёл найрамдалын урилгаар  анх удаа манай сургуулийн хүүхдүүд Солонгос улсад очиж тоглох боломж гарсан юм. Солонгос улс руу  явах гэж байхдаа Боловсролын яамандаа албан бичиг хүргүүлсэн. Гэвч яамнаас ямар ч санхүүгийн дэмжлэг үзүүлээгүй. Ингээд бид бизнесийн байгууллагад хандсан. “Монгол болгар”, “Оюутолгой” гэсэн компаниудаас хүүхдүүдийн зардал ирсэн. Мөн хандиваар нэг сая 800 мянган төгрөг орж ирсэн. Харин үлдсэн 15 сая төгрөгийг багш ажилчид цалингийн зээл авч явсан байгаа. Нийтдээ багш сурагчид нийлсэн 22 хүн явсан. Мөн  2011 оны “Дэлхийн цагаан таягтан”-ы өдөр буюу аравдугаар сарын 15- ны өдөр UB паласт тоглолтыг нь зохион байгуулсан. Энэ тоглолтоос олсон мөнгөөс цалингийн зээлийн тодорхой хувь төлөгдсөн байгаа. Цалингийн зээл өнгөрсөн дөрөвдүгээр сард төлөгдөж дууссан.

-Тоглолтоос олсон ашиг орлогоос хүүхдүүдэд өгдөггүй. Хоёр хүүхдэд л 100 мянган төгрөгийн хувцас авч өгсөн гэсэн. Энэ тал дээр ямар байр суурьтай байна?

-Тодорхой хэмжээний мөнгө өгдөг байсан. Сургуулийнхаа хүүхдүүдийг хоёр удаа витаминжуулсан, тоглолтод оролцсон хүүхдүүддээ хоёр удаа урамшуулал олгосон байгаа. Төгсөх ангийн хоёр хүүхдэд хонхны баярынх нь хувцсыг авч өгсөн. 

-Тоглолтыг танай сургуулиас тогтмол зохион байгуулдаг юм уу?
-Албан ёсоор зохион байгуулсан тоглолт UB паласт болсон. Харин бусад газарт урилгаар очиж тоглосон байгаа. Өнгөрсөн жил “Хөгжлийн бэрхшээлтэй иргэдийн оролцоог бодит болгох” сарын аяны хүрээнд Хөвсгөл  аймагт болсон чуулга уулзалтанд  манай сургууль болон 29 дүгээр сургуулийн хүүхдүүд урилгаар оролцсон. Энэ үеэр  Хөвсгөл аймгийн тамгын газар, нийгмийн хөгжлийн хэлтсээс манай сургуулийн сурагчдад санал тавьсан.  Энэхүү саналын дагуу манай сурагчид тоглолтоо хийсэн байгаа.

-Нэг удаагийн тоглолтыг хэдэн төгрөгөөр хийдэг  байсан вэ?
 -1500-2000 төгрөгийн хооронд хийдэг. Манайх Монгол Улсын хэмжээнд үйл ажиллагаа явуулж байгаа сургуулийг нэг. Элсэлт хангалтгүй байдаг. Манай улсын хэмжээнд хоёр мянга гаруй харааны бэрхшээлтэй хүүхэд байгаа гэсэн судалгаа байдаг. Үүнээс 80-90 хүүхэд сургуульд сурч байгаа.  Хэн нэгийг чадах гэсэн үйл ажиллагаандаа сургуулийн нэр төрийг ашиглаж байгаад нь харамсаж байна. Энд ганцхан  Энхтуяа гэдэг хүний асуудал биш, бүхэл бүтэн сургуулийн нэр төр явж байгаа шүү дээ. 

-Таныг сургуулийнхаа багш ажилчид сурагчидтай зүй бусаар харьцаж, багш ажилчдаа ажлаас халсан гэсэн. Нийт хичнээн багш ажилчдыг халсан бэ?
-Няравоор ажиллаж  байсан С.Хотхүүг  ёс зүйн бус асуудал гаргасан учраас ажлаас халсан байгаа. Харин мэдээлэл хийгээд байгаа Жанибек гэдэг залуу өөрийн хүсэлтээр ажлаас гарсан. Гэтэл ажлын байрны дарамтаас болж гарсан гэж ярьж байна лээ. Эдгээр хүмүүс ямар шалтгаанаар ингэж худал  мэдээлэл хийгээд байгааг гайхаж байгаа. Надад идэж ууссан зүйл байхгүй, шалгуулахад бэлэн байна. Эдгээрийг худал мэдээлэл хийж, сургуулийн  болон хувь хүний нэр хүнд  халдсан гэдэг үндэслэлээр шүүхэд өгнө.

 -Сургуулийн засварын хоёр сая төгрөгийг “Тансаг обой” ХХК руу шилжүүлж, түүгээр зөвхөн сургуулийн үүдний хэсгийг тохижуулсан. Үлдсэн мөнгийг өөртөө авсан гэх юм?

-Энэ мөнгийг би шилжүүлдэг юм биш. Захиргааны зөвлөлөөр ярилцаад урсгал зардлаараа сургуулийн үүдийг зассан байгаа. Хааш нь яаж шилжүүлдэг гэдгийг нярав, нягтлан шийддэг юм. Шалгах ёстой газар шалгаж үнэнийг тогтоох байлгүй дээ.

-Энэ жил танай сургуульд нийслэлийн Боловсролын газраас шалгалт хийсэн гэсэн. Шалгалтаар ямар дүгнэлт гарсан бэ. Таны эсрэг дэлгэж байгаа асуудлыг шийдээгүй юм уу?

-Нийслэлийн боловсролын газраас хоёрдугаар сард шалгалт ирсэн. Тэр үеэр би сургалтад явчихсан байсан.  Шалгалтын хариу одоогоор ирээгүй байгаа.  Тэр үед Нийслэлийн боловсролын газар, цагдаагийн  байгууллагад  манай сургуулийн хашаанд байгаа контейнеруудын талаар мэдээлэл өгсөн байсан. Түүний дагуу нягтлан бид хоёр очиж мэдүүлэг өгсөн.

-Яагаад танай сургуулийн хашаанд  барилгын материалын хадгалдаг контейнер байгаа юм бэ?

-Долоон контейнер байгаа. Эдгээрийг нүүлгэх асуудлыг байнга тавьдаг. Гэвч нүүлгэдэггүй. Би өөрөө байрлуулсан юм биш ээ.

 -Төрөөс санхүүжилт хэр өгдөг вэ?
-Өнгөрсөн 2007, 2008 онуудад санхүүжилт бараг өгдөггүй байсан гэж болно. Харин өнгөрсөн жил 370 сая төгрөгийн хөрөнгө  оруулалт орсон байгаа. Боловсролын яамнаас  дэмжиж техник тоног төхөөрөмжинд зориулж 20 сая төгрөг өгсөн байгаа.  Мөн хүүхэд бүрийг хөгжүүлэх Шинэчлэлийн Засгийн газрын бодлогын хүрээнд авьяас хөтөлбөрийг хөгжүүлэхээр арван сая төгрөг өгсөн. Энэхүү арван сая төгрөгөөр үндэсний хөгжим авсан.