МАХН-ын Гүйцэтгэх товчооны шийдвэрээр тус нам намынхаа анхан шатны байгууллага, гишүүд дэмжигчдийн уулзалт зөвлөлгөөнийг бүсчилсэн байдлаар явуулахаар төлөвлөсөн. Энэ дагуу өнгөрөгч амралтын өдрүүдэд тус нам Хангайн бүсийн зөвлөлгөөнийг зохион байгуулжээ. Энэ талаар МАХН-ын даргын ажлын алба хариуцсан Нарийн бичгийн дарга П.Цогтбаатараас тодрууллаа.

-Энэ удаагийн Хангайн бүсийн зөвлөлгөөнд ямар ямар аймгууд хамрагдсан бэ?
-Архангай, Өвөрхангай, Баянхонгор, Хөвсгөл аймгийн МАХН-ын анхан шатны байгууллагын ажилтнууд, МАХН-ын гишүүд дэмжигчид оролцлоо. Зөвлөлгөөн Архангай аймгийн Өгий сумын Өгий нуурын хөвөөнд болсон. Бидний анх төлөвлөж байснаас илүү олон хүн хамрагдаж, зөвлөлгөөн маань үр дүнтэй болж,өмнөө тавьсан зорилгоо амжилттай биелүүллээ.

-Зөвлөлгөөнөөр ямар асуудлыг голлон хэлэлцсэн бэ?
-Бид 2014 оныг намын анхан шатны байгууллагыг дэмжих жил болгон зарласан. Энэ дагуу хөдөө орон нутаг, сум, багт хүрч ажиллах, намынхаа бодлого зорилтыг хурдан шуурхай хүргэх, мөн эргэх холбоотой ажиллан намын анхан шатны ажлыг урьдныхаас ахисан түвшинд хэрхэн гаргах талаараа ярилцлаа. Мэдээжийн хэрэг цаг үеийн холбоотой зарим асуудлаар намын анхан шатны байгууллагын хүмүүсийнхээ санаа бодлыг сонсч, цаашид хийх ажлынхаа чиглэлийг хамтран гаргасан гэж ойлгож болно.

-Анхан шатны байгуллагын хүмүүсийн санаа бодол, тэдний зүгээс та бүхэнд хандаж тавьсан санал хүсэлт юу байсан бэ?
-Зөвлөлгөөнд оролцогчдын маань сэтгэгдэл өндөр байсныг юуны түрүүнд хэлэх нь зүйтэй болов уу. Тэдний зүгээс бидэнд хандаж тавьсан асуудлын эхний эгнээнд намын дарга Н.Энхбаярын биеийн байдалд санаа зовж байгаагаа илэрхийлэхийн сацуу, түргэн эдгэж намынхаа ажлыг гардаж хийгээсэй гэдэг хүсэл байсан. Мөн Шударга ёсыг нийгмийн бүхий л шатанд бий болгохын тулд хаа хаанаа идэвхи гаргаж ажиллах хэрэгтэйг хэлж байлаа. Нөгөө талаар МАХН-ын үйл ажиллагааг харлуулах гэсэн элдвийн халдлага, гүтгэлэгийн шинжтэй мэдээллүүдэд намын удирдлагуудын зүгээс анхаарал хандуулд дахин хэлмэгдүүлсэн бусармаг үйл ажиллагааны эсрэг дорвитой арга хэмжээ авах хэрэгтэйг илэрхийлж байсан нь тэд маань ямар хэмжээнд санаа зовинож байгааг харуулсан явдал байсан. Үүнээс гадна орон нутагт үйл ажиллагаа явуулахад намын анхан шатны байгууллагууд хөрөнгө санхүүгийн хувьд хүндрэлтэй нөхцөлд ажиллаж байгаа учраас энэ тал дээр ямар гарц гаргалгаа байж болох тал дээр бидэнтэй санаа бодлоо солилцож байсан. Хамгийн гол нь ямар ч цаг хугацаанд бусдын нөлөөнд автаж болохгүй, намын өмнө тавьсан зорилго, мөрийн хөтөлбөрийг биелүүлэхийн төлөө ажиллах, цаашид 2016 оны сонгуульд өндөр амжилт гаргахын төлөө бүх нөөц бололцоогоо дайчлан ажиллах хэрэгтэй талаар бидэнд хэлж байсан.

-МАХН бол социаль димократ үзэл баримтлалтай нам. Эл үзэл баримтлалын талаарх ойлголтыг орон нутгийн анхан шатны байгууллагынхандаа өгсөн гэж  сонссон. Тэд дээрх үзэл баримтлалын талаар ямар хэмжээний ойлголттой байсан бэ?
-Ер нь бид өмнө ч тэр орон нутгаар ажиллаж байхад намынхаа үзэл баримтлалыг тодорхой болгох, намын идэвхтэн сонгуультнууд болон нийт дэмжигчдэд социаль димократ үзэл баримтлалын талаар мэдээлэх хэрэгтэй талаар санал гарч байсан. Ойлголтыг тодорхой болгохын сацуу социнтернийн гишүүн орны тоонд нэгдэх талаар ч санал гарч байсан. Энэ дагуу бид энэ удаагийн хангайн бүсийн зөвлөлгөөнөөр намын үзэл баримтлалын талаар тодорхой ойлголт, мэдээллийг өгсөн. Ер нь цаашид манай намын гишүүд дэмжигчид намынхаа баримталдаг үзэл баримтлалын талаарх нэгдсэн ойлголттой болсноор цаашид илүү ухамсартайгаар намынхаа үйл ажиллагаанд оролцох боломж нь нээгдэх юм.

-Та бүхэн хангайн бүсийн зөвлөлгөөний үр дүнг хэрхэн харж байгаа вэ?
-Хамгийн чухал зүйл бол манай намын аймаг аймгийн идвэхтэн сонгуультнууд, намын гишүүд өвөр зуураа танилцаж, нөхөрлөх, улмаар хоорондоо туршлагаа хуваалцаж, солилцох явдал. Энэ утгаараа зөвлөлгөөний ач холбогдол өндөр, үр дүн сайтай байсан гэж ойлгож болно. Үүгээр хязгаарлагдахгүй цаашид аймгууд хамтран болон тус тусдаа юу юу хийж болох, ямар арга барилаар намын анхан шатны байгууллагын үйл ажиллагааг авч явах, юун дээрээ анхаарах вэ гэх мэтийн харилцан яриа, нэгдсэн ойлголтууд нь эргээд бидний энэ жилийн зорилго болсон Намын анхан шатны байгууллагыг дэмжих жилийн ажлын томоохон үзүүлэлтийн нэг болж байгаа юм. Нөгөө талаар энэ удаагийн зөвлөлгөөнд МАХН-аас УИХ, Засгийн газарт сонгогдон ажиллаж байгаа УИХ-ын гишүүн, сайд нар, намын удирдлагууд, төв апаратынхан оролцсон нь зөвлөлгөөний ач холбогдлыг нэмэгдүүлсэн. Зөвлөлгөөнөөс гарсан зөвлөмж, шийдвэрийг хэрэгжүүлэх арга механизм, үр дүн тэр чинээгээрээ бодитой, илүү ажил хэрэгч байж чадсан гэдгийг хэлэх  хэрэгтэй. Ер нь энэ удаагийн болон дараа дараагийн бүсчилсэн зөвлөлгөөнөөс гарсан шийдвэр, зөвлөмжийг нэгтгэн томоохон бодлогын баримт бичиг гарч үүний дагуу орон нутгуудад ажлууд хийгдэх учраас хангайн бүсийн зөвлөлгөөн дээр яригдсан зүйлүүд ач холбогдол их юм.

-Дараагийн зөвлөлгөөнийг хаана, хэзээ хийхээр төлөвлөж байгаа вэ?
Бид ойрын хугацаанд буюу энэ сарын 15-ны үеэр Эрдэнэт, Дархан, Сэлэнгэ, Булган, Төв аймгуудыг хамруулсан Төвийн бүсийн зөвлөлгөөнийг хийхээр төлөвлөөд бэлтгэл ажлууд хангадаад явж байна.