Хууль зүйн сайд Х.Тэмүүжингийн “нялх амраг” гэж цоллуулаад буй Г.Сарангэрэл ШШГЕГ-ын харьяа цагдан хорих 461 дүгээр ангид  өнгөрсөн гуравдугаар сараас хойш саатуулагдаж байна. Г.Сарангэрэл саатуулагдсан шөнөө 9910....тай дугаар луу олон удаа залгасан байдаг. Залгасан хүнийг олж тогтоохоор УЕПГ-ын зөвшөөрлөөр оператор компаниас нь гаргуулан дүн шинжилгээ хийхэд 9910...тай дугаарын эзэн Хууль зүйн сайд Х.Тэмүүжин болох нь тогтоогдсоныг УМБГ-аас мэдээлсэн. Гэвч ямарваа нэгэн хэрэгт холбогдсон иргэний гэм буруутайг шүүхээр тогтоогоогүй байхад “хар тамхичин, хэн нэгэн албан тушаалтантай холбоотой” гэж олон нийтэд зарлах нь хууль зөрчсөн, хүний эрх, эрх чөлөөнд халдсан үйлдэл боллоо гэж Г.Сарангэрэлийн өмгөөлөгчөөр ажиллах болсон Г.Батбаяр мэдэгдээд буй. Юутай ч Г.Сарангэрэлтэй холбоотой асуудлаар түүний өмгөөлөгч Г.Батбаяраас зарим зүйлийг тодрууллаа.

-Г.Сарангэрэлийн өмгөөлөгчөөр яг хэзээнээс ажиллаж эхлэв?
-Би саяханаас өмгөөлөгчөөр нь ажиллаж эхэллээ. Надаас гадна хоёр өмгөөлөгч байгаа. Хүссэн хүсээгүй "Улс төрөөр чи оролдохгүй бол улс төр чамаар оролдоно" гэдэг шиг санамсаргүй тэр охины талаар ам дуугарчихсан чинь өөрийн эрхгүй татагдаад орчихлоо. Г.Сарангэрэл охин өөрөө намайг өмгөөлөгчөөр авна хэмээн хүсэлт гаргасан. Одоогоор хэргийн материалтай танилцаад явж байна.

-Г.Сарангэрэлийн хэрэг юу болж байна?
-Г.Сарангэрэлийн хэрэг шүүхийн шатандаа шилжчихсэн байгаа. Шүүхэд өнгөрсөн долоо хоногт шилжсэн. Дүүргийн нэгдүгээр шүүхэд шүүх хурал болох байх.

-Г.Сарангэрэлд ямар зүйл ангиар хэрэг үүсгэсэн бэ?
-192.1 дүгээр зүйл ангиар эрүүгийн хэрэг үүсгэсэн. Энэ зүйл анги Эрүүгийн хуулийн 17_1-т зааснаар хүндэвтэр гэмт хэргийн ангилалд орж байгаа. Хүндэвтэр гэмт хэргийн ангилал дээр яагаад хориод байгаа юм бол гэдэг дээр хүсэлтээ гаргаад явж байна. Эхний ээлжинд батлан даалтад гаргах хэрэгтэй байгаа.

-Батлан даалтад гаргах хүсэлтээ яг хэзээ өгсөн бэ. Хуулийнхан хариу мэдэгдсэн үү?
-Намайг өмгөөлөгчөөр орохоос өмнө сунгах хугацаа нь болоод өнгөрсөн байна лээ.Г.Сарангэрэл хоригдоод 4-5 сар болчихсон юм байна. Гэхдээ яахав надад шүүгчийн захирамжинд гомдол гаргах хугацаа байгаа. Тодруулбал, Г.Сарангэрэл охиныг энэ сарын 2-ноос долдугаар сарын 2 хүртэл хорих хугацааг сунгасан. Тэгэхээр ямар учраас үргэлжүүлэн хорьж байгаа гэх мэт зарим зүйлтэй танилцаж байж шүүгчийн захирамжийн эсрэг гомдол гаргахаа шийднэ дээ.

-Ер нь биеийн байдал нь хэр байгаа вэ.Өлсгөлөн зарласан гэсэн мэдээлэл гараад байсан. Та өөрөө уулзаж үзсэн үү?
-Биеийн байдал нь гайгүй. Гэхдээ сэтгэл санаа гутарсан байдалтай байгаа.Өөрөө энэ хэргээс болоод нийгэмд сенсаац тарьчихсан, энэ хэргээс болж намайг хоригдож байхад хүртэл өмгөөлөгч, ар гэрийнхэнтэйгээ уулзах гээд гарч ирэхэд "Нөгөө охин байна. Х.Тэмүүжинтэй явалдахад ямар байсан" гэх мэтээр дарамталж сэтгэл санааны хувьд маш хэцүү байна. Хүн болгон л буруугаар ойлгож харж байна. Би бол тэр хүнийг танихгүй, мэдэхгүй гэсэн байр суурьтай байгаа.

-Гэхдээ баригдсан шөнөө Х.Тэмүүжин сайд руу залгасан болохыг нь УМБГ-аас тогтоосон шүү дээ. Тэрэн дээрээ ямар тайлбар хийж байна?
-Өөрөө бол энэ учрыг сайн ойлгох ч үгүй, мэдэх ч үгүй байгаа. Би бол энэ хэрэгтэй сайн танилцаагүй байгаа. Гэхдээ би өмгөөлөгчийнхөө хувьд өөрийн дотоод итгэл үнэмшлээрээ "Тухайн хэрэгт ямар байдалд, гэмт хэрэг хаана, хэдийд, ямар нөхцөл байдалд болсон бэ, зохион байгуулалттайгаар хэн нэгэн этгээдийг буруутгахын тулд энэ охиныг ашигласан уу, эсвэл үнэхээр энэ охин эл гэмт хэрэгт холбогдсон уу, холбогдохдоо санамсар болгоомжгүйгээр холбогдсон уу, эсвэл удаа дараа энэ зүйлийг хэрэглэдэг байж байгаад холбогдсон уу" гэдгийг хавтаст хэрэгтэй танилцаж байж л мэднэ.

-Г.Сарангэрэл насанд яг хүрсэн байсан уу?
-Өөрөө бол 19 настай. Насанд бол хүрчихсэн.

-Аавынх нь ярилцлагаас харж байхад Гэрэл гэгч эмэгтэй Г.Сарангэрэл нарын охидод турдаг гээд хар тамхи хэрэглүүлсэн гэсэн. Энэ тал дээр?
-Яахав хажууд нь бүдүүн, тарган янз бүрийн охид цуг байсан байж болзошгүй.Тэдгээр охид нь турна, сэтгэл санаа сэргэнэ гэсэн байж магадгүй. Ер нь бол дээр үеэс гутлын цавуу үнэрлэх , олс өвс татах ийм гэмт хэргүүд байсан. Одоо л хар тамхи гэж манайд хүндээр хүлээж аваад байгаагаас. Гэхдээ ийм төрлийн гэмт хэрэг нийгэмд гарч байгаа гэмт хэргийн 0.1 хувийг эзлэх түвшнийх л байсан. Одоо ч өсөөд, нийгмийн цочроох түвшинд хүрчээгүй байгаа.

Ер нь бол би одоогоор өөрийнхөө үйлчлүүлэгчийг хэрэглэсэн гэж хэлж мэдэхгүй байна. Хэрэглэсэн эсэхийг нь шүүх шийднэ. Би бол өмгөөлөгчөөр орж байгаа учир аль болох үйлчлүүлэгчдээ ашигтайгаар нөхцөл байдлыг эргүүлэхийг л хичээнэ.

-Энэ хэрэгт яг хэдэн хүн холбогдон шалгагдаж байгаа вэ?
-Хэд, хэдэн холбогдочид байгаа. Тухайн хүмүүс энэ хэрэгт ямар, ямар байдлаар холбогдсоныг хэлэх боломжгүй.

Ер нь энэ охины нэр хүнд, алдарт шүүхээр шийтгэх тогтоол гараагүй байхад халдаж болохгүй. Гэм буруутайг нь тогтоогүй байхад хэвлэл мэдээллээр нэр хүндэд нь халдаж, гэр бүлийнхнийх нь сэтгэл санаанд нөлөөлсөн энэ байдалд гомдолтой байгаа. Ер нь шүүхээр ороод буруутай ч , буруугүй ч байсан нэр хүнд, алдар хүндийн хохирлыг нэхэмжилнэ.

-Г.Сарангэрэлийг 2-3 өмгөөлөгч хулхидсан буюу өмгөөлөл үзүүлнэ гэчихээд залилж алга болсон тохиолдол гарсан гэж сонссон?
-Тиймэрхүү гомдлын шинжтэй зүйлийг ар гэрийнхэн нь ярьдаг. Намайг ч бас "Та биднийг битгий залилаад алга болчихоорой" гэдэг байдлаар хандаж байсан. Энэ бол зүй бус харьцааг үүсгэсэн өмгөөлөгч нартай л холбоотой асуудал.

-Г.Сарангэрэлийг амиа хорлохыг завдсан гэх мэдээлэл байсан?
-Гар хуруугаа олон удаа зүссэн сорив байна лээ.Шүүхийн шийдвэр гүйцэтгэлийнхэн ийм зүйлийг нуудаг. Тэгэхээр энэ хүний олон түмэнд дуу хоолойгоо хүргэх ганцхан арга зам өлсгөлөн зарлах. Өөрөө өлсгөлөн зарлах гээд өргөдөл гомдлоо өгөөд байдаг тэрийг нь Д.Амарсайхан агсаны хэргээс хойш хүлээж авахаа больсон.

-Хорих ангид ямарваа нэг өөрийгөө гэмтээх зүйл байхгүй байх. Яг юугаар гараа зүссэн юм бол?
-Мохой зүйлээр гэмтээсэн байдаг. Гараа 4-5 удаа зүссэн сорви харагдаж байна лээ. Хамгийн гол нь энэ бүхнээ ил гаргахгүй байгаа нь ар гэрийнхнийхээ санааг зовно гэж үзэж байгаа.

-Ээж нь бие муу хүн байдаг гэсэн үү?
-Ээж нь хүнд өвчтэй. Нурууны хагалгаанд орсон хүн байдаг. Аав нь л охиныхоо төлөө явдаг.