МУСТА, жүжигчин Э.Ууганбаяртай ярилцлаа. Тэрээр хамгийн сүүлд "Бондоолой фильм”-ийн бүтээл "Миний хайр" романтик уран сайхны кинонд тогложээ.  Кино энэ сарын 16-нд нээлтээ хийх юм. 

-Сайн байна уу? Юуны өмнө манай уншигчдад уран бүтээлийн сонин сайхан дуулгаач? Хэд хэдэн кинонд зэрэг тоглож байгаа гэсэн?

-Сайхан байна. Уран бүтээлийн саналууд ч их ирж байна. Олон сайхан кинонд тоглолоо. "Миний хайр"-тай нийлээд гурван уран сайхны кинонд тоглож байгаа. Бас эхний ангиуд нь батлагдчихвал цаашид 26 анги хийгдэхээр олон ангит кинонд тоглолоо. Ер нь уран бүтээлийн олз омог ихтэй байна. Сүүлийн хоёр, гурван сар үнэхээр завгүй байлаа. Ёстой л нэг киноноос нөгөө кино руу яваад, Холливудад амьдарч байгаа юм шиг л байна.

-"Миний хайр" кинонд ямар дүр дээр ажиллав?

-Хосууд аажмаар хайр дурлалынхаа үнэ цэнийг хайж эхэлдэг. Тэрийг яаж мэддэг вэ гэхээр заавал хэн нэгэнтэй харьцуулж байж мэддэг. Өөрөөр хэлбэл хайртай хүн нь үргэлж дэргэд нь байгаад байхаар хэр их хайртайгаа хэмжиж мэддэггүй. Тэгэхээр харьцуулагдах хүн гарч ирэх хэрэгтэй болно. Тэгж байж би энэ хүнд маш их хайртай юм байна гэдгээ ойлгож эхэлдэг. Товчхоноор хэлбэл хайрын үнэ цэнийг мэдрүүлэх гэсэн залуугийн дүр. Манай ерөнхий найруулагч эхлээд ярихдаа жижигхэн, ороод л гарах дүр гэж байсан. Сүүлдээ тоглох хэсэг нь нэмэгдсэн. Би сайн жүжиглэсэн юм байгаа биз /инээв/.

-Таны бүтээсэн дүрүүдийг хараад байхад хөдөлгөөнтэй бас хүүхэмсэг төрлийн залууд их тоглох юм. Үүнээс өөр дүрд тоглох юмсан гэсэн хүсэл байдаг уу?

-Байна. Хүүхэмсэг залуугийн дүрээс бусад дүрд тогломоор байна /инээв/. Ер нь хүмүүс асуудаг л даа. Та дандаа хүүхэмсэг залуугийн дүрд тоглох юм гэж.  Яахав намайг тоож байгаа нь сайхан. Хүүхэмсэг залуугийн дүрд тоглож чадахгүй хүмүүс цаагуур чинь зөндөө байна. Золбоот ах нэг удаа "Яанаа. Би одоо аав өвөөгийн дүр рүү явж байна" гэсэн байдаг. Түүн шиг цаг нь ирэх байлгүй. Тэгэхээр байгаа хугацаандаа өгөгдсөн амьдралдаа нийцэх л хэрэгтэй. Намайг хүүхэмсэг залуугийн дүрд авч байвал би тоглоно. Тэр болгоныг сайн сайхан, шинэлэг байлгахыг хичээдэг.
-Сүүлийн үед мэргэжлийн бус хүмүүсийг кинонд тоглох нь ихэссэн. Үүнийг хүмүүс янз бүрээр хүлээн авч байна. Таны хувьд?

-Үүнийг ярилцдаг л даа. Яагаад сүүлийн үеийн кино, жүжиг, клип, зар сурталчилгаануудад мэргэжлийн бус хүмүүсийг тоглуулаад байгаа юм бэ гэж. Чадаж байвал тэр хамаагүй. Адилхан зэрэглээд тоглог. Хамгийн гол нь мэргэжлийн хүмүүс тэднээс ялгарч байх хэрэгтэй юм. Тэртээ тэргүй мэргэжлийн бус хүмүүс муу тоглочихсон байвал хүмүүс "Өө энэ ёстой муу байсан" гээд хэлнэ. Кинонд тоглох чинь тухайн хүний эрх шүү дээ. Сайхан төрчихсөн амьтадыг чинь харуулах гэлгүй л яахав. Дээр үеийн бичигдээгүй хуулиуд байна. Халхын сайхан эрд тоглох жүжигчин олдоогүй учраас жолоочийг  тоглуулчихсан тохиолдол байдаг. Үүнд уурлаад чээжээ дэлдээд байх шаардлагагүй. Тэрийгээ яаж илэрхийлмээр байна вэ гэхээр тэднээс маш сайн ялгарах хэрэгтэй.

-Таныхаар монгол кино хэр сайн бэ? Үзэгчдийнхээ хэрэгцээ шаардлагад нийцэж байгаа юу?

-Сайн. Зарим хүмүүс манай кино муу байна гэдэг. Яагаад гэхээр хажууд нь ийм сайн кино байна гээд хэдэн зуун жилээрээ хөгжчихсөн улсуудтай харьцуулдаг. Гэтэл бид хөгжлөөрөө хоцорч явдаг шүү дээ. Бид киног анх хэдэн оноос мэдэж эхлэсэн юм? Холливуд киног хэдэн оноос хийж эхлэсэн юм? Тэдний араас явж байгаа гэхэд бид бараг эн зэрэгцээд явж байна. Хүлээн авч байгаа үзэгчдийн сэтгэхүй маш чухал. Өнөөдөр үзэгчдийн сэтгэхүй өндөр түвшинд очсон. Тэгэхээр тэр түвшинд нь хүрэхийн төлөө уран бүтээлч залуус хөдөлмөрлөж байна. Тэд бүтээлээ хүмүүст үзүүлж уйлуулж чадаж байна.
Баярлалаа.