Эх, үрсийн баяраар замын цагдаагийн алба хаагчид хэрхэн ажиллах, эцэг, эхчүүд юуг анхаарах нь зүйтэй вэ гэх зэрэг цаг үеийн асуудлаар Нийслэлийн замын цагдаагийн урьдчилан сэргийлэх хэлтсийн мэргэжилтэн, цагдаагийн ахлах дэслэгч Э.Энхболдтой ярилцлаа.

-Хүүхдээ буруу тээвэрлэсэн эцэг эхчүүдэд торгох арга хэмжээ авч эхлэхээр болсон гэсэн. Энэ талаар эцэг, эхчүүдэд мэдээлэл өгөхгүй юу?

-Нийслэлийн засаг даргын 2014 оны хоёрдугаар сарын 17-ны өдрийн А92 тоот захирамж байгаа.  Энэ захирамжаар бага насны хүүхэд нийслэл хотод автомашин дотроо зорчиж яваад осол аваарт орох явдал их байна. Үүнтэй холбоотойгоор бага насны хүүхдийг буруу тээвэрлэж байгаа жолооч нарт тооцох хариуцлагыг нэлээд өндөржүүлье гэх үүргийн Нийслэлийн замын цагдаагийн газарт өгсөн.  Энэ үүргийн дагуу Замын хөдөлгөөний дүрмийн 2.3Б дээр хамгаалах бүсээр тоноглогдсон автомашины жолооч нь хамгаалах бүс хэрэглээгүй зорчигч тээвэрлэхийг хориглоно гэсэн заалт бий. Мөн Замын хөдөлгөөний дүрмийн 21Е, Б дээр гурав хүртэлх насны хүүхдийг харгалзах хүнгүй тохиолдолд хамгаалалтын суудал дээр тээвэрлэнэ гэсэн заалт байгаа. Тэгвэл энэ хоёр заалтыг зөрчсөн жолооч нар дээр замын цагдаагийн газраас захиргааны хариуцлагын тухай 25.5-д заасны дагуу торгуулийн арга хэмжээг тооцож эхлэхээр болсон.

-Яг ямар зөрчлүүд дээр арга хэмжээ авах талаараа дэлгэрүүлэхгүй юу?

-Хүүхдийг автомашин дотроо хамгаалах бүсгүй тээвэрлэж явах, бага насны хүүхдийг зориулалтын суудал дээр суулгаагүй эцэг, эх нь тэврээд явж байдаг зөрчлүүд дээр арга хэмжээг тооцож ажиллана.

-Хэзээнээс энэ дүрэм, журмыг мөрдөж эхлэх вэ?

-Өмнө нь хүүхдээ зөв тээвэрлэх ёстой гэдгийг хангалттай ярьж, сурталчилж байсан. Дээрх дүрэм, журам үүргийн зургаадугаар сараас эхлээд шаардана. Тэгэхээр та хүүхдээ буруу тээвэрлэвэл торгуулах байдалд хүрнэ гэсэн үг. Энэ нь хүүхдийг эрүүл, аюулгүй зорчих эрхийг хангах үүрэгтэй юм.

-Торгуулийн мөнгөн дүн хэд байх вэ?

-Захиргааны хариуцлагын тухай хуулийн 25.5-д зааснаар цагдаагийн шалгах төхөөрөмжийн тусламжтайгаар 10 мянган хүртэлх төгрөгөөр торгох шийтгэлтэй байгаа. Энэ зөрчлөө ойлгохгүй ухамсарлахгүй байгаа  болон хариуцлагагүй эцэг эхчүүдэд 6-2 жил хүртэлх хугацаагаар жолоо барих эрхийг нь түдгэлзүүлэх хүртэл арга хэмжээ авах хууль эрхзүйн орчин байдаг.

-Мэдээж энэ арга хэмжээний гол зорилго хүүхдийг аюулгүй зорчуулахад л оршино биз дээ?

-Өнгөрсөн 2013 онд 37 хүүхэд улсын хэмжээнд зам тээврийн осол хэргийн улмаас амь насаа алдсан байдаг. Үүнээс долоон хүүхэд нийслэл хотод, 30 хүүхдийн 20 нь авто машин дотроо зорчиж яваад амиа алдсан осол байгаа. Энэ бол яахын аргагүй хамгаалах бүс, суудал хэрэглэдэггүйтэй холбоотой.

Тэгэхээр хойшдоо хүүхдүүдийг эрсдлээс хамгаалахын тулд хамгаалалтын бүс, суудлыг хэрэглүүлж занших талаар шаардлагыг хүргэж байгаа нь энэ юм.

Түүнчлэн, эцэг эхчүүддээ хандаж хэлэхэд Хүүхдийн баяраар бяцхан үрсдээ чихэр жимс бэлэглэдэг. Тэгвэл үүний оронд хүүхдийнхээ сайн сайхан, аюулгүй орчинг өгч чадах хамгаалалтын суудал, хамгаалалтын бүс тохируулагч зэргийг хүүхдэдээ бэлэглэж, хэрэглүүлж хэвшүүлэх хэрэгтэй.

-Ер нь манай улсад хамгаалалтын бүс, суудал хүүхдэдээ хэрэглүүлээд заншсан иргэд тодорхой хэмжээний байгаа биз дээ?

-Хүүхдийнхээ төлөө хамгаалалтын суудал, бүсийг байнга тогтмол хэрэглэдэг эцэг, эхчүүд цөөнгүй бий. Мөн хамгаалалтын суудал, төхөөрөмжийг оруулж ирж байгаа дэлгүүр байгууллагууд ч нэмэгдэж байгаа. Тэгэхээр иргэд маань энэ бүх дэлгүүрээс хүссэн хамгаалалтын суудлаа худалдаж авч болно. Зам тээврийн осол ямагт хэн нэгний санамсар болгоомжгүйгээс гардаг учир энэ осол аваар хэний ч хүүхдийг дайрахыг үгүйсгэхгүй. Тиймээс хүн болгон хүүхдээ автомашиндаа хүүхдээ тээвэрлэдэг энэ үед хамгаалалтын зүйл заавал хэрэглэх ёстой.

-Зургаадугаар сарын 1-нд НЗЦГ өндөржүүлсэн байдалд ажиллах уу?

-Энэ өдөр Чингисийн талбай дээр хүүхдийн арга хэмжээ болох учир талбайн зүүн, баруун талыг өглөөний 11.00 цагаас 16.00 цаг хүртэл хөдөлгөөнийг хааж тэнд баярлаж эрхээ эдэлж байгаа хүүхдүүдийн аюулгүй байдлыг хангаж ажиллана. Харин эцэг эх, Хангарьд, Спортын ордон, Мэдээлэл технологийн ордон , Улаанбаатар зочид буудлын өмнөх зогсоол зэргийг ашиглаж болохоор зохицуулсан. Өөрөөр х элбэл, төлбөртэй зогсоолуудыг төлбөргүй болгох тал дээр Нийслэлийн засаг даргын захирагчийн ажлын албанд уламбалж энэ талын асуудлыг шийдвэрлээд өгч байгаа.   Түүнчлэн Хүүхдийн парк, Үндэсний цэцэрлэгт хүрээлэнд цагдаагийн байгууллагаас анхаарал хандуулна. Харин машинаа байрлуулах эцэг эхчүүд Нарны зам, Олимпийн гудамжинд автомашинаа байрлуулах явдал маш их байдаг. Тэгэхээр үүнээс болж хөдөлгөөнд саад болдог. Тиймээс бид паркийн эргэн тойрны зогсоолуудыг зохицуулж байгаа.

Дашрамд хэлэхэд, цагдаа нарын тавьсан шаардлагыг иргэд маань биелүүлж хөдөлгөөндөө зөв зохистой оролцоорой.

Д.Ундрах /24tsag.mn/