Налайх дүүрэгт өнгөрсөн оны аравдугаар сарын 17-18-нд шилжих шөнө нэгнийгээ зургаан удаа буудаж хөнөөсөн хэрэг гарсан талаар бид мэдээлсэн.  Тэгвэл талийгаач М.Эрхэмбаярыг түүний танидаг хүн А.Мэндбаяр гэгч буудаж хөнөөсөн нь тогтоогдсон байдаг. Тухайн хэргийн мөрдөн байцаалт дуусч хэргийг Прокурорт шилжүүлсэн байгаа. Гэвч энэ хэргийг цаана хар тамхины хэрэг нуугдаж байна, А.Мэндбаяр гэгч чухам ямар учраас хүний амь насанд хүрэв гэх зүйлс тодорхойгүй өдий хүрсэн билээ.

Тэгвэл энэ бүх асуултанд хариулт болохуйц мэдээллийг талийгаач М.Эрхэмбаярын аав Д.Мөнхжаргал дөнгөж сая сэтгүүлчдэд мэдээллээ. Түүний зүгээс тухайн хэрэг хав дарагдах шинжтэй байна гэдгийг хурлын үеэр онцолсон юм.

Юутай ч талийгаачийн аавтай уулзаж доорх асуултанд хариулт авлаа.

-Талийгаач таны хэд дэх хүүхэд байв?
-Би гурван хүүхэдтэй эцэг хүн. Талийгаач миний ууган хүү байсан. Ууган хүүгээ бусдын гарт онц хэрцгийгээр алдаад 8, 9 сар боллоо. Хүүгийн маань хувьд Сан дээд сургуулийн банкны эдийн засагчаар төгссөн, мэргэжил мэдлэгтэй нэгэн байсан. Эцэг, эхтэйгээ амьдардаг хүмүүжилтэй хүүхэд байсан учир хар тамхи бүү хэл янз бүрийн хэрэгт орооцолдохооргүй. Гэвч хэвлэл мэдээллээр миний хүүг хар тамхичин мэтээр, намайг өмнө нь ял шийтгэл хүлээж байсан болгож бичиж байгаад харамсалтай байна.

-Таныг өмнө нь хэрэгт холбогдож байсан гэх мэдээлэл гарах нь гарсан шүү?
-Намайг 1990 онд хулгай хийж хэрэгт холбогдоод хуулийнхныг атгадаг учир зүгээр мултарсан мэтээр бичсэн. Гэвч надад хулгай хийгээд хууль шүүхийн байгууллагаар шалгагдаж байсан түүх байхгүй. Харин миний хүүг хөнөөсөн А.Мэндбаяр гэгчийн аав Н.Алтансүх бол өмнө нь удаа дараа  2 жилийн ялаар шийтгүүлж байсан нэгэн гэдгийг би олж тогтоосон.

-Хүүгийн чин хувьд машин дотроо буудуулсан байдалтайгаар олдсон гэсэн үнэн үү?
-Тийм зүйл байхгүй. Миний хүүг машинаас нь 3 метрийн зайд аваачиж араас нь зургаан удаа буудаж хөнөөсөн байдаг. Чухам ямар учраас ингэж онц хэрцгийгээр аминд хүрсэнийг би одоо ч ойлгохгүй. Ямар ч байсан хүнийг араас нь зургаан удаа буудаж хөнөөж байгаа хүн яав ч эрүүл биш байх гэж бодож байгаа. Тиймч үүднээс хууль хяналтынхныг удаа дараа А.Мэндбаяр гэгчийг тухайн үед архи согтууруулах ундаа, хар тамхи, сэтгэцид нөлөөлөх эм бэлдмэл хэрэглэсэн байсан уу шалгаж өгөхийг хүссэн. Гэвч А.Мэндбаяраас 1.5 мл грамм цусны дээж авч шалгаад тэр нь хүрэлцэхгүй байна гэх шалтгааныг шүүх шинжилгээнийхэн хэлсэн. Мөн шинжилгээ хийх гэтэл аппарат нь эвдэрсэн гэх зүйлийг ярьсан. Яагаад заавал тэр хүүхдийг мансууруулах бодис хэрэглэсэн эсэхийг шалгах гэхээр цус нь хүрэлцэхгүй, төхөөрөмж нь эвдэрчихээд байдгийг ойлгохгүй юм.

-Талийгаачаас шинжилгээ авахад ямар нэг хар тамхи, мансууруулах зүйл илэрсэн үү?
-Миний хүүгээс цус, шээс авч шинжилгээ хийсэн байдаг. Гэвч мансууруулах бодис, архи согтууруулах ундаа юу ч илрээгүй байдаг.
Тиймээс би удаа дараа тэр А.Мэндбаяр гэгчийг дахин дахин шинжлүүлэхийг хүссэн. Гэвч хуулийнхан олигтой зүйл хийж өгөхгүй байна.

-Таны хүүгийн хувьд хэрэгтэнтэй ямар холбоотой байсан бэ?
-Хороололд ойролцоо амьдардаг байсан учир нэгнээ танидаг байсан. Учиргүй сайн найзууд байгаагүй. Гэхдээ А.Мэндбаярын гэгчийн аав Алтансүх миний хүүг нэг удаа “чамайг заавал ална” гэж сүрдүүлж байсныг санаж байна. Тухайн үед би яагаад чамайг ална гэж байгаа юм гэж асуухад юу ч хэлээгүй. Гэвч тэр явдал болоод төд удалгүй хүү минь амиа алдчихсан. Найз нөхөд нь үүнийг гэрчлэх боловч цагдаагийн байгууллагад очиж мэдүүлэг өгөхгүй байна.

-Энэ хэрэгт ямар зүйл ангиар хэрэг үүсгэсэн бэ?
-Эрүүгийн хуулийн 91.3 гэсэн зүйл анги буюу өш хонзонгийн сэдэлтэй хүн амины хэрэг гэдгээр хэрэг үүсгэсэн. Одоо прокурорын шатанд шалгагдаж байгаа.

-Ер нь таныхаар бол энэ хэрэг хар тамхитай холбоотой гэж үзэж байгаа юм уу?
-Тийм би тэр А.Мэндбаяр гэгчийн хар тамхи хэрэглэсэн, хар тамхитай ямар нэг хэлбэрээр холбогдсон этгээд гэж бодож байгаа. Тийм ч үүднээс хуулийн байгууллагаар удаа дараа энэ асуудлаар шалгаж өгөхийг хүссэн. Гэвч тэд нааштай хариу өгөхгүй байна. Би сүүлдээ танай аппарат, шалгадаг төхөөрөмж Мэндбаярыг шалгахад эвдрээд байвал гадны өндөр хөгжилтэй оронд шалгаад өгөөч гэсэн хүсэлтийг ч тавьсан.

-Хэвлэл мэдээллээр мөн найз охиноо булаацалдсанаас тийм хэрэг гарсан гэх мэдээлэл гарсан?
-Харин тийм зүйл мэдээллээд байсан. Гэвч би огт санал нийлэхгүй байгаа.

-Мөрдөн байцаалт дууссан юм бол А.Мэндбаярын мэдүүлэгтэй та танилцсан байх. Юу гэж мэдүүлэх юм бэ?
-Мэдүүлэг болгондоо өөр өөр мэдүүлэг өгсөн байдаг.  Нэг бол миний хүүг найз охиноо хүчиндсэн гэж, эсвэл намайг байнга зодож дарамталдаг байсан гэж мэдүүлсэн байдаг.

-А.Мэндбаяр гэгчийн аав ер нь ямар албан тушаалтай хүн юм бол. Айхтар бизнесмэн, ар тал өндөртэй нэгэн гэж бичигдэж байсан?
-Тэр хүнийг хэвлэлээр их л сүрхий бизнесмэн гэж бичээд байсан. Мөн “Монгол банк”-ны захирал асан, Эдийн засгийн хөгжлийн яамны дэд сайн О.Чулуунбатын сайн найз гэж бичигдсэн. Би бодохдоо О.Чулуунбат гэгчээр намайг айлгаж, сүрдүүлэх гээд байгаа юм уу гэж ойлгосон. Эсвэл О.Чулуунбат гэгч аллага санхүүжүүлдэг болчихсон юм уу. Ер ойлгохгүй юм.

Н.Алтансүх гэгч энэ хэрэг болсоны дараахан “Цагаан хэрэм” ресторанд дахин хүн рүү буу тулгаж заналхийлсэн гэж байгаа.  Энэ хэрэг ч гэсэн тэгсхийгээд л өнгөрсөн байх. Би энэ дагуу шалгаад өгөхийг ч хүссэн. Шалгах шаардлагагүй л гэж байна.

-Ер нь хуулийнхан таны тавьсан хүсэлтийг авч үзэхгүй байгаа гэж ойлгож болох уу?
-Ерөөсөө л шалгах шаардлагагүй, тогтоохгүй гэх мэт зүйлээр хаацайлдаг. Тэгсэн хэрнээ намайг их азтай хүн гээд байгаа юм. Танай хүүхдийн хэрэг илрэхээргүй байсан. Харин тэр дороо баригдсан чи азтай хүн гэж байсан.