Эмоци продакшн, Боловсрол суваг ТВ-ын хамтын бүтээл “Гурван найз” инээдмийн цуврал үзэгчдээс өндөр үнэлгээ авсан билээ. Тэгвэл 24tsag.mn сайт тус кинонд Төгөлдөрийн дүрийг бүтээсэн СТА жүжигчин С.Тэмүүжинтэй ярилцлаа.

-“Гурван найз” инээдмийн цуврал үзэгчдэд маш сайн хүрсэн. Өнгөрсөн хугацаанд та бүхэнд үзэгчдээс ямархуу мессежүүд ирж байв?

-Монголын хамгийн отгон “Эмоци продакшн”, “Боловсрол” суваг телевизтэй хамтран бүтээсэн “Гурван найз” олон ангит кино гараад дууслаа. Бидний хувьд сэтгэгдэл маш өндөр байна. Хүмүүс маш сайхан хүлээж авсан. Үзэгчид гэдэг бол ямар ч уран бүтээлийн шүүгчид байдаг. Тэр утгаараа манай уран бүтээлийг маш сайн шүүн тунгааж үзсэн байх гэдэгт итгэлтэй байна. Маш сайхан халуун дулаан энергитэй, ямар ч стресс байхгүй монголын өнөөгийн нийгэмд тохирсон сайхан кино болсон байна гэж олон хүмүүс магтаж байгаа. Түүнийхээ хэрээр бас сөрөг мессежүүд ч байна. Тэр нь юу гэхээр архидалт шоу цэнгээнийг их үзүүлж байна, залуу хүмүүс гэхээрээ олон хүүхэнтэй орооцолддог юм уу, солонгосын киног хуулаад хулгайлаад хийчихлээ гэсэн янз бүрийн шүүмжлэлүүд ирсэн. Бид анхнаасаа Солонгосын “Найз” гэдэг киноны албан ёсны эрхийг нь аваад монголынхоо хөрсөнд буулгахыг зорьсон. Гэхдээ эх зохиолоос нь өөрчилсөн зүйл олон байгаа. Тухайлбал төгсгөлийн 40-р ангийг найруулагч С.Баттулга ахтайгаа ярьж байгаад өөрчилсөн. Монгол орныхоо 21 аймгаар аялан тоглолт хийгээд явж байхад олон хүн бидэнд урмын үг хайрласан. Бид энэ киноноос маш их урам авч байгаа.

-Энэ киног хийх санааг анх хэн гаргасан бэ? Шинэ жилийн тусгай дугаар хэлбэрээр үзэгчдийн хүртээл болсон санагдаж байна?
-Монголд анх удаа хийгдэж байгаа төрөл жанарын кино гэж байсан. Энэ талаар?

-Ситкомыг ситуац комеди буюу үйл явдлын инээдэм гэж утгачилж ойлгож болно. Өөрөөр хэлбэл, анги болгон дээр өөр өөр үйл явдал гарч тухайн үедээ үзэгчдийг инээлгэдэг. Тэр утгаараа монголын анхны ситком сериал болсон. Зураг авалтынх нь обьектууд дандаа павилионд засагдсан байгаа.
-Та энэ кинонд ухаалаг, хүүхнүүдийг араасаа гүйлгэсэн сайхан залуугийн дүрд тоглосон. Энэ дүрд хэрхэн тоглох болов?

-Би киноныхоо зохиолыг хамгийн түрүүнд уншсан хүмүүсийн нэг. Надад Цэкүгийн дүр хамгийн их таалагдсан. Би Төгөлдөр шиг дүрд зөндөө тоглосон болохоор Цэкүд тогломоор байсан. Гэтэл найруулагч болоод хамтлагийнхан маань "Киноны ноён нуруу болсон дүр дээр чи өөрөө байсан нь дээр. Цэкү сахилгагүй гоё дүр. Гэхдээ чи Төгөлдөрт тоглосон нь дээр" гэцгээж байсан. Тэгээд надад нэг болзол тавьсан. Тэр нь Төгөлдөрийг арай өөрөөр бүтээх юм. Тэд надад энэ дүрийг өөрөөсөө аль болох холдуулаад өөр хүн бүтээх гээд үз гэсэн нь надад урам зориг өгсөн. Ингээд Төгөлдөрийн дүр дээр ажилласан даа.

-Таны гэр бүлийн хүн энэ кинонд Сарнай хэмээх бүсгүйн дүрд тоглосон байгаа. Киноны төгсгөлд найзтай тань учир ургуулаад дууслаа. Таньд хардах сэтгэл төрсөн үү?

-Уран бүтээлч хүн ажлаа л хийж байгаа юм чинь хардаагүй ээ. Зохиол дээрээ бол тэгж дуусдаггүй. Цэкү, Сарнай хоёрыг нийлүүлж дуусгая гэдэг санааг би өөрөө гаргасан. Найруулагч С.Баттулга ахтайгаа ярьж байгаад зохиолд өөрчлөлт оруулсан байгаа.
-Та гурав амьдрал дээр хэр найзууд вэ?

-Цэкүд тоглосон Анхаа бид хоёр СУИС-ыг Лхамхүү багшийн удирдлаган дор хамт төгссөн нэг ангийн найзууд байгаа юм. Төтө ах бид хоёрын хувьд нэг хамтлагт хүчин зүтгэдэг. Амьдрал дээр бол ах, уран бүтээл дээр бол найз минь. Төтө ах бид хоёр Цэкүгийн дүрд хэнийг тоглуулах вэ гэж удаан ярилцсан. Тэгээд Анхаагаа тоглуулъя гээд санал тавьсан.

-Найзууд хайраа олоод төгслөө. Зарим хүмүүс цаашид үргэлжилнэ гэсэн найдлага тавиад байгаа?

-Ер нь "Боловсрол" ТВ-ийн фэйсбүүк хуудас, "Эмоци" продакшны фэйсбүүк хуудсуудаар маш их мессежүүд ирсэн. “Та нар киногоо ингээд дуусгачихаж байгаа юм уу, дөчхөн анги гэж үү, цаашаа үргэлжлүүлээд хий л дээ, орой “Гурван найз” маань гарахгүй байсан чинь нэг л гунигтай санагдаад явчихлаа, бараг хотод баймааргүй санагдаад байна” гэсэн янз бүрийн комментууд ирсэн. Тэр бүх коммент бичсэн хүмүүстээ хандаж хэлэхэд уран бүтээл маань ингээд дуусч байгаа. Гэхдээ “Гурван найз” шиг өөр олон сайхан уран бүтээл “Эмоци” продакшн, “Боловсрол” суваг ТВ-ынхэн хамтарч хийх болно гэдгээ амлаж байна.

-Сайхан киног сайн уран бүтээлчидгүйгээр төсөөлөх аргагүй. Уран бүтээлчдэдээ хандаж хэлэх үг байгаа л байх?

-Манай кинонд олон сайхан уран бүтээлчийн сэтгэл шингэсэн. Эмоци продакшны анхны дэлгэцийн уран бүтээл гэхэд маш амжилттай болсон. Энэхүү кинонд анх хамтарч ажиллах саналыг тавьсан Боловсрол суваг телевизийнхэн болон ерөнхий найруулагч С.Баттулга ахдаа маш их баярлалаа. Мөн энэ кинонд бидний урилгаар тоглосон бүх жүжигчид, операторууд, эвлүүлэгчид, нүүр будгийнхан, киноны зураачид, дууны найруулагчид, хувцасны эрхлэгч, жолооч нартаа бүгдэд нь халуун баяр хүргье. Та бүхэнтэй хамтарч ажиллахад сайхан байсан шүү гэж хэлмээр байна. Та бүхний тусламж дэмжлэгтэйгээр энэ кино маань өдий зэрэгтэй кино болж гарч байгаа юм шүү.
-Дахиад ийм сериал хийх бодол байгаа юу?

-Ер нь Эмоци продакшн янз бүрийн уран бүтээл хийнэ. Монголын хамгийн отгон буюу байгуулагдаад жил гаруй л болж байгаа хамтлаг шүү дээ. Тийм учраас бидэнд өөр олон сайхан уран бүтээл хийх бодлого, зорилго, мөрөөдөл байгаа. Түүнийгээ биелүүлэхийн төлөө ажиллана даа.

-Эмоци продакшн гээд ярьсных сүүлийн үеийн сонин хачнаасаа хуваалцахгүй юу?

-Сүүлд манай хамтлаг 21 аймгаараа явж аялан тоглолт хийлээ. Одоогийн байдлаар зуны амралт эхэлчихсэн сайхан амарч байна. Ирэх намраас бид тайзны шинэ уран бүтээлүүддээ орно. Бас шинэ дуу хийх санаа байгаа. Уран бүтээлийн олон төлөвлөгөө байна. Тухайн үед нь үзэгч олондоо тайлагнаад явна.

-Хөлбөмбөгийн ДАШТ эхэллээ. Та ер нь хөлбөмбөг хэр сонирхдог вэ?

-Багаасаа хөлбөмбөг үздэг байсан. Энэ спортод дуртай. Хүн төрөлхтөний эв нэгдлийн бэлэг тэмдэг болсон ДАШТ болж байна. Өөрийнхөө дэмждэг багийг үзээд, уухайлаад л сууж байна даа.

-Аль багийн фанат вэ?
-Английн шигшээ багийг дэмждэг. Гэхдээ энэ жил Англичууд маань жаахан тааруухан л байх шиг байна.

Ярилцсанд баярлалаа.