Нийслэлийн мэргэжлийн хяналтын газраас энэ оны төлөвлөгөөнд тусгасан дагуу геодези, зураг зүйн үйл ажиллагаа эрхэлдэг 27 аж ахуй  нэгжид шалгалт хийжээ. Уг шалгалтаар дээрх аж ахуй нэлээдгүй зөрчил илэрсэн  байна.

 Энэхүү шалгалтын  талаар нийслэлийн мэргэжлийн хяналтын дэд дарга М.Баасандоржоос  шалгалтын талаар зарим зүйлийг тодрууллаа.

-Шалгалтаар ямар зөрчил илэрсэн вэ?
- Нэлээдгүй зөрчил илэрсэн. Шалгалтанд хамрагдсан аж ахуй нэгжүүдээс дөрвөн аж ахуйн нэгж нь байгууллагдсанаасаа хойш үйл ажиллагаа явуулаагүй байсан. Харин хоёр аж ахуй нэгж дунд эрсдэлтэй байсан бол 20 аж ахуй нэгж их эрсдэлтэй  гэж үнэлэгдсэн байгаа. Түүнчлэн Барилга хот байгуулалтын яамнаас ирүүлсэн судалгаар геодези зураг зүйн тусгай зөвшөөрөл эзэмшигч 25 аж ахуй нэгжийн 42 нь мэргэжлийн боловсон хүчинтэй байсан. Харин 15 аж ахуй нэгж нь  мэргэжлийн боловсон хүчингүйгээр геодези зураг зүйн үйл ажиллагаа явуулж  байсан.  Мэргэжлийн бус боловсон хүчний гүйцэтгэсэн ажлууд  нь нарийвчлал, техникийн шаардлага хангаагүй, стандарт, норм, дүрэм, журам зөрчсөн байна.  Өөрөөр хэлбэл, мэргэжлийн болон мэргэжлийн ажиллагсад нь орчин үеийн геодезийн  хэмжлийн  багаж болон программ хангамжид найдаж ажил үүргээ гүйцэтгэж  байгаа нь цаашид гарах эрсдэлийг ихээр бий болгож байгаа юм.

-Геодезийн зургийг  хэмжлийн багаж болон программ хангамжинд суурьлуулж байгаа гэсэн. Тухайн багаж тоног төхөөрөмжийг нь шалгасан уу?
-Шалгалтанд хамрагдсан 27 аж ахуйн нэгж нь геодезийн хэмжлийн 59 багаж ашиглаж байгаагаас найман багажны баталгаажуулалтын хугацаа дууссан байсан. Мөн зураг зүйн үйлчилгээ эрхэлдэг аж ахуй нэгжид геодезийн хэмжлийн багаж байхгүй байсан зэрэг  зөрчлүүд илэрсэн.
 
- Илэрсэн зөрчлүүд дээр ямар арга хэмжээ авсан бэ?
- Ер нь шалгалтанд хамрагдсан аж ахуйн нэгжүүдийн удирдлага болон гүйцэтгэгч ажилтнууд “Геодези зураг зүйн” тухайн хууль болон бусад холбогдох хууль, стандарт, норм ба дүрэм  журмын талаар зөвлөмж зөвлөгөө өгч алдаа дутагдал гаргахгүй байх албан  шаардлага хүргүүлсэн. Мөн дотоодын хяналт сайжруулж мэргэжлийн боловсон хүчнийг ажлуулах  зөвлөмжийг өгсөн.   

-Геодезийн зураг зүйн үйл ажиллагаа явуулдаг газрууд хаанаас тусгай зөвшөөрлөө авдаг вэ?
-Барилга хот байгуулалтын яамнаас авдаг. Энэхүү шалгалтанд хамрагдсан аж ахуй нэгжүүд ихэнх тусгай зөвшөөрөл авсан байсан.