Жүжигчин Б.Баярмаатай ярилцлаа. Тэрээр хамгийн сүүлд "Бондоолой фильм”-ийн бүтээл "Миний хайр" романтик уран сайхны кинонд тогложээ.  Кино энэ сарын 16-нд нээлтээ хийнэ.

-“Миний хайр” кинонд яагаад тоглох болов? Эргээд уран бүтээлдээ орсноос хойшхи анхны гол дүр байх аа?

- Тиймээ. Бараг хоёр жил ажлаа хийгээгүй. Тэр хугацаанд гэр бүлийнхэндээ санаа тавьж, дахиад хоёр хүүхэд гаргалаа. Шинэ жилийн өмнө ажилдаа орсон. Уран бүтээлдээ ороод Боловсрол телевизийн олон ангит кинонд тоглосон. Тэр хооронд Бондоолой ах яриад санал тавьсан. Ажилдаа орсоноос хойшхи анхны гол дүр л дээ.

-Хүмүүс таныг Бүжингийн дүрээр нь сайн мэднэ. Тэгвэл энэ удаад ямархуу бүсгүйн дүрээр үзэгчидтэйгээ уулзах вэ?

- Төрөө ах бид хоёр залуу гэр бүлийн төлөөлөл болсон дүр дээр ажилласан. Миний дүр бол гэр бүл зохиогоод удаагүй Заяа гээд бүсгүйн дүр байгаа. Заримдаа хүмүүс амьдралыг эхэлсэн шигээ үргэлж сайхан байна гэж төсөөлдөг. Гэтэл амьдрал санаснаар болохгүй. Ийм үед ихэнхи нь салж сарних тухай бодож эхэлдэг. Заяа бол яг тийм эгзэгтэй үе дээрээ байгаа бүсгүй. Энэ мэдээж хүмүүст сургамж болсон кино байгаа. Хүмүүс өөрсдөө ирж үзээд кинонд гарах үг, үйлдэлээс олон зүйлийг ойлгож ухаарах байх.

-Кинонд тоглохын хажуугаар айл гэрийн эзэгтэйн үүргээ хэрхэн биелүүлж байна вэ? Мэдээж хүүхэдүүддээ цаг гаргах нь багассан байх?

-Уран бүтээлч хүний ард гэр бүлийн хүн нь байдаг.  Манай хүн ажлаа хийж явах хугацаанд нь бүх ар талыг нь даагаад, ямар нэгэн асуудал гаргалгүй, стресстүүлэхгүй, ойлгож дэмжээд явдаг. Энэ миний хувьд маш том давуу тал. Нөхөр маань намайг маш сайн ойлгож дэмждэг учраас би өдий зэрэгтэй ажил төрлөө хийгээд явж байна. Хүүхдүүдээ өсгөөд хажуугаар нь ажил төрлөө хийгээд явна гэдэг амаргүй. Ялангуяа нялх хүүхдүүд бүр хэцүү. Байх үедээ үр хүүхдээ хараад арчилж тордоод явна. Ажилдаа явлаа бол нөхөр эсвэл ээж харна. Би яаж гурван хүүхдүүдээ зохицуулах вэ гэж хүндээр боддоггүй. Хүүхдүүд маань эрүүл саруул өсч бойжоод, би ажлаа хийгээд давхар давхар бүх зүйлийг амжуулж байна даа.

-Ингээд ярихаар нөхөр тань таныг маш сайн ойлгодог юм шиг санагдлаа. Нөхрийнхөө тухай яриач?

-Манай нөхөр урлагийн хүн биш. Гэхдээ урлагийн мэдрэмж сайтай. Тийм болохоор ч тэр үү кино үзэх их дуртай. Намайг үзэгчийн нүдээр харна. Өөрт нь сайхан байдаг байх гэж би боддог. Бид хоёрын дунд ажил төрлөөс үүдэлтэй маргаан гардаггүй. “Би өнөөдөр тэдэн цагаас зурагтай шүү. Чи ажлаа зохицуулчихаарай” гэхээр “Тэгье” л гэдэг. Тийм болохоор ажлын дундуур ямар нэгэн асуудал ерөөсөө гардаггүй.  Урлагт дуртай урлагийн мэдрэмжтэй хүн гэдэг цаанаа л өөр.  Үүнд  нь их баярладаг.

-Сэдвээ бага зэрэг өөрчилье. Та их урт үстэй байсан. Одоо богиноссон харагдаж байна?

-Үсээ тайрчихсан. Байнга урт үстэй байсан. Тэгээд ч манай найруулагч “Чи яахав дээ дандаа л урт үстэй байсан юм чинь энэ кинонд нэг богинохон үстэй яваад үзэхгүй юу” гэсэн. Тэгээд л тайруулчихлаа. Ер нь таалагдаж байгаа шүү.

-Таныг гурван хүүхэд төрүүлсэн гэхэд итгэмээргүй. Энэ сайхан бие галбирын нууц юу вэ?

-Эмэгтэй хүн хүүхэд гаргахаараа формоо алддаг. Үүнийг эрүүл мэнд талаас нь судлаад үзэхээр эрдэс бодисын дутагдал, стресс ядаргаанаас их болдог юм билээ. Би жирэмсэн байх хугацаандаа энэ талаар судалж байгаад таргалахгүй байх арга хэмжээ авсан. Идэж ууж байгаа хоол хүнс их анхаардаг байсан. Аль болох зөв хооллохыг хичээж  орц найрлага зэргийг нь харгалзана. Бас би гурилан юм бараг иддэггүй. Жимс ногоо түлхүү хэрэглэхийг хичээдэг.

-Та брэндэд хэрхэн ханддаг вэ?

-Дуртай, дуртай /инээв/. Өмнө нь хүүхэд төрүүлээгүй байхдаа олсон мөнгөө өөртөө зориулаад явдаг байсан. Одоо тэгж чадахаа больсон. Яг шаардлагатай үед авна. Ихэвчлэн гэр бүл үр хүүхдэдээ зориулна. Ганц нэг таалагдсан юмаа хэлчихвэл заримдаа манай нөхөр аваад өгчихдөг. Өөрт хэрэгцээтэй байгаа хэрэглээгээ өөрөө л болгохыг боддог. Гэр бүлийнхээ фондоос авахыг боддоггүй. Тэр нь надад ч амар байдаг. Ер нь сүүлийн үед загварлаг эмэгтэйлэг брэндүүдийг сонирхоод байгаа. Би нээх эмэгтэйлэг хүн биш л дээ. Гэхдээ одоо насаа бодсон ч тэр, цаанаасаа л эмэгтэйлэг байх гээд байгаа. Урьд би палаж нэг их өмсөж чаддаггүй байсан. Одоо бол их олон төрлийн даашинзтай болчихсон байна лээ.

- Эмэгтэйлэг хүн биш гэлээ. Ер нь та өөрийгөө ямар хүн гэж дүгнэдэг вэ?

- Зарим хүмүүс хэт их шаардлага тавьдаг. Би тэгдэггүй. Жишээлбэл хамгийн ойр дотны хүн нөхөртөө чи ийм байх ёстой гэдэг. Ийм шаардлага тавьсанаас болж гэр бүлийн хүмүүсийн хооронд хагарал үүсч бие биенээ давах гэсэн хэрүүл гардаг юм шиг санагддаг. Би тийм их шаардлага тавьдаггүй. Бид хоёр залуу байна. Яагаад ийм залуу байж бие биенээ шахаж шаардаад байдагийг би ойлгодоггүй. Ерөнхийдөө манай найзууд чи их тайван хүн гэдэг. Хүн гэр бүл зохиогоод явахаараа зөвхөн өөрийнхөө өнцөгөөс биш өөр хүний өнцгөөс боддог болчихдог юм билээ. Би ийм байна гэж хэлэхээ больдог. Тэгэхээр бусдыг сайн ойлгодог болчихдог. Бусдыг ойлгохоор тэр хүмүүс намайг эргээд ойлгох жишээтэй. Тиймээс өдөр тутмын амьдралаа энгийн аз жаргалтай өнгөрөөхийг хүсдэг. Мэдээж асуудалгүй амьдрал гэж юу байхав. Тэр болгон дээр аль болох тайван хандахыг хичээдэг. Тэгвэл миний амьдрал ч стрессгүй сайхан байх юм шиг санагддаг. Би энгийн л нэг эмэгтэй.

Баярлалаа.

24tsag.mn