Алтернатив дуучин Отгоо буюу Х.Отгончимэг уран бүтээлдээ эргэн орсон талаар бид мэдээлсэн. Тэрээр гурав дахь бие даасан цомгоо худалдаанд гаргасан бөгөөд “Chill out” нэртэй түүний цомог 10 дуунаас бүтжээ. Тэгвэл 24tsag.mn сайт дуучин бүсгүйтэй утсаар холбогдож уран бүтээлийнх нь сонин хачныг сонирхлоо.

-Шинэхэн цомгоо худалдаанд гаргалаа. Ер нь цомгийн ажил хэзээнээс эхэлсэн бэ?

-Түрүү жилийн намраас гурав дахь цомгийнхоо ажилд орсон. Би цомогт багтсан дуунуудаа дуулахдаа гурван сартай жирэмсэн байсан. 2013 онд гурав дахь албомоо эхэлж, гурав дахь хүүхэд маань бидэнд ирсэн гэсэн үг. Тэгээд 2014 ондоо CD-гээ гаргаж, хүүхдээ ч төрүүллээ.

-Энэ цомог бусад “Chill out” төрлийн цомгуудаас дуулалттай гэдгээрээ анхдаг болж байна. Яагаад заавал “Chill out”-ыг сонгосон бэ?

-СD-нийхээ дуунуудыг санаадгүй хийсэн л дээ. Эхлээд бол зүгээр хөгжим байсан. Дан хөгжмөөрөө Chill out урсгалын СD хэд хэд гарсан байгаа. Хамгийн сүүлд “Ертөнц” гээд цомог гарсан. Тиймээс хөгжмийг хийсэн уран бүтээлчидтэйгээ ярилцаад “Дуу болгочихвол ямар вэ? би дуулъя” гэдэг санал тавьсан. Өмнөх хоёр цомгоос ялгаатай нь өөр урсгалаар хийгдсэнд байгаа. “Chill out” гэдэг нь их хотын стрессийг тайтгаруулах зорилгоор гарсан хөгжим шиг байгаа юм. Тэр утгаараа хөнгөн хэмнэлтэй дуунууд болсон.

-Энэ цомогт их олон хүний хүч хөдөлмөр шингэсэн байх?

-“Ocean grey” продакшны уран бүтээлчид хөгжмийг нь хийсэн. Харин дууны шүлгүүдийг яруу найрагч Х.Болор-Эрдэнэ  Б.Эрдэнэсолонго, С.Энхтайван, ZZ нар бичсэн байгаа. Энэ цомог 10 дуутай. Монгол чилл аут гэдэг утгаараа үндэсний хэв маягийг бага ч болов харуулахыг хичээсэн. Дуулалтан дээр ч гэсэн анзаарагдах байх гэж бодож байна. Мөн хөгжмийн тал дээр “Жонон” хамтлаг, саксафонист Болд ах, Тэнүүн зэрэг хүмүүс оролцсон.
-Дуучин Отгоогийн дараагийн төлөвлөгөө юу байна вэ?

-Ерөнхийдөө CD-нийхаа танилцуулга болгож ганц, хоёр клип гаргахаар ажиллаж байна. Одоогоор дуусах шатандаа явж байгаа. Хэрэв цомог маань амжилттай байвал цаг агаар сайхан байгаа дээр амжуулж задгай талбайн тоглолт хийе гэсэн бодол бол байгаа. Тоглолтын тов бол гараагүй. Мэдээж энэ бол эхлээд цомгийнхоо танилцуулгыг сайн хийсний дараа л яригдах зүйл.

Баярлалаа.